TITO 1 - Ko te Tohi Tapu i te fakauvea

Fakaalofa

¹ Ko au Paulo, tagata faifekau a te Atua, pea ko te apositolo a Sesu-Kilisito o uhiga mo te tui a te kau filifiliia a te Atua, pea mo te iloi o te mooni ae e mulimuli ki te lotu,

² ae e fakatafito ki te falala ki te mauli heegata, ae nee fakapapau i mua o te u sekulo fuli e te Atua ae e mole loi,

³ pea nee ina fakaha tana folafola i tona temi aki te akonaki ae nee tuku mai kia au, o mulimuli ki te fakatotonu a te Atua totatou Fakamauli,

⁴ kia Tito, ko taku fanau totonu i te tui ae e ta fakatahi ai: Ko te kalasia mo te tokalelei ke foaki atu kia koe e te Atua te Tamai pea mo Sesu-Kilisito totatou Fakamauli!

Kavega a Tito ki te Ekelesia o Kelete

⁵ Nee au tuku koe i Kelete, koteuhi ke ke fakatokatoka te mea nee kei toe ke fakatokatoka, pea ke ke fakanofo, o mulimuli ki aku fakatotonu, he u matuatua i te kolo takitahi.

⁶ Ko te tagata matuatua e tonu ko he tahi e mole mau he mea o uhiga mo ia; e tonu ke ohoana ia mo he fafine e tahi, pea ko ana fanau e tonu ke natou tui, pea ke aua naa valoki natou i te mauli fakalialia pee ko te logogataa.

⁷ Koteuhi e tonu te epikopo ke hee mele, o hage ko he tagata taupau koloa a te Atua; e mole tonu ke vikitonu, mo hoko ita, mo inu kava, mo lagake, mo manumanu ki te paaga uli,

⁸ kae ke tali kaiga lelei ia, pea ke kaumea ia ia mo te u tagata lelei, ke fakapotopoto, ke faitotonu, ke maonioni, ke agalolomi,

⁹ pea ke pipiki ia ki te folafola mooni o hage ko te akonaki nee ina tali, koteuhi ke mafai foki tana fakamalohii o natou ake ae aki te akonaki mooni pea mo tana fakaha te u hala a natou e fakafehagai.

¹⁰ Koteuhi e kaugamalie natou, tafito i te kau silikosisio nee tafoki, ae e agatuu, pea e natou fakahehe te hahai aki anatou palalau fakavale.

¹¹ E tonu ke mapunui onatou gutu, he natou kakaai he u famili katoa, pea e natou akonaki te u mea e mole tonu, uhi ko tanatou fia mau he totogi fakaufiufi.

¹² Ko he tahi o natou, ko tonatou polofeta totonu, nee ina ui: Kau Kelete gutu loi tuumau, kau manu fekai, kau fatu pikoelo.

¹³ E mooni te fakamooni aia. Koia ke ke valoki fakamalohii natou, koteuhi ke natou mau he tui e maa,

¹⁴ pea ke aua naa natou pipiki ki te u fagana fakasutea mo te u fakatotonu fakatagata ae e mamao mai te mooni.

¹⁵ E maa te u mea fuli kia natou e maa; kae e mole maa he mea kia natou e uli pea e mole tui; kua uli tatau pe onatou atamai mo onatou loto.

¹⁶ E natou ui e natou iloi te Atua, kae e natou fakafisi kia ia i anatou gaue, ko he hahai fakalialia, mo talagataa, e mole pe natou fealagia he gaue lelei e tahi.