1 Kɔliìŋ 7 - WƆŊ FƐ̀Ì EBÒ SÌÀŊ DAYÀA

Maŋ màaŋdàwè nyaàiŋ dè ke yɛɛ̀ nyɛ̀nɛŋ

¹ Wèè maŋ keì maŋ mùŋ naŋ sìngè maŋ. Wo felaaà gò ɓèmè jɔùŋ wɔ wò naŋ nyɛ̀nɛ̀ŋ tɛ̀ɛ̀.

² Kɛɛ wèè esàɓù e kèì nàànààŋ e hmɔŋtu nyɛ̀nɛɛ̀ŋ, wo felaa gbiŋ kuwìè wo jàwè e wùmauŋ, yèè wo jɔùŋ gbiŋ kuwìè wo fàìŋ nèè wùmauŋ.

³ Wo felaaà koà ke nyɛ̀nɛuŋ nɛɛ̀ŋ feìŋ mààŋ wo fèlàà jɔùŋ, yèè wo jɔunɔ̀ɔŋ koà ke nyɛ̀nɛuŋ nɛɛ̀ŋ feìŋ mààŋ wo jɔ̀ùŋ felaa, yèè wo bà gbiŋ nyɛ̀nɛ̀ŋ e kèì jii fàa.

⁴ Wo jɔùŋ kuwà è gààŋ kè kpùnauŋ nɛɛ̀ŋ diɛŋ, sɔɔ̀ wo faiŋ, yɛi nɔŋ felaaà wuŋ pɛɛ kuwà è gààŋ kè kpùnauŋ nɛɛ̀ŋ diɛŋ sɔɔ̀ wo jàwè.

⁵ Wo nyùùŋ ɓɔ̀ gangà wò dawiuŋ nɔɔ̀ŋ sìwè nyɛ̀iŋ tìyèe è fèemàŋ, sɔɔ̀ naŋ nyimèè wèè naŋ yɛi nyɛ̀nɛ̀ŋ wèè è teenga kpàa bà, wèè niŋ gbìàŋ e teengaiŋ bi e zòòlo sùà. Sèè e teenga bi juo nɔŋ, tɔ̀ɔ̀tuìŋ ke kpèè yɛɛ̀iŋ nɛɛ̀ŋ nyɛ̀nɛŋ. E ɗewe lɛɛ̀ sùà, niŋ naàŋ jàà è wɔ̀à Sɛ̀tanàaŋ kùàŋ dìì èsàɓù nyɛ̀iŋ bi gò yɛ̀mɛ̀ diɛiŋ nɛ̀ sùà.

⁶ E gòngo mɛ̀ sùà, tii nàŋ yaà e keì wèè e kaaìŋ jòòpɛɛ miŋ nyimààŋ kɛ̀ kiìŋ wò Kanaà naŋ woò wèè nyaàiŋ dè è keì bi.

⁷ Tɔɔɓaa mìŋ naŋ weè mɔ̀nɔ̀ŋ wèè nyɛ̀iŋ nààŋ gbiŋ naŋ nɔ̀ŋ màànààŋ mìŋ yaà wo kpào lɛ̀, kɛɛ wo nyùùŋ gbiŋ kuwa e kìɛŋ titi e yìwìà wo Dayà sìwè, wo nyùùŋ guùŋ e kìɛŋ lɛɛ̀, wo bàa e kìɛŋ lii.

⁸ Wèè koɓɛ̀ anyuùŋ gò kùwìè jɔùŋ nyaŋ, yèè aŋ jɔ̀ùnèèdàà nyaŋ, mìŋ woà mìàŋ è henàŋ nɔ̀ŋ tɛ̀ɛ̀ wèè naŋ nɔ̀ŋ nyɛ̀iŋ bi kùàŋ màànààŋ mìŋ yaà kpào lɛ̀

⁹ Kɛɛ sèè niŋ gò ɓɛ̀nɛ̀ŋ kùwà kè jii, ɓèmeìŋ aŋ jɔùŋ niŋ ɓemè aŋ felaa. E yaà tɛ̀ɛ̀ wèè naŋ ɓèmè jɔùŋ yaà aŋ felaa wèè naŋ nɔ̀ŋ màŋ jii mɔ̀ɔ̀nɛŋ sùà.

¹⁰ Wèè anyuùŋ kùwìè jɔùŋ yèè felaa nyàŋ, mìŋ kuwa ke sàwà ke yèɛ ke fè kè sàwà miàŋ bi sɔɔ̀ wo Kanaà, wo jɔ̀ùŋ ɓɔ̀ wò dèmàŋ wò faiŋ.

¹¹ Kɛɛ sèè wò nyɛnɛŋ yɛi, kɛ̀ wo jeè yɛi ɔ̀ɔ̀ yaà faiŋ aŋ banè e keì nyiŋ nɛ̀ sùà, yèè wo felaa ɓɔ̀ wò dèmàŋ jàwè.

¹² Koɓɛ̀ anyuùŋ gbànaŋ nyàŋ mìàŋ, miàŋ bi naŋ tɛɛ̀ woò e fè è kèì wòò Kanaà bà, sèè wo wùìyaà Jisɛ̀ Kulaì sùà wo kùwìè wo jɔùŋ gò kùwìè è hààwe kɛɛ wo jɔùŋ bi nyimèè wèè aŋ nɔ̀ŋ ɓɛ̀ guùŋ, wo felaaà ɓɔ̀ wò dèmàuŋ.

¹³ Sèè wo jɔunɔ̀ɔŋ kuwa e hààwe wo Jisɛ̀ Kulaì sùà wɔ kùwìè wo felaa gò kùwìè è hààwe kɛɛ wo felaa bi nyimèè wèè aŋ nɔ̀ŋ ɓɛ̀ guùŋ, wo nìeɔ̀ ɓɔ̀ wò dèmàuŋ.

¹⁴ Wo wùìyaà Jisɛ̀ Kulaì sùà wo yèɔ kuwà è hààwe wɔ̀ wo Dayà jàaùŋ kùàŋ dìì esàɓù e nɔ̀uŋ nɛ̀ koɓɛ̀ guùŋ yaà jàwè. Wo jɔùŋ gò kùwiè è hààweɔ̀ wo Dayà jàaùŋ kùàŋ dìì esàɓù e nɔ̀uŋ nɛ̀ koɓɛ̀ guùŋ yaà faiŋ. Sèè tɛɛ̀ go yɛi weè nɔ̀ŋ, aŋ jɔ̀à nyiŋ nyàŋ henàŋ nɔ̀ŋ mààŋ aŋ jɔ̀à gò zɛ̀nɛ̀ŋ, kɛɛ nààŋ è yaà lɛ, àŋ yaà aŋ jɔ̀à nɛɛmaŋ.

¹⁵ E ɗewe gbiŋ sùà, sèè wo wùìya gò kùwìè è hààweɔ̀ ɔ̀ɔ̀ wo jaa gò kùwìè è hààweɔ̀ ɗewà wèè wo ka, wò ɓɛ̀nɛ̀ŋ kàa. Sèè tii kaaàŋ, wo wùìya kùwìè e hààweɔ̀ ɔ̀ɔ̀ wo jaa kùwìè e hààweɔ̀ wo Jisɛ̀ Kulaì sùà fè keì dìì. Wo Dayà naiŋ nyààŋ wèè naŋ nɔ̀ŋ wɔŋ nyììŋ gè jii fàa sùà.

¹⁶ Diè mùŋ naŋ ɓɛ̀nɛ̀ŋ hààwe kɛ̀ muŋ naàŋ jòèyè wò faniŋ mɔɔ̀ŋ muàŋ jɔùŋ kùwìè è hààweɔ̀, ɔ̀ɔ̀ diè mùŋ do nàŋ nyìmè kɛ̀ mùŋ do nàŋ jòèyè wo jawè mɔɔ̀ŋ, muàŋ felaa kùwìè e hààweɔ̀?

Nɔ̀ŋ nyiiŋ gèeɔ̀ sùà nààŋ Dayà naum nyààŋ lɛ

¹⁷ Nyɛ̀iŋ nyɛɛ̀ŋ bà gbiŋ kuwa wèè naŋ nɔ̀ŋ wɔŋ nyiiŋ gèeɔ̀ sùà e yìwìà e kìɛum mɛ̀ wo Kanaà naum kiɛ̀ŋ lɛ sùà, màànààŋ nɔŋ mùŋ yaà wa paŋgàà wo Dayà naum nyààŋ lɛ. Ke sàwà yɛɛ̀ mìŋ kaà koɓɛ̀ ke gbòò anyuùŋ hààwe nyàŋ maŋ saaŋ zòòlò Dayà maŋ dìì.

¹⁸ Sèè wo felaaà àŋ naŋ jàà ke kpùa tɛ wɔ̀ jaa e nyàànè Dayàa kùàŋ dìì, ɓɔ̀ wò fɛ̀ɛ̀ wèè wo gè è fèè kè kpùà jàa lii wɔ̀ŋ kɔɔuŋ nɔɔ̀ŋ. Sèè wo felaa gò jàà kè kpùaà wò jaa e nyàànè Dayàa kùàŋ dìì, ɓɔ̀ àŋ jààuŋ ɓɛìŋ kè kpùa.

¹⁹ Àŋ jàà wo kpàkòò ke kpùa, aŋ gòuŋ jàà kè kpùa, e fè è nɛ̀ŋ bà gbiŋ. E kɛnɛɛ̀ nàŋ yaà wèè eiŋ jɔ̀ɔ̀lɔ̀ ke sàwà Dayàa dìì.

²⁰ Nyɛ̀iŋ nààŋ gbiŋ sɔɔ̀ naŋ nɔ̀ŋ è ɗeweɛ̀ nɔŋ nìŋ yaà màŋ kpùnaiŋ màŋ sùà wò Dayà naiŋ nyààŋ lɛ.

²¹ Mùŋ yaà wa wo ɗo e teengaà wo Dayà naum nyààŋ lɛ? Dàngè tii, kɛɛ sèè mùŋ kuwìà e ɗewe bà wèè aum dangè maŋ ka, tòòmoò niŋ muŋ ka.

²² Wo ɗoɔ̀ wo Kanaà naŋ nyààŋ wɔ, wò yaà wo nyuùŋ gè nyààŋ diɛŋ wèè Kanaà, e ɗèwè guùŋ bi sùà, wo nyùnɔ̀ɔŋ àŋ naŋ gè nyààŋ diɛŋ wèè wo ka, yèè wo Jisɛ̀ Kulaì naum nyààŋ wɔ wò yaà wo ɗo wèè Jisɛ̀ Kulaì.

²³ Wo Dayà naiŋ bilɛ̀ŋ. Wèètii ɓɔ̀ nìŋ nɔ̀ŋ àŋ ɗo wèè nyùùŋ gbiŋ.

²⁴ Nyɛ̀iŋ nààŋ wùìyaim nyàŋ, sɔɔ̀ naŋ nɔ̀ŋ è mìèsùàguùŋ sùà koɓɛ̀ Dayài, e nɔ̀ŋ kiiɛ̀ nɔŋ nìŋ yaà wa sùà wò naiŋ nyààŋ lɛ, nɔ̀ɔìŋ yɛi nɔŋ.

Màaŋdàwè nyaàŋ dè nyuùŋ gò nɔ̀ŋ kè yɛ̀ɛ̀ nyaŋ yaà aŋ jɔ̀ùŋnèèdàà nyaŋ

²⁵ E yèɛ nìŋ naŋ sìngè nyaàiŋ dè anyuùŋ gò kùwìè àŋ jɔùŋ ɔ̀ɔ̀ felaa nyàŋ lɛ, miŋ kuwà kè sàwà è yìwìà wò Kanaà sìwè, kɛɛ mìŋ yaà tɔ̀ɔ sùà e yèɛ yaà e gòngo mɛ̀ sùà mààŋ wo yèɔ esàɓù ke nyòwò Kanaà sùà wò naŋ banè e bànè ke jii tùlia wɔ̀.

²⁶ Sèè naŋ hòà e fɛ̀ɛ̀ e kèè maŋ jii mɔ̀ɔ̀nɛŋ màŋ yaà naàŋ e teenga lɛɛ̀ sùà maŋ, kà gongò kɛ̀ è yaà tɛ̀ɛ̀ wèè wo kpàkòò nɔ̀ŋ wɔŋ kùàŋ e wùmauŋ màànààŋ wò yaà lɛ.

²⁷ Mùŋ kuwa wo jɔùŋ? Kɛ̀ ɓɔ̀ mùŋ fɛ̀ɛ̀ wèè mauŋ gè ɓie. Wo jɔùŋ fòùm sìwè? Kɛ̀ ɓɔ̀ mùŋ kamè wò bà.

²⁸ Kɛɛ sèè mùŋ ɓemàŋ wo jɔùŋ, kòò mùŋ nyɛ̀nɛ̀ŋ è kèì jùumù. Sèè wo jɔ̀ùŋ jɔ̀à bɛ̀ɛ̀ wo ɓèmè felaa, kòò wò ɓèmè è jùumù. Kɛɛ anyùùŋ nyaŋ naŋ ɓèmè jɔùŋ nyaŋ, yèè anyùùŋ nyaŋ do nàŋ ɓèmè felaa nyàŋ àŋ kuwa maŋ keì zimgbe, yèè mìŋ manaŋ kaiŋ kìlìà kùàŋ feìŋ weè miŋ.

²⁹ Nyɛ̀iŋ nààŋ wùìyaim nyàŋ, e nɛ̀ɛŋ mìŋ yaà woo lɛ̀ tiŋ tɛɛ̀, e teengaà naŋ joo lɛ̀, e gò ɓɛìŋ jìwà nɛ̀ŋ, yèè e yìwìà e teenga lɛɛ̀ sùà naàŋ, anyuùŋ kɛ̀ɛ̀nɛ̀ŋ jɔùŋ ɔ̀ɔ̀ felaa, aŋ nɔ̀ŋ mààŋ koɓɛ̀i àŋ yaà yɛi aŋ kpào le.

³⁰ Aŋ yè nyaŋ yaà gulie nyàŋ, aŋ nɔ̀ŋ mààŋ koɓɛ̀i ke nyowo fè nyiìŋ yɛi le. Aŋ yè nyaŋ yaà hiile nyàŋ, aŋ nɔ̀ŋ mààŋ koɓɛ̀i e zɔlɔ̀ fè nyiìŋ yɛi le. Aŋ yè nyaŋ naŋ dènè nɛ̀ŋ nyaŋ, aŋ nɔ̀ŋ mààŋ koɓɛ̀i aŋ kanàŋ è nɛ̀ɛŋ àŋ naŋ yɛi dènè le.

³¹ Aŋ yè nyaŋ kuwa maŋ nɛ̀ŋ ɗuunyaŋ màŋ maŋjɛ̀wɛ màŋ aŋ nɔ̀ŋ mààŋ koɓɛ̀i maŋ gò nyiŋ yɛi dìà sìwè le, E ɗuunyaŋ lɛɛ̀, e ɗeweɛ̀ è yaà naàŋ lɛ, e naàŋ ɓɛìŋ kòlò.

³² Mìŋ manaŋ wèè nyɛ̀iŋ nààŋ gbiŋ maŋ jiiiŋ màŋ ɓɔ̀ màŋ sɛɛɛ̀. Wo felaa gò kùwìè jɔunɔ̀ɔŋ wò yaà maŋ hòwò wèè e tòmò Kanaà, esaɓù kɛ̀ wò yaà fɛ̀ɛ sùà wèè wo nyɛ̀nɛ̀ŋ wo Kanaà ke jiiuŋ nɛɛ̀ŋ ke fà.

³³ Kɛɛ wo fèlàà kùwìè jɔunɔ̀ɔŋ wò yaà maŋ hòwò wèè maŋ kèì ɗuunyaŋ màŋ, esaɓù kɛ̀ wò manaŋ wo nyɛ̀nɛ̀ŋ wo jawèuŋ nɔɔ̀ŋ ke jiiuŋ nɛɛ̀ŋ ke fà.

³⁴ Kɛ̀ e kèì jiiuŋ nɛ̀ è gòònò sùà. Wo jɔùŋ gò kùwìè felaaà ɔ̀ɔ̀ wo jɔ̀ùŋ jɔ̀à bɛ̀ɛ̀ɔ wò yaà maŋ hòwò wèè e tòmò Kanaà, e kìlà wèè wo nɔ̀ŋ e nɛɛmaŋ ke kpùnauŋ nɛɛ̀ŋ sùà yèè wo jinàaŋ sùà, kɛɛ wo jɔ̀ùŋ felaaà wò yaà maŋ hòwò wèè maŋ kèì ɗuunyaŋ màŋ, esaɓù kɛ̀ wò manaŋ wo nyɛ̀nɛ̀ŋ wo faniuŋ nɔɔ̀ŋ ke jiiuŋ nɛɛ̀ŋ ke fà.

³⁵ Mìŋ yaà tɛɛ̀ wòo sùà esaɓù kɛ̀ mìŋ manaŋ kaiŋ kpuumàŋ. Miŋ fè fɛ̀ɛ sùà wèè kaiŋ hàà kè sàwà sìwè. Kɛɛ mìŋ manaŋ wèè naŋ nyɛ̀nɛ̀ŋ e yèɛ yaà e tɔ̀ɔ̀nyaàŋ, yèè wèè naŋ mànàŋ wo Kanaà e nìàŋ e nɛ̀ŋ gbiŋ.

³⁶ Sèè weè mùŋ naŋ dìkìè wo jɔ̀ùŋ jɔ̀à bɛ̀ɛ̀ hàì jɔùŋ jèì kpɔ̀nɔ̀ŋ, yèè mùŋ manaùŋ zimgbe e gòngo mɔ̀ɛ̀ gbiŋ yaà kɛ̀ sɔɔ̀ nɔŋ naŋ jɛi. Kɛ̀ manàuŋ niŋ jɛi e fè jùumù.

³⁷ Kɛɛ sèè wo felaaà aŋ gòuŋ gbààì keì gbiŋ wèè wo ɓèmè jɔùŋ è gààŋ sùà, wo bànè ke jiiuŋ nɛɛ̀ŋ wèè ɓɔ̀ wò ɓemè jɔùŋ, yèè wò yaà yɛ̀mɛ sùà e kèì jiiuŋ nɛ̀ diɛŋ tɛ̀ɛ̀ kaiŋ, yèè kɛ̀ wò kpɛ̀ɛ̀yɛ̀ ɗèwe ke jìì wuŋ biɛ̀ sùà wèè e nɛ̀ɛŋ wò nyɛnɛŋ lɛ̀, kɛ̀ wò nyɛ̀nɛ̀ŋ tɛ̀ɛ̀ wèè ɓɔ̀ wò mànàŋ jɔùŋjɔaà.

³⁸ Kɛɛ wo felaaà naŋ mɔ̀nɔ̀ŋ jɔùŋjɔaà wɔ, nyɛ̀nɛ̀ŋ tɛ̀ɛ̀, kɛɛ wo yèɔ fè ɓèmè jɔùŋ wɔ, wò nyɛ̀nɛ̀ŋ tɛ̀ɛ̀ zimgbe.

³⁹ Wo jɔ̀ùŋ felaaà wo fè nyaàŋ gè diɛuŋ wèè felaa joo è teengaà wò faiŋ yaà fuɔŋ lɛ̀, kɛɛ sèè wo fà, kɛ̀ wò nɔ̀ŋ nyaàŋ gè diɛuŋ wèè wo ɓèmè wo felaa gbiŋ wo yèɔ yaà wɔŋ nyiiŋ gèeɔ̀ sùà wò manaŋ wɔ̀. Kɛɛ sɔɔ̀ wo faiŋ nɔ̀ŋ wo nyuùŋ hààwe wo kanaà sùà.

⁴⁰ E ɗewe gbiŋ sùà, kà gongò kɛ̀ mìŋ yaà jɔ̀ɔ̀lɔ sùà wo Jìnàŋ Dayàa dìì nààŋ mìŋ naŋ woò mìàŋ wò do nàŋ nɔ̀ŋ ke jii fà zimgbe sùà sèè wò jeeà e kpào lɛ̀.