Ap.Lh 1 - Biblia Wichi

Dios laka Espíritu tä õyäme tä nämla

¹ Teófilo, pajche ochen ame olhämet tä ofwel amho nilhokej m'ak tä Jesús yenlhi lhäy'e tä yen lechufwenyaja, tälhe tä iwo tesa lechumet

^2-3 yäk nichäte ifwala tä Dios ichäj puleye. Jesús pajche y'il mat yachajo tä iläy, wet lhaikalelhtho laka apóstoles tä matche t'at tä iläy. Lhamel häpehen lakachenhay tä lhamenya tä lham tatshupiye. Wet lhamel hiw'en tä lhain'ältejpej pajtha cuarenta ifwalas wet yäme Dios Niyatyaj. Wet isej Espíritu tä Dios T'amajchet tä ifwenhomche lhamel m'ak tä t'uhläk iwohiyela.

⁴ Tä kamaj iyej lhamel, wet yok: –Yej lhekayhlach'oye ayej Jerusalén, mat niwhitlä m'ak tä Ojcha pajche ifwel tä owonaj siläta amejen.

⁵ Juan ibautisaynejte inät wichi, mat chik ifwalas iyhäjfwas Dios ibautisaynhila amejen Espíritu tä T'amajchet.

Õ'chäj puleye Jesús

⁶ Wet tä lhamel lhaihutej Jesús, wet tay'ätshane wet yok: –Iwuk, ¿hä näm t'at lewhäy tä lenech'aynhi Israel lhayis niyatyaj?

⁷ Mat Jesús nichulho lhamel wet yok: –Y'ajit'a amehen yämthilek lehanayej ifwala wok lewhäy tä ts'ilak Ojcha tä Lewuk tä ikalelhät.

⁸ Mat chik Espíritu tä T'amajchet nichätla atapehen, akhajyhayaj ihlat amejen, wet lhenayhla ämetan'o tä lheyayhi Jerusalén, lhäy'e nilhok honhat tä Judea, lhäy'e Samaria, yäk lefwitay honhat lepes.

⁹ Tä iwoyetso, wet tä lhamel iyahin t'at, nech'e õ'chäjphä Jesús, wet pule hip'o'pe, wet nemhit lhamel hiw'en.

¹⁰ Wet tä kamaj tatey nilehtache tä iyahinche tä tiyäj puleye, n'äl hin'ol täkwfwas tä lew'uyis ipelas tä takasitwhäye lhamel,

¹¹ wet tahuyej wet yok: –Galilea lheley, ¿chipte tä kaleyayej tä leyahin puleye? Häp Jesús tä yikne hach'oyehen tä õ'hän puleye, äp nämla, mälhhiyejat iwoye tä amel lew'enche tä iho kaphä.

Õ'tshupyeneje Matías yämthilek yäpnho Judas Iscariote lew'et

¹² Tä tajyäme täjtso, apóstoles tälhe chenaj tä õyen lheya Oliwachat wet yäple Jerusalén: n'ow'ekyaj tä nipitaja, w'awulho un kilómetro.

¹³ Wet tä nichätho hupuy, ihoho hup lech'o elh tä tumphä tä lhamel pajche ihi. Lhameltso häpehen Pedro, Juan, Santiago, Andrés, Felipe, Tomás, Bartolomé, Mateo, lhäy'e Alfeo lhäs tä lhey Santiago, lhäy'e elh Santiago lhäs tä lhey Judas, lhäy'e Simón tä häpe p'ante elh hin'ol tä tatayhlä Romano lhayis tä lhayen niyateyayej Judío lhayis.

¹⁴ Wet nilhokej lhamel lhaihutpejwek, lhäy'e Jesús lech'inhis, lhäy'e lako María, lhäy'e atsinhay iyhäj, yämthilek iwo let'alhyaja.

¹⁵ Wet iche ifwala p'ante tä wichi tä t'ekhaye Jesús lhaihutwek, ciento veinte (120) lhamel. Wet Pedro takasit wet tahuyej lhamel tä yok:

^16-17 –Ipuhfwas, iwohiyet'ak lhaknäma matche Espíritu tä Dios T'amajchet lhämet p'ante tälhe David, häp lhip tä ihi Lehi tä yäme t'at Judas. Lham häpe naji n'amel lhat'unfwa tä Jesús yen ch'otfwayayej Dios lechumet, mat tä paj wet lhayen lhetekayej wichi tä yike Jesús tä itsoklhi.

¹⁸ (Lhamelna hiw'enho chinaj t'äj tä laha häp m'ak tä ni'isa tä iwoyena, wet lham ichäjej n'olafwek. Mat tä paj lew'o tiji honhat tä nichätchä, wet hikw'esche wet lakäsley nitsäy.

¹⁹ Tä Jerusalén lheley ihanej täjtso, yen lheya Hacéldama, wok oyok, W'oyisw'et, häp n'olafwektso.)

²⁰ Wet Pedro äp yok: –Häp Lhawuk lhämet lhip tä otichunyen amchehen ihi t'at Salmos tä yok: “Is chik ts'anis t'at lew'et, wet äp nehit katsik ihi.” Wet lhip elh yok: “Is chik elh tachuma lechumet.”

²¹ “Wet ikana hin'ol tä in'amejen nilhok lewhäy tä Lhawuk Jesús in'amejen,

²² tälhe tä Juan ibautisaynhen wichi yäk ifwalanaj õ'chäjphä Lhawuk. Wet oyok, t'uhawetej chik elh lhamel lhaip'ajtej n'amel yämthilek yenpej lhämetayej wichi tä Jesús inuphä tä tälho n'op'itseyhay.”

²³ Tä mälhyejtso, iche täkwfwas hin'ol tä lhamel itetshan, elh lhey José, tä lheyes iyhäj Barsabás wet Justo, wet hin'o elh lhey Matías.

²⁴ Wet iyhäj iwo let'alhyaja tä yok: –Iwuk, am tä letäfwelej nilhokej wichi lehusey. Lhek päyen n'oyehen elh lhamelna tä am letshupyene,

²⁵ häpkhilek tachuma apóstol lechumet tä Judas iwom. Tsi Judas ihoye lew'et tä t'uhawetej elh tä iwoye m'ak tä ni'isa.

²⁶ Tä lhamel ileyej tä iwo let'alhyaja, ilesayenpe tunte lhipey hin'ol täkwfwastso lheyes, wet ithatho lehi, wet isichätlhi, wet elh tä ichun tä nichätchä yiwete Matías. Tä mälhyejtso, lham nech'e hip'akej t'at Jesús laka apóstoles tä ihi once.