Génesis 1 - Biblia Wichi

Täjp'ante nech'enyaya

¹ Tä nech'enyaya Dios yenlhi pule lhäy'e honhat.

² Wet honhat kamaj tek kalelhäj m'ak tä häpe, imälhewek tä inät t'at, wet newache isi. Wet Dios laka Espíritu wey'ä'pe inättso.

³ Wet Dios yok: –Is chik iche isi. Wet iche t'at isi.

⁴ Tä Dios hiw'en tä wuj tä is, hiw'enhat lhip tä isi newahi

⁵ wet iwo lheya Honatsi, wet lhip tä isi yen lheya Ifwala. Wet mälhyej p'antetso, iche honaj wet äp nech'e fwala, wet häp täjtso fwala tä ichun p'ante.

⁶ Wet Dios yok: –Is chik iche lakawayhi tä hiw'enhathen inät lhayis. Wet mälhyej p'antetso, iche t'at.

⁷ Dios yenlhi lakawayhi tä hätet iwoyek itsok inät tä ichufwi lhäy'e tä tumphä,

⁸ wet lakawayhitso iwo lheya Pule. Wet mälhyej p'antetso, iche honaj wet äp nech'e fwala, wet häp täjtso fwala dos.

⁹ Wet Dios yok: –Is chik weihalha t'at lew'et tä ihi häp inät tä ichufwi pule, häpkhilek n'älpe tä tamchäy. Wet mälhyej p'antetso, iche t'at.

¹⁰ Wet Dios yen lheya häp lhip tä tamchäy Honhat, wet inät tä lhaihutwek yen lheya Lewomekitaj. Tä Dios hiw'en tä wuj tä is,

^11-12 yok: –Is chik tälho honhat nilhokej hal'äy tä w'enhahiche, hon'al tä lhoy ihi lhäy'e hal'äy tä iwo lhaya. Wet mälhyej p'antetso, iche t'at nilhokej hal'äy tä w'enhahiche tä tälho honhat, hon'al tä lhoy ihi lhäy'e hal'äy tä iwo lhaya. Wet Dios hiw'en tä wuj tä is.

¹³ Wet mälhyej p'antetso, iche honaj wet äp nech'e fwala, wet häp täjtso fwala tres.

^14-16 Wet Dios yok: –Is chik iche isi lhayis tä iche pule yämthilek ihutunpe honhat, häpkhilek w'enha lhamej tä ifwala wet w'enha lhamej tä honatsi, wet äpte häpkhilek õyen n'otetnekayej lewhäy lhayis, lhäy'e ifwalas, lhäy'e nekchämis. Wet mälhyej p'antetso tä Dios yenlhi isi lhayis, elh tä wuj häp tä Ifwala, wet elh tä niwuja häpe Iwel'a. Häte Dios yenlhi katetsel.

^17-18 Wet itihi pule nilhokej isi lhayistso yämthilek ihutunpe honhat tä ifwala lhäy'e tä honatsi, wet nech'e w'enha lhamej isi wet w'enha lhamej honatsi. Wet Dios hiw'en tä wuj tä is.

¹⁹ Wet mälhyej p'antetso, iche honaj wet äp nech'e fwala, wet häp täjtso fwala cuatro.

²⁰ Wet Dios yok: –Is chik iche m'ayhay tä w'enhahiche tä ihi inät, wet is chik iche afwenchey tä wey'ähen. Wet mälhyej p'antetso, iche t'at.

²¹ Dios yenlhi m'akitas tä ihi lewomekitaj, lhäy'e nilhokej inät lheley, lhäy'e nilhokej afwenchey. Tä Dios hiw'en tä wuj tä is lhenhayna,

²² wet takäpfwayeje lhämtesna wet yok: –Is chik wujpey ales tä lewoye, häpkhilek tapoyej lewomekitas, wet äpte is chik wujpey afwenchey tä ihi honhat.

²³ Wet mälhyej p'antetso, iche honaj wet äp nech'e fwala, wet häp täjtso fwala cinco.

^24-25 Wet Dios yok: –Is chik iche itshätäy tä w'enhahiche tä ihi honhat, itshätäy tä n'oläy, lhäy'e iyhäj tä iche tayhi, lhäy'e m'ayhay tä lhaitonchehen honhat. Wet mälhyej p'antetso tä Dios yenlhi itshätäy, wet hiw'en tä wuj tä is.

²⁶ Wet Dios yok: –N'enlhi hin'o. N'atech'ayen n'amejen, hätehlat iwoye n'amel. Wet lhayenla lewuka w'ahat lhayis, lhäy'e afwenchey, lhäy'e itshätäy tä n'oläy lhäy'e iyhäj tä iche tayhi, lhäy'e m'ayhay tä lhaitonchehen honhat.

²⁷ Tä mälhyejtso, Dios yenlhi hin'o, wet itech'ayen lhamej tä häpe Dios. Yenlhi hin'o wet yenlhi atsinha,

²⁸ wet hiw'enho lakäpfwayaj tä is häp lhamel, wet yok: –Woyay alesa, a'ämay wujpey häpkhilek tapoyej honhat. A'en niyatayej honhat, wet a'en lewuka w'ahat lhayis, lhäy'e afwenchey, lhäy'e nilhokej itshätäy tä i'pe honhat.

²⁹ Tä tajyäme täjtso, wet Dios yok: –Tetshan olhämet amel. Ow'en amhohen nilhokej hal'äy tä iwo lhaya häpkhilek letufw.

³⁰ Mat häp itshätäy tä iche tayhi, lhäy'e afwenchey, lhäy'e m'ayhay tä lhaitonchehen honhat, ow'enho hon'al yämthilek lhamel tufw. Wet mälhyej p'antetso.

³¹ Wet Dios hiw'en tä wuj tä is nilhokej m'ak tä yenlhi. Wet iche honaj wet äp nech'e fwala, wet häp täjtso fwala seis.