Cantares 1 - Biblia Wichi

¹ Häp täja Salomón letenek tä matche tä ische. Atsinha lhutsha yok:

² Ts'uhi ok'aj, tsi ahumnhayaj tä leti n'oyej matche tä is, inu'pe hat'es tä akäj.

³ Matche tä akäjche lenij m'ak tä letsäy amche. Chik oläte tä õ'wo eya, tet iwoye hal'ä lhawo lenij tä akäjche tä nekche leyalh. Häp tä tamenej tä atsinha lhutshay tä kamaj kan'och'efwasa matche tä lhamel aihumin.

⁴ Tä oalehumnek, ahäpe t'at owuk. ¡Chäjn'o, mäh n'akelchetshi, hänn'o awukwech'oya! Wichi tä iläte atsinha lhutsha lhämet, lhamel tahuyej hin'o wet yok: Olhamel wuj tä okäswethä amej, wet ihichet'ala ifwala chik olhamel op'ethatlä ahumnhayaj tä inu'pe hat'es tä akäj. Olhamel nech'e ohanej m'ak tä tamenej tä atsinhay aihumin. Atsinha lhutsha yok:

⁵ Jerusalén ka'tsinhay, olham ohäpe atsinha tä ichalaj, mat oisilataj. Ot'äj tet iwoye tsänt'ähes tä ichalas tä wichi tä Kedar lhayis yen lewukweya. Wet tet iwoye häp wesas tä isis tä õhp'oyeji ventanas tä ihi Salomón lewukwe tä leniyatyajw'et.

⁶ Yej tetshan n'oyej tä ochalaj tä nahayofw hip'o ot'äj. Oko leles tä w'enha lhamej lajcha lhamel nichuwet n'oye wet ne'tek ot'uye lelafwek tä uvas lhiley ihi. Häp tä tamenej tä nemhit ot'u lhame.

⁷ Wet am tä ahäpe ohumnek tä matche, lhek fwel n'oho, ¿Chi tä lhehi tä lechunhanwethä aläy tson'atas? ¿Wet chi tä lhehi tä lewo t'elakw'eta lhamel tä ifwala ihi lechowej? Tsi isit'ak w'et otiyäjehen akalay'is tä ichunhanwethä leläy chik ot'u amche. Wichi tä iläte atsinha lhutsha lhämet, lhamel nichulho wet yok:

⁸ ¡Aisilataj, lenu'pe atsinhay iyhäj tä isis! Chik matche chik kahanayej ihi, hän t'at len'äyij häp n'oläy tson'atas tä õyokos, wet häp tä lechunnhilawethä aläy kayla les, wet lhehiyeja tson'ataswos lewukwey tä tsänt'ähes. Hin'o mamse tä atsinha lehumnek lhämet yok:

⁹ Am ahäpe t'at ohumnek tä matche, wet wuj tä aisilataj tä leti amej amsilis lhäy'e haw'uyis tä isis, tet iwoye tä Egipto kaniyat isilatyenej lew'utey tä atsinhay tä iton laka kaletas tä laka'tshayajchal.

¹⁰ Tä hach'ote lheley ihi, nem koyhyaj tä isis hach'alos, wet lhäy'e häp haw'o tä amsilis tä isis iyej.

¹¹ Olhamel oyenhilhila amho hach'ote lheley tä oro tä õ'lesayneji plata. Nech'e atsinha lhutsha yok:

¹² Ihumnek, tä alemäyentshi tä lhehi aka silla tä pitaj, wet m'ak tä olänej ot'äj lenij tä akäjche tapoyej häp hup lech'o tä y'echufwi.

¹³ Atet iwoye hal'ä lhits'i tä lenij akäjche tä lhey mirra, tä õ'wo lemokwa tä ihi lehi tä niwuja tä imälhewek honatsi tä ihi t'at ot'aatey chowej.

¹⁴ Atet iwoye hal'ä lhawo tä lenij tä akäjche y'ajpe wichi tä ilanhi uvas tä ihi honhat lhip tä lhey Kayla Kahits'ifwik. Wet hin'o mamse yok:

¹⁵ ¡Ika'is, matche tä aisilataj! ¡Aisilataj, wet atelhoy tet iwoye hokwinhas! Wet atsinha lhutsha yok:

¹⁶ ¡Ihumnek, matche tä aisilataj! ¡Aisilataj! Wet hin'o mamse yok: ¡Hal'ä tälhes tä w'atshan häpe lhamäwet!

¹⁷ ¡Pino häpe lhawukwe sij lhiley, wet ciprés häpe lhawukwe lhetekch'o lep'ot!