Miqueas 1 - Biblia Wichi

Dios lakalelhthayaj tä itiyej Samaria

¹ Häp täja Lhawuk lhämet tä ifwenho Miqueas tä lew'et Moreset häp ifwalas p'ante tä Jotam, Acaz wet Ezequías lhamel niyatejenpej häp Judá. Lhawuk ipäyne tä lewit'äy ihihila häp Samaria lhäy'e häp Jerusalén.

² Nilhokej wichi, ch'ahuyay n'oye. Tetshanay m'ak tä oyämena, amel tä lheyaype honhat. Lhawuk Dios ihi Lew'et tä T'amajchet tä ipuleye. Lham tä hiw'en m'ak tä ni'isa tä amel lewoye, wet häp tä tamenej tä tatay ahilähen.

³ Lhek yahinlä Lhawuk, inuphä tä tälho Lew'et. Nämla, t'äsichelatpe chenaj pesey.

⁴ Wet chenhas tä t'äsichela'pe wachuhihichela, hätehlat iwoye pinu lhusey tä õ'ti'pe itäj. Wet lhipey tä w'awulhchehchä, inät tä iläfwelchehen hich'esajichehena honhat.

⁵ M'ak tä tamenej tä tetso, häp Israel lhayis iwo lech'isukyaja wet tatayhlä Lhawuk. ¿Chi tälhe Israel lhayis lech'isukyaj? Tälhe t'at laka niyatey tä ihi Samaria. ¿Wet atsi tä tamenej tä Judá lhayis n'okwiyej n'ocheyälis? Häp laka niyatey tä ihi Jerusalén tä tamenej.

⁶ Wet tä mälhyejtso, wet Lhawuk yok: “Owasthihichela Samaria, oyenla hup mokwa, häpkhila t'at honhat tä õyen uvaw'etesa. Othathichela chenhas kawayhil häp tuntey tä tälho, wet on'älthichela'pe häp lefwetes.

⁷ Nilhokej n'ocheyälis wasihichela t'at, wet õ'wohla lhipeya lepeykas. Õ'wunhihola nilhokej m'ak tä wichi yen lakahaya häp atsinhay tä yen chumyaja lakain'oyaj tä ihi len'okhayajw'etes tä fwetaj ikäjyenejlhi lecheyälis häp lakeyistso. N'okain'oyajwos kaha häp tä õyenejchelhi n'ocheyälis, wet wichi letayhfwas ichäjla n'ocheyälistso häpkhilek lhamel äp yen lecheyälisa.”

Miqueas tafwlhi'pe laka honhat tsi nek t'at lewit'äyhyaj

⁸ Tä Samaria lewit'äyhyaj ihi, häp tä tamenej tä otafwlhi, tsi matche tä ofwitajayaj ihi. Nemhit owo onisäja wet nemhit owo ow'uya. Opitsaje t'at, ohätet iwoye asinäj takpej t'änlhi. Ot'änlhi t'at, ohätet iwoye wänlhäj lespej y'iphen.

⁹ Tsi häp tä Samaria lelätsek, tej chik õ'wo chaya, ilehit'a. Wet lelätsektso äp inuho Judá pajtha äp nichäte Jerusalén, honhat tä oka wichi ihi.

¹⁰ Yej fwelayhola häp Gat lheley, wet yej tafwchehchä häpkhilek lhamel niw'ena tä alhakli ihi. ¡Amel tä haw'et hupuy tä lhey Honhat Mokw'et, ch'olekwehen holo!

¹¹ ¡Safir lheley, mähen, mäyaych'oye aka honhat tä laj haw'uyisa wet han'äfwlhi tapo amejen! ¡Wichi tä ihi Saanán yikhit'alach'oye lew'et! ¡Wuj n'olhafwyhayaj tä ihi Bet-esel! ¡Ihichet'a elh chik tach'otla amehen!

¹² Wichi tä lew'et hupuy tä lhey Tapay niteläjch'oya n'och'otyaj. Tsi nämho t'at Jerusalén lepe m'ak tä ni'isa tä Lhawuk ichen.

¹³ ¡Amel tä haw'et Lakis, chumaye aka kaletas, äytej yel'atas! Ahäpehen wichi tä tatayhlä Lhawuk, letenay t'at Israel lhayis lakeyis, wet amel tä lewo ch'isukyaja Jerusalén.

¹⁴ Amel tä Judá lheley, nemhit lehanhiyeja lewoyneja chik lehoyaye Moreset-gat. Israel lhayis kaniyatey w'et t'ekhahiyela t'at wichi tä lew'et hupuy tä lhey N'otkanyaj.

¹⁵ Lhawuk yok: “Amel tä haw'et Maresa, ochenla amehen atayhfwa häpkhilek ikalh amhihen. Wet Israel lhayis tä len'ohyajay ihiche, lhamel yikhihena wet tiyäjihola chowej tä ihi Adulam tä weskatlä letayhfwas.

¹⁶ Wet amel tä Jerusalén lheley, ähäs etek w'oley tä lhen atetnekayej m'ak tä äytaj tä i'amejenpe ales tä lehumnhen. Ähäs haw'oley, äm matche tä isat häpkhilek ahäte iwoye istiwintas. Tsi häp tä õ'hänhiyela honhat elh ales, õyenla kwenkaya.”