1 Kɔliìŋ 16 - WƆŊ FƐ̀Ì EBÒ SÌÀŊ DAYÀA

Maŋ kuàŋ gbònògbono wèè e kìɛŋ koɓɛ̀ ke gbòò anyuùŋ hààwè nyàŋ

¹ Wèè nyaàiŋ dè, e yèɛ nìŋ naŋ sìngè wèè e nɛɛnɛŋ gbònò gbonoɛ̀, wèè anyuùŋ hààwe nyàŋ ko Jùdià lɛ, sɔɔ̀ naŋ nyɛ̀nɛ̀ŋ e nɛ̀ɛŋ mìŋ naŋ wòò kè gbòò anyuùŋ hààwe nyàŋ ko Gàlatìà wèè aŋ nyɛ̀nɛ̀ŋ lɛ.

² Ke ɗɔɔ jiɛ̀jiɛ̀ɛ ke wikì gbiŋ sùà, nyùùŋ gbiŋ maŋ hàà e nɛɛnɛŋ bà e ɓula, e yìwìà e yèɛ gbiŋ mùŋ naŋ yɛmɛ̀ lɛ sùà, wèè niŋ go nàŋ nyɛ̀nɛ̀ŋ màŋ kuàŋ gbònògbono kè ɗɔɔɛ̀ mìŋ hnàŋ lɛ diɛŋ.

³ Sèè mìŋ hnàŋ, mìŋ do nàŋ fè wɔŋ fɛ̀ì ke jii gbài koɓɛ̀ anyùùŋ nyaŋ nìŋ tùɔ̀ŋ maŋ nɔnɔŋ nyàŋ, kpeiŋ kɛ̀ kà nyiŋ tùàŋ àŋ kòà e kìɛiŋ nɛ̀ ko Jùlusɛ̀làm.

⁴ Sèè nìŋ gongà wèè miàŋ bi kaka, kɛ̀ yàwi nyiŋ èiŋ ka.

E ɗèweɛ̀ wo Pɔɔ̀ kuwa lɛ̀

⁵ Mìŋ do nàŋ hìɛ̀ŋ e jààme, sèè mìŋ yewe ko Mɛ̀sèdonià, mìŋ naŋ ɗewè wèè ka kɔ̀ɛ̀ ko Mɛ̀sèdonià.

⁶ Ɗɔɔ bà mìŋ doiŋ nàŋ nɔ̀ŋ gòlò e sɛ̀ɛ̀ɛ gbiŋ mààŋ, wèè naim kpuumàŋ e kàiŋ mɛ̀ sùà, wèè koɓɛ̀i gbiŋ mìŋ do ɓɛìŋ nàŋ nɔ̀ŋ kɔɔyɛ lɛ̀.

⁷ Mìŋ manaŋ wèè kaiŋ yɛmɛ̀ e nìàŋ wèè kaiŋ nɔŋ yɛmɛ̀ vàò nɔŋ ka mààŋ. Mìŋ yaà yɛ̀ɛ̀mɛ̀ ko dòmàŋ feìŋ wèè ka nɔ̀ŋ ko nɛ̀ɛ̀ŋ niìŋ wèè e teenga bà, sèè wo Kanaà nyimààŋ.

⁸ Mìŋ nɔ̀ŋ kià ko Ɛfesɔ̀ e jèèsùà ke ɗɔ̀ɔ̀ e zòòlò aŋ Juùù nyaŋ àŋ nyaaŋ Pɛnɛŋkɔ̀ɛ lɛ̀ ke haì.

⁹ Wɔŋ gbèmgbèè e tòmo gbee kià yilè, e yèɛ yaà tɛ̀ɛ̀ wèè ka nyɛ̀nɛ̀ŋ lɛ, jòòpɛɛ aŋ jooim nyàŋ naŋ gàŋ.

¹⁰ Sèè wo Timetè hnàŋ wɔŋ faàiŋ nɔɔ̀ŋ, nyɛ̀nɛìŋ niŋ e kpàŋ è kɔɔiŋ niŋ jààuŋ kùàŋ dìì, e fèfoo, wò yaà toomo wèè Kanaà màànààŋ nɔŋ mìŋ yaà toomo lɛ̀.

¹¹ Wo nyùùŋ gbiŋ ɓɔ̀ wò kɔɔyɛ̀uŋ fɛ̀ɛ̀ sùà, kɛɛ kpùùmaŋ nìuŋ e kàaiuŋ nɛ̀ sùà ke jii fàa diɛŋ, wèè wo kɛɛ̀ maŋjɛ̀wɛ ko nɛ̀ɛ̀ŋ miìŋ. Mìŋ yàaùŋ yɛ̀ɛ̀mɛ̀ dòmaŋ wèè wo kɛɛ̀ yaà aŋ wùìya nyàŋ.

¹² Wèè e nyaàiŋ dè, wo wùìya wiɔ̀ wo Àpolò. E teenga bà sùà mìŋ gbòoùŋ kɔɔ wèè woiŋ jaamè e kpùlìà aŋ wùìya nyàŋ bà nyiŋ, kɛɛ wo Dayà kòò nyìmèè wèè wo naàŋ hnàŋ, e ɗewe gbiŋ sùà, wò do nàŋ hnè sèè e ɗeweɛ̀ nɔ̀ŋ.

Maŋ mìè gbìaŋ dìàmaaŋ màŋ

¹³ Ɓɔ̀ nìŋ nɔ̀ŋ màŋjàwè, sìeìŋ gbàùŋ gbàùŋ e hààweɛ̀ sùà, kùwieìŋ jii nyingè, niŋ nyìngà sùà.

¹⁴ Nyìniaìŋ maŋ tòmoiŋ màŋ gbiŋ e mànaŋ sùà.

¹⁵ Nàŋ nyìmàŋ e kèè Sìfanà yaà ke kpoouŋ nɛɛ̀ŋ, nyiŋ nàŋ yaà aŋ wùìya jiɛ̀jiɛ̀ nyaŋ e hààweɛ̀ sùà ko Àkaayà yèè àŋ naŋ fè nyiŋ bi wèè tòòmo koɓɛ̀ anyùùŋ nɛɛmaŋ nyàŋ. Mìŋ yààìŋ pɔ̀wɔ sùà, nyɛ̀iŋ nààŋ wùìyaim nyàŋ,

¹⁶ wèè naŋ jɔ̀ɔ̀lɔ̀ aŋ sìèfeìŋ mààŋ nyɛɛ̀ŋ ko dìì, yaà anyuùŋ tòmo gbànaŋ nyàŋ gbiŋ yaà nyiìŋ tòòmò maŋjɛ̀wɛ nyàŋ.

¹⁷ Mìŋ naŋ gè zɔlɔ̀ wèè e hnàŋ Sìfanà yaà wo Fɔtùnatɔ̀, yèè wo Àkiiliɔ̀. E teengaà muŋ fè kià lɛ, nyiŋ naŋ dè e bɛ̀um,

¹⁸ yèè wɔŋ nyììŋ jinàŋ miɔ̀ŋ naŋ hawe bɔ̀tɔ̀ùŋ mààŋ maŋ jeiŋ màŋ. Anyùùŋ mààŋ nyɛɛ̀ŋ nìŋ jàà nyiìŋ jii.

¹⁹ Maŋ gbòò anyuùŋ hààwe nyàŋ ko Eesìà dawàìŋ. Wo Àkuilà yaà wo Pikà yèè ke gbòò nyuùŋ hààwe nyàŋ deenàŋ ko saaŋ nyiŋ noo lɛ̀ naiŋ tùɔ̀ŋ e zùùmo e dèè Kanaà sùà.

²⁰ Aŋ wùìya nyàŋ gbiŋ naiŋ tùɔ̀ŋ e zùùmò nɛɛmaŋ. Zùùmoìŋ aŋ dàwiiŋ nyàŋ e ɓɛ̀ɛ̀jàa titi sùà.

²¹ Wɔŋ kùàŋ miàŋ biɔ̀ naŋ tɛɛ̀ sìngè. E zùùmo e yìwìà miàim Pɔɔ̀ sìwè.

²² Wo nyùnɔ̀ɔŋ gbiŋ gò mànàŋ Kanaà wɔ, e gbòòno yaàùŋ maŋjɛ̀wɛ. Kana wiɔ̀ Jisɛ̀, hnaàŋ!

²³ Mìŋ zoolà wèè wo Kanaà Jisɛ̀ nɔ̀ŋ tɛ̀ɛ̀ ko nɛ̀ɛ̀iŋ nyiìŋ.

²⁴ E mànaŋ mɛ̀ nɔ̀iŋ maŋjɛ̀wɛ nyɛ̀iŋ nyàŋ gbiŋ nìŋ yaà ke gbòò Kulaì Jisɛ̀ sùà nyaŋ.