Esdras 1 - Biblia Wichi

Rey Ciro yenlhi lhämet tä iwahnej Israel lhayis chik yäple laka honhat

¹ Häp nekchäm tä ichun tä Ciro lhayen niyatayej Persia, wet Lhawuk t'uhläk imatitche lhämet p'ante ifwenho profeta Jeremías. Wet Lhawuk iwo letichunhayaja Ciro, wet lham iwo siläta mälhewek laka honhat. Häte ichen laka cartas wet yok:

^2-3 “Ciro, Persia laka niyat, lhämet yokwe: Dios tä pule Lewuk häpe t'at wichi tä Israel lhayis laka Dios. Wet lham yenn'o lewuka nilhokej n'oniyatyajay tä ihonhatena. Wet ne'tek oyenhoplhi Lewukwe tä ihi Jerusalén tä ihi honhat tä Judá, tsi häp täjtso hupuy tä lew'et. Tä mälhyejtso, elh chik häpe amel tä ahäpe elh Dios laka wichi, is chik lham tach'ote, wet yäple Jerusalén wet yenhoplhi Lewukwe.

⁴ Wet nilhokej wichi iyhäj is chik hiw'enho lech'otyaj häp Dios laka wichitso, yämthilek yikch'oye honhatna wet yäple Jerusalén. Is chik tach'oteje lhamel häp oro wok plata, wok leläy, wok m'ak chik isej, häte m'ayhay tä yen t'awayhata häp Dios Lewukwe tä ihi Jerusalén.”

Israel lhayis yäple Jerusalén

⁵ Wet wichi tä thänhäy tä tälhe letetsel Judá lhäy'e Benjamín, lhäy'e häp sacerdotes, lhäy'e Leví lhayis, lhamel lhaiwaklhathen yämthilek yäple Jerusalén wet yenlhi Lhawuk Lewukwe. Lhawuk t'at tä ikhajyenhen lhamel yämthilek yäpil.

⁶ Wet nilhokej wichi tä lew'etfwas hich'otyeneje oro lhäy'e plata, lhäy'e leläy, lhäy'e m'ak chik isej, lhäy'e m'ayhay tä laha ihi, lhäy'e nilhokej m'ayhay tä yen t'awayhata Lhawuk.

⁷ Häp rey Nabucodonosor itonphä p'ante m'ayhay tä tälhe Lhawuk Lewukwe tä ihi Jerusalén, wet itihi p'ante lham laka dios lew'et. Mat Ciro t'uhläk yachaj,

⁸ wet häp tä ifwenho laka chinaj t'äjwo Mitrídates tä yok: –Tonphä nilhokej m'ayhay wet wo t'ufwahtesa. Wet chinaj t'äjwo iwoye, itonphä wet iwo t'ufwahtesa. Tä ileyej, wet hiw'enho Sesbasar tä häpe hin'o tä Ciro yen niyatayej Judá.

⁹ Wet iche treinta lehis tä oro, wet mil lehis tä plata, wet veintinueve tsonhates,

¹⁰ wet treinta lehis tä niwusa tä oro, wet cuatrocientos diez (410) lehis tä niwusa tä plata, lhäy'e mil m'ayhay iyhäj.

¹¹ Tä nilhok m'ayhay tä oro lhäy'e plata, iche cinco mil cuatrocientos (5.400). Nilhokej tähestso Sesbasar yachaje Jerusalén tä lham yäple, lhäy'e wichi iyhäj tä Babilonia yen p'ante lakwenkaya.