1~Cor 1 - Biblia Wichi

Pablo ichene len'okhayaj häp Dios leles

^1-2 Amtena ipuhfwas tä Dios aleles tä haw'et hupuy tä Corinto, olham Pablo, lhäy'e lhapuhfwa Sóstenes, ochen amehen olhämetna. Häpet olham, Dios t'änejte n'oye lham lenech'ethayaj wet yen n'oye Cristo Jesús laka apóstol, wok oyok, lakachenhay tä lhamenya elh. Wet amel ahäpehen iyhäj tä Dios t'änte amehen, lhäy'e nilhokej leles iyhäj tä i'pe honhat tä n'okwiyej Lhawuk Jesucristo. Wet ayen t'amajchetesa tä lep'akayej lham Cristo Jesús, häp n'amel Lhawuk wet äp lhamel Lewuk.

³ Is chik Dios Lhajcha lhäy'e Lhawuk Jesucristo iti amejen lep'altsenyaj lhäy'e atamsek.

Dios itiyej lakäpfwayajay tä isen wichi, häp tä isej Cristo

⁴ Olehiyejt'a tä owopej graciasayej Dios atapehen, lhäy'e lham lep'altsenyaj tä iti amejen häp tä isej Cristo Jesús.

⁵ Tsi tä lep'akayej Cristo, wuj lakäpfwayajay tä isen tä Dios itiyejen ahusey, häp tä i'amejen ahanyaj tä matche wet äp lehanayej t'at tä lhen ämeta Dios lhämet.

⁶ Täjtso hin'älit tä n'osilätyaj tä yäme Cristo, iwo lefwettsila tä ihi ahusey.

⁷ Tä mälhyejtso, tek tatäyej ahusey Dios lakäpfwayaj elh chik häpe, tä lenihihlä ifwala chik n'äl Lhawuk Jesucristo.

⁸ Dios t'amajila amejen yämthilek kaleyayej pajla'tha lepes, häpkhilek nehit katsik y'ithat amejen ates chik häpe chik Lhawuk Jesucristo tapil alhoho.

⁹ Dios imatitchepej m'ak tä ifwenho leles, wet lham t'at tä t'än amehen yämthilek lep'akayej Lhäs Jesucristo, Lhawuk.

Dios leles iyhäjpej w'enha lhamej letichunhayajay

¹⁰ Ipuhfwas, Lhawuk Jesucristo lhämet n'oyej. Wuj tä olhaip'altsen amehen yämthilek elh weihalhapej lhämet hätet iwoye m'ak tä elh yäme. Isit'ak alew'enhathen, mat is chik aw'awulhchä, wet w'awulhchä atichunhayajay lhäy'e ahusey.

¹¹ Ofwel amhohen täjtso, ipuhfwas, tsi iche elhpej tä tälhe atsinha Cloe lew'et tä ihanhatnaj n'oyej tä amel letataywekpa.

¹² Oyäme tä elhpej amel yok, “Olham ohän Pablo”, wet elh yok, “Ohän Apolos”, wet elh yok, “Ohän Pedro”, wet elh yok, “Ohän Cristo.”

¹³ ¿Atsi m'ak tä lewoyaye? ¿Hä Cristo w'enhache lhamej? ¿Hä lefwetaj olham Pablo p'ante tä õhp'ajtej cruz atapehen? ¿Hä Pablo lhey tä alebautisaynej p'ante?

¹⁴ Oyok, ow'enho gracias Dios tsi niwohit elh amel chik olham tä obautisayen, tajlhama Crispo lhäy'e Gayo,

¹⁵ wet häp tä nehit katsik ihanej iwoyneje lhämet chik yok, “Õ'bautisayente n'oyej Pablo lhey.”

¹⁶ Nech'e ohusekch'oye tä häte obautisaynhente Estéfanas lhäy'e lew'et lheley, mat ohanhiyejt'a chik obautisayen p'ante elh chik häpe.

¹⁷ Tsi Cristo ichen n'oye wichi yämthilek oyen silätyaja Dios Silätyaj tä Is, mat tek häpe yämthilek obautisaynhen. Wet tä oyämlhi, tek olhayen häpeya elh tä ihan m'akej, häpkhilek wichi nitäfwelej laha lhäy'e lakhajyhayaj häp Cristo t'ilek tä i'pe cruz.

Cristo häp tä N'okhajyhayaj lhäy'e N'ohanyaj tä tälhe Dios

¹⁸ Häp wichi tä ihoye letäyhyaj, lhamel fwetaj lajit lahaya Dios lhämet tä yämeje Cristo t'ilek tä i'pe cruz. Mat n'amel tä y'ahoye lhafwayhyaj, y'ahanej tä Dios lhämettso häpe t'at lham lakhajyhayaj.

¹⁹ Mälhyej N'olesaynek p'ante yok: “Otäyhthila lehanyaj häp wichi tä ihanche m'akejen, wet tek owohla lahaya letäfwnhayaj häp lhamel tä atäfwnhatses.”

²⁰ Tä mälhyejtso, ¿chiwoye ahantsaj, lhäy'e elh tä lhayen lewoya n'ochufwenyajay, lhäy'e elh tä hin'älit lehanyaj tä yen lhämeta m'ayhay tä ihonhatena? Lhek yahinya, ¡Dios iwelanhat wet häpe t'at m'ak tä lajit lahaya häp hin'ol lehanyaj tä ihi honhatna!

²¹ Tsi Dios tä lehanyaj ihi ihuminhichet'a chik wichi isej lhamel lehanyaj yämthilek nitäfwelej. Mat ihumin chik lhamel tä iwo lechayaja isej lham lhämet yämthilek tafwayhen, tej tä wichi iyhäj fwetaj lajit lahaya lhämettso.

²² Häp Judío lhayis t'alhch'oyek hiw'en n'otetnhay tä iselkathen lhamel, wet Griego lhayis iwo yiya m'ak tä tälho n'ohanyaj,

²³ mat häp olhamel oyen silätyaja N'ofwayhthi tä Dios Chenek tä õhp'ajtej cruz. Judío lhayis yäme tä täjtso ikänchi letichunhayaj, wet iyhäj wichi yok, “¡Laha ihihit'a täjtso!”

²⁴ Mat n'amel tä Dios t'än n'amehen, tej chik Judío lhayis wok Griego lhayis at thayej, y'ahanej t'at tä Dios Chenekna häpe n'okhajyhayaj lhäy'e n'ohanyaj tä tälhe Dios.

²⁵ Tsi m'ak tä iyej Dios, tä mälhyej chik lajit lahaya, inu'pe nilhokej hin'ol lehanyaj. Wet äp m'ak tä iyej Dios, tä mälhyej chik lajit lakhajyhayaja, inu'pe nilhokej hin'ol lakhajyhayaj.

Cristo häpe elh tä ihanhat n'amejen m'ayek

²⁶ Ipuhfwas, lhek tichunache täjte Dios t'än amehen. Wujit'a'pe amel tä lehanche m'akejen, wet äp wujit'a'pe amel tä han'ohyajay ihi, wet äp wujit'a'pe amel tä ahäpehen wichi tä hiw'en m'ayek leles.

²⁷ Mat tä Dios tatshupiye iyhäj tä wichi yäme tä nhanache m'akejen, häpkhilek hin'äfwlhathen lhamel tä ihanche m'akejen. Wet tä äp tatshupiye iyhäj tä wichi yäme tä nitkhajayahen, häpkhilek hin'äfwlhathen lhamel tä takhajayhen.

²⁸ Dios tatshupiye t'at iyhäj tä wichi yäme tä lajit lahaya, w'et m'ayhayhas t'at, wok oyok, häp iyhäj tä hich'atej tä niwohit m'ak chik häpe, häpkhilek itäyhat lhamel tä wichi yäme tä laha ihi.

²⁹ Wet häp tä mälhyejtso, nehit katsik fwetaj lhaichäjlhi tä ihi tä Dios tatache.

³⁰ Mat oyok, Dios lham t'at tä hip'ajtit amejen häp Cristo Jesús, tä Dios yen häpeya elh tä ihanhat n'amejen m'ayek. Wet häpe t'at Cristo tä hi'isyen n'amehen Dios, lhäy'e tä n'ayen häpeya Dios t'amajchetes, wet äp lhayen lahaya p'ante yämthilek y'atfwayhen.

³¹ Tä mälhyejtso, n'en lhatichunhayaja Dios lhämet tä ihi Lehi tä yok, “Chik elh t'uhläk lhaiwujyen, is tä lhaiwujyenej Lhawuk.”