Ef 1 - Biblia Wichi

Pablo ichene len'okhayaj häp Dios leles

¹ Amtena ipuhfwas, olham Pablo ohäpe Cristo Jesús laka apóstol, wok oyok, lakachenhay tä lhamenya elh, tsi häpe t'at täjtso Dios lenech'ethayaj. Wet ochen amehen olhämetna amel tä ahäpehen Dios leles tä lheyayhi Éfeso, häp amel tä a'afwtintses tä lehänlhi Cristo Jesús.

² Is chik Dios Lhajcha lhäy'e Lhawuk Jesucristo iti amejen lep'altsenyaj lhäy'e atamsek.

Dios lakäpfwayajay tä isen tä tälh puleye

³ N'awunit Lhawuk Jesucristo laka Dios wet äp Lajcha, tsi tä y'ap'akej Cristo, Dios takäpfwayeje lhahusey nilhokej lakäpfwayajay tä isen tä tälh puleye.

⁴ Tälhe täjp'ante kamaj honhat newache, n'aitshupyen lhame, häp tä n'aisej Cristo tä y'ap'akej, yämthilek n'ahäpehen t'amajchetes wet tek n'akok'ayehen tä y'ehi tä lham itayche. Tsi Dios n'aihumnhen,

⁵ wet pajche p'ante itshupyenej n'amehen yämthilek nech'e n'ahäpehen leles, häp tä n'aisej Jesucristo. Häp täjtso Dios lenech'ethayaj tä t'up'antehläk iwoye.

⁶ Häp tä tamenej tä y'awunit t'at Dios tä takäpfwayej n'amehen lep'altsenyaj tä isilataj, häp tä n'aisej Lhäs tä lehumnek.

⁷ Tsi tä Cristo yen lhahaya lew'oyis tä nitsäyhchä, itäyhat n'amejen lhasukyajay. ¡Matche tä wuj Dios lep'altsenyaj

⁸ tä lhäy'e lhip tä itsäy lhatapehen, tä hiw'en n'amhohen nilhokej n'ohanyaj lhäy'e n'otäfwnhayaj!

^9-10 Wet itäfwnhat n'amejen lenech'ethayaj tä nin'älita, wok oyok, häp m'ak tä pajche lham eyte iwohiye, tä häpe täja: Chik nichäte lewhäy, häpkhilek yen lhetekayej Cristo nilhokej m'ayhay tä ipuleye lhäy'e tä ihonhatena.

¹¹ Dios pajche tatshupiye olhamel wet yen laka wichiya, häp tä oisej tä op'akej Cristo. Pajche p'ante tä yen tichunhayaja yämthilek iwoye täja, wet häp tä yenlhi t'at, tsi lham häpe elh tä yenlhi nilhokej m'ayhay tä yiwetej lham lenech'ethayaj.

¹² M'ak tä tamenej tä tatshupi p'ante n'oyehen, häpe tä t'uhläk olhamel tä otchunej tä oniwhayaj iyeji Cristo, ohäpehen wichi tä iwunit lham Dios tä lewujyaj ihi.

¹³ Häte amel, tä lelätayehte Dios lhämet tä matche, häp Lesilätyaj tä iwo siläta amejen afwayhyaj, lechayaye Cristo wet lep'akayej t'at häp lham. Wet Dios iti amhiche Espíritu tä T'amajchet tä pajche ifwel, tä yen tetneka amejen tä kalelhäj tä Awukay t'at häp lham.

¹⁴ Espíritu tä T'amajchettso häp tä Dios ichunkat n'amehen. Tä mälhyejtso, matche t'at tä imälhehilawek chik ihla n'amejen m'ak tä n'alewuhuyla. Tsi häp tä Dios yämla wak'alhej lechumet tä ifwayhthen häp wichi tä Lewuk, wet y'awunthila lham tä lewujyaj ihi.

Pablo y'alhyene Dios yämthilek hiw'enho lehanyaj wichi tä t'ekhaye

¹⁵ Tä mälhyejtso, tälhe täjte ohanej tä amel let'ekhayaye Lhawuk Jesús wet letiyej ahumnhayaj nilhokej Dios laka wichi,

¹⁶ olehiyejt'a tä owo graciasayej Dios. Tä owopej ot'alhyaja, otichunpej hach'oyehen,

¹⁷ yämthilek Lhawuk Jesucristo laka Dios, häp Lhajcha tä lewujyaj ihi, hiw'enhomche ahusey lehanyaj lhäy'e atäfwnhayaj, häpkhilek matche tä letäfwelayej häp lham.

¹⁸ Is chik itihiche isi ahusey, häpkhilek letäfwelayej m'ak tä häpe aniwhayaj tä lham t'änej amehen, lhäy'e lakäpfwayajay tä wuj tä isis tä ifwenhomche leles,

¹⁹ lhäy'e lakhajyhayaj tä wuj tä iti n'amejen, häp n'amel tä y'at'ekhaye. Lakhajyhayajtso inu'pe nilhokej m'ayhay, wet häp tä Dios hin'älit tä matche tä takhajay

²⁰ tä inuhatphä Cristo tä tälho n'op'itseyhay, wet itayyenhiphä lhip tä lefwomkat tä ipuleye,

²¹ wet hiw'enho yämthilek Lewuk nilhokej n'okhajyhayajay tä iche tä kaphä, lhäy'e n'owuhuy, lhäy'e n'oniyatyajay, lhäy'e n'owujyajay, lhäy'e m'ak at chik häpe tä len'ohyaj ihi, ts'ilakhit'a athana mat häte häp honhat chik nech'ayekhila.

²² Wet nilhokej m'ayhay Dios itichufwi Cristo lepach'ol, wet yen lhetekayej nilhokej Dios leles,

²³ tä hätet iwoyek häpe Cristo t'isan. Wet tä nilhokej m'ayhay isej Cristo, wet wak'alh t'at. Tä mälhyejtso, tä Dios leles lhaip'ajtej Cristo, nech'e lham t'at tä wak'alh, tsi hätet iwoye n'ot'isan tä lhaip'ajtej n'olhetek.