1 Kɔliìŋ 4 - WƆŊ FƐ̀Ì EBÒ SÌÀŊ DAYÀA

Aŋ kèèlà tàeɗùù Jisɛ̀ Kulaì nyaŋ

¹ Kɛ̀ɛ̀nɛɛ̀ìŋ e gòngo wèè wi mààŋ aŋ ɓɔìjɔ̀à wèè Jisɛ̀ Kulaì, aŋ yè nyaŋ àŋ naŋ kìɛ̀ŋ e tòmo wèè aŋ gɔ̀àì ke mìè gbìàŋ ke gbùnù Dayàa sùà nyaŋ.

² E kèì guùŋ nɔŋ àŋ dawà aŋ ɓɔìjɔ̀à wèè aŋ nyɛ̀nɛ̀ŋ tiiŋ nàŋ yàà wèè aŋ nɔ̀ŋ e tɔ̀ɔ̀nyaàŋ sùà koɓɛ̀ wo kana nyiŋ nɔɔ̀ŋ.

³ Miŋ fè goongo wèè naim tùàŋ màŋ nɔnɔŋ ɔ̀ɔ̀ aim jàà kò zɛ̀mɛ̀ɛ̀ŋ keì, miàŋ bi miŋ fè gbàì miàŋ bi è keì.

⁴ Miŋ gò jàà jii wèè è keì naanààŋ gbee bà eim nɔ̀ŋ, kɛɛ tii gò tɔɔ̀ kɛ̀ è keì fèìm. Wo Kanaà nɔŋ nàŋ doim nàŋ tùɔ̀ŋ maŋ nɔnɔŋ.

⁵ E wèètii ɓɔ̀ nìŋ gbaaì wò nyùùŋ gbiŋ è keì paŋgàà è tèèngà keì gbàiɛ̀ e haì. E keì gbài dìàmaàŋ do wa nàwèè nàŋ nɔ̀ŋ e tèèngà e hnàŋ Kanaà Jisɛ̀ Kulaìɛ diɛŋ. Wuŋ nàŋ do nàŋ gè maŋ gbùnù ke nyìwì maŋ, yaà esàɓù nyɛ̀nɛŋ miŋ nɛ̀ e gòngò nyuùŋkpùuŋ nyàŋ jiio sùà, wo miŋ gɔaì janjai. Kpeiŋ kɛ̀ wo Dayà do nàŋ fè wo nyùùŋ gbiŋ e tɛ̀nɛɛ̀ŋ wò kanaŋ lɛ̀.

⁶ Nyɛ̀iŋ nààŋ wùìyaim nyàŋ, esaɓùiŋ nɛ̀ sùà kà kààìŋ maŋ keì mɛɛ̀ŋ gbiŋ sùà yàwi Àpolò, è yaà tòòmo sùà yàwi bi wèè eiŋ nɔ̀ŋ e tɔ̀ɔ̀màŋseì, wèè naŋ gbèè e fàsàìɛ yaà e wòo lɛɛ̀ sùà lɛ, “Dèeìŋ maŋ sàwà kɛnɛ màŋ maŋjɛ̀wɛ.” Nyɛ̀iŋ nyɛɛ̀ŋ bà gbiŋ, ɓɔ̀ mùŋ kuwìè è ɓɛ̀ɛ̀jàa wèè wo nyùùŋ guùŋ, maŋ kɔ̀ɔ̀yɛ̀ wò bàa fɛ̀ɛ̀ sùà.

⁷ Kiìŋ kai nàŋ yaà e kiium sùà è yaà è gbà? Wo Dayà nààŋ gòum fè è nɛ̀ɛŋ gbiŋ mùŋ kuwa lɛ̀? Sèè è nɔ̀ŋ yɛi, kɛ̀ wèè kiìŋ mùŋ kɛɛ maŋ nyòngà, mààŋ koɓɛ̀i e nɛ̀ɛŋ mùŋ kuwa lɛ̀, e fè è nɛ̀ŋ kìɛ̀ŋ Dayà?

⁸ Kò nìŋ kuwa naàŋ e nɛ̀ɛŋ gbiŋ nìŋ manaŋ lɛ̀? Nàŋ naàŋ banè tɛ? Nàŋ naàŋ nɔ̀ŋ aŋ kana, jòòpɛɛ yàwi kòò è nɔ̀ìŋ yɛi? E ɗewe gbiŋ, è manaŋ weè nɔŋ naŋ nɔ̀ŋ aŋ kana wèè kɛ̀ yàwi pɛɛ eiŋ nɔ̀ŋ aŋ kana yàwi nààŋ gbiŋ koɓɛ̀ guùŋ.

⁹ È yaà guùŋ ko nɛ̀ɛ̀ŋ miìŋ mààŋ yàwi nààŋ keela tàeɗùù nyaŋ, wo Dayà naŋ sèèlè ko sìè ɓɛ̀ɛ̀pɔ̀ɔ mààŋ anyùùŋ wo Dayà naŋ kìlìè e kìtì fàa diɛŋ wèè e ɗùùnyàŋ aŋ màikà nyaŋ, yaà anyuùŋ kpùuŋ nyàŋ aŋ wi yɛmɛ̀.

¹⁰ Esàɓù Jisɛ̀ Kulaì sùà, è yààìŋ anyuùŋ zùwo, kɛɛ nìŋ gongà kɛ̀ nìŋ naŋ kɛ̀ɛ̀jii nààŋ nìŋ yaà aŋ bàiŋbà Jisɛ̀ Kulaì sùà lɛ. È naiŋ yɔkpɔ̀, kɛɛ nìŋ gongà kɛ̀ nìŋ yaà e gààŋ. Àŋ naŋ wi kɔ̀ɔ̀yɛ̀ fɛ̀ɛ̀ sùà, kɛɛ nìŋ gongà kɛ̀ àŋ kiɛ̀ìŋ e ɓɛ̀ɛ̀jàa.

¹¹ Sààngɛ lɛɛ̀ pɛɛ, è yààìŋ kùwìè e jìyè yèè ke jòòmàì yàà wì, è yààìŋ maŋ deè bila sùà, àŋ yàà wì ɓùla sùà, è yààìŋ maŋ gòlò diɛŋ e fèiŋ jɛ̀ì koɓɛ̀ guùŋ,

¹² è yɔkpɔ̀ìŋ yàwi bi wèè e tòmo nyìnga. Sèè àŋ gboà wì, e nyiŋ gbìàŋ zòòlo maŋjɛ̀wɛ. Sèè àŋ fè wì e ngàìnɓu, e niŋ kà dìì.

¹³ Sèè àŋ diɛ̀ŋ wì, e nyiŋ jàà kùàŋ dìì maŋ mìè gbòa siaŋ sùà. È yààìŋ maŋ dɛ̀ɛ̀ ko gbìli wèè e ɗuunyaŋ lɛɛ̀ mààŋ sààngɛ lɛɛ̀ sùà pɛɛ.

¹⁴ Miŋ fè sìnga sùà wèè kaiŋ sìà sàngè, mìŋ manaŋ wèè kaiŋ kpuumàŋ nyɛ̀iŋ nààŋ jɔ̀àim nyàŋ màànààŋ anyuùŋ kòmaŋ kpuumàŋ aŋ jɔ̀à nyiiŋ bi nyàŋ lɛ.

¹⁵ Sèè weè pɛɛ naŋ kùwìè anyuùŋ yɛ̀mɛ̀ e kiiŋ dììo sùà e sɔ̀ngɔ̀ tààsùùŋ zììyà maŋ nyììŋ gè anyuùŋ hààwe nyàŋ sùà, nìŋ kuwa nɔ̀ŋ wo dèda guùŋ. Maŋ nyiiŋ gèeiŋ màŋ e nɔ̀iŋ aŋ bàiŋbà Jisɛ̀ Kulaì sùà, mìŋ naŋ nɔ̀ŋ wo dèdaiŋ esaɓù kɛ̀ miàŋ naŋ hìɛ̀ŋ ke mìè gbìàŋ Ebò Siaàŋ ko nɛ̀ɛ̀ŋ niìŋ.

¹⁶ E wèètii mìŋ yààìŋ dàwe sùà wèè naŋ dè e tɔ̀ɔ̀màŋseì mɛ̀ maŋjɛ̀wɛ.

¹⁷ E wèè esaɓù lɛɛ̀, mìŋ yaà tùaŋ sùà wo Timetè ko nɛ̀ɛ̀ŋ niìŋ, wo yèɔ yaà wo jɔ̀à mànaŋ tùlìà jii miɔ̀ŋ e hààweɛ̀ sùà wɔ, ke gbòò anyuùŋ hààwè Dayà nyaŋ e tɛɛ. Wèè woo dè maŋ jiiiŋ màŋ koɓɛ̀ maŋ keì ɗì maŋ mìŋ naŋ dè maŋjɛ̀wɛ wɔŋ nyiiŋ jɛiɔ̀ ke gbòò Jisɛ̀ Kulaìɛ sùà lɛ, maŋ yè maŋ mìŋ naŋ kaà maŋ ke gbòò anyuùŋ hààwe nyàŋ gbiŋ sùà koɓɛ̀i gbiŋ mìŋ kɔ̀ lɛ.

¹⁸ Nyɛ̀iŋ nààŋ bà nyiŋ nìŋ yaà gòngo sùà kɛ̀, miŋ naàŋ ɓɛìŋ hìɛ̀ŋ jààme kò nɛ̀ɛ̀ŋ niìŋ, weètii nìŋ yaà gbùùyè maŋ nyòngà.

¹⁹ Sèè wo Dayà nyimààŋ, ɗewe gbiŋ, mìŋ do nàŋ zùmò hnàaŋ ko nɛ̀ɛ̀iŋ niìŋ kpeiŋ ka nyɛ̀nɛ̀ŋ maŋ nɔnɔŋ tùaŋ wèè miàŋ bi, nyaàiŋ dè e gààaŋ anyuùŋ maŋ nyòngà nyɛɛ̀ŋ kuwa lɛ̀, e fè nɔŋ è nɛ̀ɛŋ àŋ woà lɛ.

²⁰ E Kànà Dayàa fè nɔŋ wèè màŋ mìè gbòa sɔɔ̀ e gààŋ.

²¹ Kòòiŋ nìŋ manaŋ? Sèè mìŋ nɔ̀ŋ hinie miŋ hiàŋ ke sele ko diɛiŋ, ɔ̀ɔ̀ wo jìnàŋ mànaŋ yaà ke jii siaŋ?