2~Tes 1 - Biblia Wichi

Pablo ichene len'okhayaj häp Dios leles

¹ Amtena ipuhfwas tä Dios aleles tä lheyayhi hupuy tä Tesalónica. Olham Pablo, lhäy'e Silvano, lhäy'e Timoteo, olhamel ochen amehen olhämetna, häp amel tä lep'akayej t'at Dios Lhajcha lhäy'e Lhawuk Jesucristo.

² Is che Dios Lhajcha lhäy'e Lhawuk Jesucristo iti amejen lep'altsenyaj lhäy'e atamsek.

Che Cristo tapil honhatena, Dios itasnhila wichi tä lesukyajay ihi

³ Ipuhfwas, t'uhawetej t'at tä olhamel owopej graciasayej Dios atapehen. Is alhoho täjtso, tsi achayaj wuj tä lhaichihelitpa wet lhäy'epej lhip ahumnhayaj tä elhpej amel letiyej aiyhäj.

⁴ Tä mälhyejtso, olhamel okäjlhi amejen tä oyenpej lhämeta amel tä oiyej Dios leles iyhäj. Oyäme t'at achayaj, lhäy'e tä letujlhache t'at, tej tä athapej han'äyij wet wichi itipej amejen laka'tshayaj.

⁵ Täjtso hin'älit tä is alhoho Dios lakalelhthayaj, häpkhilek amel at'uhawetej che letiyäjo Leniyatyaj tä lewo ateläythayaja'pe athana.

⁶ Häte t'uhawetej che Dios yachaje leteläythayaj häp lhamel tä hiw'en amhohen ateläythayaj.

⁷ Che näm ifwala tä Lhawuk Jesús lhain'älit tä tälh puleye, wet amel alet'upthihenahlä ateläythayajay, mälhhiyeja iwoye olhamel. Tsi lham nekhichela laka ángeles tä lewujyaj ihi, lhäy'e itäj lhal tä lak'e,

⁸ yämlek iwo hayahlä wichi tä nitiya lhamhi Dios wet nitch'ahuyaye Lesilätyaj tä yäme Lhawuk Jesús.

^9-10 Che nichäthiyela ifwalatso tä Lhawuk näm, itasnhila wichi tä mälhyejentso, wet itihiyeja kanhihlä häp lham lhäy'e lewujyaj tä isi, wet letäyhyaj yämlek tiyäj'attsiy. Matkat häp Dios leles, lhamel tä ichaye, t'iselthiyeja lesilatyaj wet iwunthila häp lham. Wet amel lhehiyeja lhamel, tsi pajche lechaye t'at olhamel osilätyaj tä ofwelte amhohen.

¹¹ Häp tä tamenej tä olhamel oy'alhyenpej amehen lhaka Dios, ot'alhepej yämlek ayen häpeya iyhäj tä t'uhawetej tä lham t'änte amehen. Wet is che hich'otyeneje lakhajyhayaj nilhokej m'ak tä ischehen tä let'uhläk lewoye, lhäy'e achumtes tä isen tä tälhe achayaj.

¹² Che mälhyejtso, wichi iwunthila Lhawuk Jesús wet lham aiwunthila, häp tä isej lep'altsenyaj tä tälhe lhaka Dios lhäy'e Lhawuk Jesucristo.