1 Kɔliìŋ 3 - WƆŊ FƐ̀Ì EBÒ SÌÀŊ DAYÀA

Anyùùŋ tòmò Dayà nyaŋ

¹ Tɔɔɓaa tiŋ, nyɛ̀iŋ nààŋ wùìyaim nyàŋ, miŋ fèiŋ wa ɓɛ̀nɛ̀ŋ gbòà kɔɔ mààŋ anyuùŋ kùwìè Jìnàŋ Dayàa, mìŋ kuwa wa nɔ̀ŋ wèè kaiŋ gbòà kɔɔ mààŋ anyùùŋ nyaŋ yaà maŋ kpèè ɗuunyaŋ màŋ maŋjɛ̀wɛ nyàŋ, mààŋ aŋ jɔaa wo Jisɛ̀ Kulaì sìwè.

² Mìŋ kuwa wa nɔŋ wèè kaiŋ tìè e meekì, kɛɛ e fè nɔ̀ŋ è nɛ̀ŋje nyìnga, esaɓù kɛ̀ niŋ gò wa banebànè wèè naŋ jè nɛ̀ŋje nyìnga. Yèè sààngɛ pɛɛ kòò nìŋ bànèbànè wèè è nɛ̀ŋje nyìnga jèe,

³ esaɓù kɛ̀ kòò nìŋ yaà nɔŋ maŋ kpèè anyùùŋ ɗuunyaŋ nyàŋ màŋ maŋjɛ̀wɛ. Sèè e koo gèe yèè e nyaàŋ tàaŋ nɔ̀ìŋ e fèemàŋ, tɛɛ̀ fè tɔɔ̀ kɛ̀ kòò nìŋ yaà nɔŋ è tɔ̀ɔ̀màŋsèì anyùùŋ ɗuunyaŋ nyàŋ maŋ màŋjɛ̀wɛ?

⁴ Sèè nyɛ̀iŋ nyɛɛ̀ŋ bà guùŋ woò wààŋ, “Mìŋ yaà wo Pɔɔ̀ maŋjɛ̀wɛ,” wo bàa wààŋ, “Mìŋ yaà wo Àpolò maŋjɛ̀wɛ,” kɛ̀ niŋ fè tùwo sùà mààŋ ànyùùŋ ɗuunyaŋ nyàŋ?

⁵ Ɓòò kai, nàŋ yaà wo Àpolò? Yèè ɓòò nàŋ yaà wo Pɔɔ̀? È yaà nɔŋ aŋ ɓɔ̀ìjɔ̀à Dayà aŋ yè nyaŋ naiŋ tɔ̀ɔ̀ ke dòmaàŋ wèè naŋ kùwìè e hààweɛ̀ nyaŋ. Yàwi tìyèe, wo nyùùŋ gbiŋ yaà nyìnìè e tòmoɛ̀ wo Dayà nauŋ fè wèè wo nyɛ̀nɛ̀ŋ lɛ.

⁶ Miàŋ naŋ nyùɔ̀ŋ ke kuù kòmàaŋ, wo Àpolò naŋ gɔ̀àà ke kuù wùìyèɛ maŋ màì, kɛɛ wo Dayà naŋ nyɛ̀nɛ̀ŋ ke kuù kòmàaŋ naŋ wùìyè.

⁷ Wo nyùnɔ̀ɔŋ nyuɔŋ wɔ̀ yaà wo nyùnɔ̀ɔŋ gɔàà maŋ màì wɔ, nààŋ fè nɛ̀ɛŋ, sɔɔ̀ wo Dayà esaɓù kɛ̀ wuŋ nàŋ nyɛnɛŋ ke kùù kòmàaŋ ke wùìyà.

⁸ Wo nyùnɔ̀ɔŋ naŋ nyùɔ̀ŋ wɔ, yaà wo nyùnɔ̀ɔŋ naŋ gɔ̀àà maŋ màì wɔ, e tɛɛ gòòno gbiŋ fè nyiìŋ è fèemàŋ. Wo Dayà do nàŋ pààwà nyùùŋ gbiŋ màànààŋ wò naŋ tomo lɛ̀.

⁹ Yàwi Àpolò è yaà anyuùŋ tòmo dàwi, yèè è yaà tòòmò koɓɛ̀ guùŋ wèè Dayà, yèè nìŋ yaà mààŋ wɔŋ ɓù wèè Dayàa. E kìlà nìŋ yaà mààŋ maŋ saaŋ wèè Dayà.

¹⁰ E yìwìà e keì sìàaŋ Dayà naim kiɛ̀ŋ lɛ, mìŋ naŋ niŋ toomò yèè mìŋ naŋ nyɛ̀nɛ̀ŋ e tòmò wo kààmɔ̀ɔ̀ŋ e nyɛ̀lɛ, mìŋ naŋ tɔ̀ɔ̀tù ke saaŋ nyɛ̀lɛ, yèè wo nyùuŋ bà kòò wò yaà nyiìŋ nyilie. Wo nyùùŋ gbiŋ yɛ̀mɛ̀ muàŋ bi diɛŋ wèè e ɗeweɛ̀ mùŋ nyɛlɛ lɛ̀.

¹¹ Wo Dayà kpɛ̀ɛ̀yɛ̀ jàà wo Jisɛ̀ Kulaì wuŋ guùŋ wèè wo nɔ̀ŋ ko tɔ̀ɔ̀tù nyɛ̀lɛɛ̀, ko tɔɔtu joo fè ɓɛìŋ ɓɛ̀nɛ̀ŋ nɔ̀ɔŋ.

¹² Anyuùŋ nyɛ̀lɛ nyàŋ bà nyiŋ do nàŋ tòòmò e gòoò ɔ̀ɔ̀ e kaiŋfua ɔ̀ɔ̀ le duò kùwìè ɓaà ko tɔ̀ɔ̀tù e nyɛ̀lɛɛ̀, aŋ bà nyiŋ do nàŋ tòòmò e kùù ɔ̀ɔ̀ maŋ dɛɛ ɔ̀ɔ̀ maŋ saŋ.

¹³ Yèè àŋ do nàŋ tùɔ̀ŋ e tòmò nyùùŋ gbiŋ maŋ nɔnɔŋ e teengaà ke Ɗɔ̀ɔ̀ Jisɛ̀ Kulaìɛ do niŋ nàŋ tɔɔ̀ lɛ. Ke ɗɔɔ yii e hmɔ̀ɔ̀ŋ nàŋ do nàŋ gɔ̀ì e tòmò nyùùŋ gbiŋ sùà, e hmɔ̀ɔ̀ɛŋ do nàŋ wɔ̀ɔ̀ e tòmò nyùùŋ gbiŋ yèè e tɔ̀ɔ̀ e nɔ̀ŋ kii kɛnɛ niŋ nɛ̀.

¹⁴ Sèè e nɛ̀ɛŋ àŋ naŋ nyìlìè ko tɔ̀ɔ̀tù ke saaàŋ lɛ è folo e hmɔ̀ɔ̀ɛŋ dìì, wo nyuùŋ nyɛ̀lɛɔ̀ do nàŋ yɛ̀mɛ̀ e pààwa.

¹⁵ Kɛɛ sèè e tòmo mɔ̀ɛ̀ e hèwà, kɛ̀ maŋ niŋ gbɛ̀nɛ̀ŋ, kɛɛ muàŋ bi wo Dayà doum nàŋ joeyè, mààŋ koɓɛ̀i mùŋ folo e hmɔ̀ɔ̀ŋ sùà le.

¹⁶ Tɔɔɓaa nàŋ nyìmàŋ kɛ̀ nyɛ̀iŋ nàŋ yaà ke saaŋ zòòlò Dayàa, yèè wo Jìnàŋ Dayàa yààìŋ sùà.

¹⁷ Wo Dayà do nàŋ pɔ̀ɔ̀pɔ̀ɔ̀ wo nyùùŋ gbiŋ wo yèɔ pɔɔpɔ̀ɔ̀ ke saaŋ zòòlò Dayàa wɔ̀. Ke saaŋ zòòlò Dayàa kè yaà ke sààŋ nɛɛmaŋ, yèè nyɛ̀iŋ bi nàŋ yaà ke saaŋ zòòlouŋ nɛɛ̀ŋ.

¹⁸ Ɓɔ̀ nìŋ zuwò nyɛ̀iŋ bi. Sèè wo nyùùŋ gbiŋ naŋ gongò kɛ̀ wò naŋ kɛ̀ɛ̀jii maŋ kèì ɗuunyaŋ mɛɛ̀ŋ sùà, kɛ̀ sɔɔ̀ maŋ nyɛ̀nɛ̀ŋ zùwo wèè maŋ kɛ̀ɛ̀nɛ̀ŋ kɛ̀ɛ̀jii.

¹⁹ E nɛ̀ɛŋ e ɗuunyaŋ lɛɛ̀ naŋ jàà kùàŋ dìì wèè e nɔ̀ŋ e jiikɛ̀ɛ lɛ̀, è yaà e ɓàaɓàa ko fɛ̀ɛ̀fèìŋ Dayài. Nààŋ wɔŋ fɛ̀ì Dayàa naŋ woò lɛ, “Wo Dayà kuwìà wo nyuùŋ kɛ̀ɛ̀jiiɔ̀ ke gbaù e jiikɛ̀ɛ̀uŋ nɛ̀ sùà”,

²⁰ yèè wɔŋ fɛ̀ì Dayàa bà naŋ ɓɛìŋ woò wààŋ, “Wo Kanaà nyìmàŋ kɛ̀ e gòngò nyuùŋ kɛ̀ɛ̀jiiɔ̀ è yaà foofòò niŋ.”

²¹ Kpeiŋ kɛ̀ wo nyùùŋ gbiŋ ɓɔ̀ wò kɛ̀ɛ̀ màŋ nyòngà wèè è nɛ̀ŋ nyɛ̀nɛ̀ŋ nyuùŋkpùuŋ. Tɔɔɓaa tiŋ nyɛ̀iŋ nàŋ kanaŋ e nɛ̀ɛŋ gbiŋ.

²² E wèètii, ɓɔ̀ nìŋ kɛ̀ɛ̀ màŋ nyòùngà wèè Pɔɔ̀, ɔ̀ɔ̀ Àpolò, ɔ̀ɔ̀ Sifɔ̀, nyìmaìŋ kɛ̀ e ɗuunyaŋ lɛɛ̀, wɔŋ nyiiŋ, e fàa, e jàmaìŋ lɛɛ̀, yèè ko dòmàŋ fenìiŋ, manɛ̀ŋ mɛɛ̀ŋ gbiŋ màŋ yaà weèiŋ,

²³ kɛɛ nyɛ̀iŋ nìŋ yaà wèè Jisɛ̀ Kulaì, yèè wo Jisɛ̀ Kulaì yaà wèè Dayà.