Joel 1 - Biblia Wichi

Häp chol ikänchi yachuyaj wet nemhit õ'lanhi lhay

¹ Häp täja lesilätyaj tä Lhawuk hiw'enho p'ante häp Joel, Petuel lhäs.

² Lhek ch'ahu n'oye, amel tä ahin'ol tä thänhäy, lhäy'e nilhokej amel tä haw'et honhatna. ¿Hä lew'en m'ak wit'äyhyaj tä te iwoye täja? ¿Hä iche p'ante m'ak tä mälhyejna? Ihichet'a.

³ Is chik amel lefwenho häp ales, wet häpkhilek lhamel ifwenho leles, pajla'tha nichäte lepes lheley.

⁴ Chol tuj t'at m'ak tä nech'e, wet m'ak tä iyhäj imälhthi äp nämhen iyhäj chol wet tuj, wet noj yachuyaj.

⁵ ¡Amel tä aw'oknhas, yahinchephä! ¡Tä lehumin tä leyäyayej hat'es, änhen wet afwchehchä, tsi häp uva t'i õ'so amejen!

⁶ Tsi chol tiyäjo oka honhat, tet iwoye nifwotaj tä wujtaj'atpey wet lakhajyhayaj ihi. Wet letsotey tet iwoye häp t'owalhaj tsotey.

⁷ Wet olhamel ochumtes noj t'at, häp uva lhilechat noj, lhäy'e higos lhiley nojchehen, ts'ilakchehen, tsi õtuj häp t'ähes tä imälhewek hal'ä lhäy'e lhachal.

⁸ Afwchehchä amel, tet iwoye atsinha tä taw'uyhi wesaj tä yelaj wet y'äyenche laka'is tä ileyej honhat.

⁹ Mälhyej'attso tä lhafwyhayaj ihi sacerdotes, häp lhamel tä tach'ote Lhawuk lechumet. Tsi häp tä hiw'en tä nits'ilakhiyat hat'es lhiphaj wok yachuyaj lhayhas chik ichufwi Lhawuk Lew'et yämthilek yen t'awayhata.

¹⁰ Lewit'äy ihi yachuyajw'etes, wet honhat ichalajphä tet iwoye atsinha tesa. Trigo tatäy wet y'im uvas t'i, lhäy'e olivos t'i y'im t'at.

¹¹ Amel tä lew'en achumtes tä noj, afwchehchä tä nichät atape awit'äyhyaj, tsi noj t'at akäs wet yachuyaj tatäy.

¹² Wet uva lhiley tamchäy, lhäy'e higos lhilechat, äpte fwitsuk tamchäy, lhäy'e nilhok hal'äy tä ihi tayhi, wet wichi nemhit lakäjyaj ihi.

Joel ne'tek wichi iwo lehusey iyhäja

¹³ Sacerdotes, amel tä letach'ote oka Dios lechumet, w'uyhiche haw'uyis tä yelaj wet afwchehchä nilhok honatsi, tet iwoye m'ak chik lelät. Tsi lehanej tä aka Dios Lew'et nemhit iche häp hat'es wok yachuyaj lhay chik lhen t'awayhata.

¹⁴ Änehen wichi yämthilek lhaihute Lhawuk wet lhaichuyhathen tä ihi tä tatache. Änehen hin'ol tä thänhäy, lhäy'e nilhokej wichi tä ihi honhat, yämthilek lhaihuthiwek häp Lhawuk Dios Lew'et, wet änch'oye häp lham.

¹⁵ ¡Lhawuk laka ifwala atott'a alhoho! ¡Häpkhila lewhäy tä äytaji, tsi Lhawuk tä laj letumfwaya itonla alhoho lhawit'äyhyaj!

¹⁶ Nemhit iche m'ak chik õyen t'awayhata Lhawuk tsi õ'sonaj n'amejen, wet noj n'okäjyaj tä ihi lhaka Dios Lew'et.

¹⁷ Y'inhen häp yachuyaj lhoy tä õ'tihiche lewhay, wet wasiche n'okapuchehis, nemhit lechumet ihi, tsi tatäy yachuyaj.

¹⁸ Y'ipwethä häp w'asetas tä t'ukwe huphas tä newache, lhäy'e häp tson'atas tä laj lhäka, elhpej y'ilejlhi häp nehläs.

¹⁹ Am t'at, Iwuk, tä ot'än hach'oye, tä ow'en itäj tä iwunhomche häp hup lhäy'e nilhokej hal'äy tä ihi tayhi.

²⁰ Y'aje itshätäy tä tayhi lheley tä t'än hach'oye, tsi häp tä inätw'etes y'imche, wet itäj hip'o t'at huphas tä i'pe honhat.