TANIELA 1 - Ko te Tohi Tapu i te fakauvea

Taniela mo ona kaumea

¹ I te tau tolu o te hau ko Sosakimi, hau o Suta, nee hau leva ia Nepukatenesale, hau o Papilone, o taui Selusalemi.

² Nee tuku leva e te Aliki ki ona nima ia Sosakimi, hau o Suta, mo he potu o te u mea gaue o te fale tapu o te Atua. Nee ave leva e Nepukatenesale te u mea gaue ki te fenua o Sinea, ki te fale o tona atua, pea nee ina tuku leva natou ki te fale koloa o tona atua.

³ Nee tuku leva e te hau te fakatotonu kia Asipenasi, pule o te kau enuke, ke aumai ni ihi i te u fanau o Iselaele, ae e kau i te hakoga fakahau pee ko ni famili aliki,

⁴ ni tama tupulaga hee mele fakasino, mo matalelei, mo popoto, mo atamai, pea nee lelei tonatou akoi, pea nee feala ke gaue i te fale o te hau, pea ke ako anai kia natou te u tohi mo te lea a te kau Kaletea.

⁵ Nee fakatotonu leva e te hau ke tuku kia natou i te aho taki tahi he vaega mai te u meakai o tona laupapa pea mo te vino ae e ina inu. Nee loto te hau ke ako natou i ni tau e tolu. I te osi o te u tau aia, e natou ulu anai o tauhi ki te hau.

⁶ Nee nofo ia natou, mai te u foha o Suta, ia Taniela, mo Anania, mo Misaele pea mo Asalia.

⁷ Nee foaki leva e te pule o te kau Enuke ni higoa kia natou, kia Taniela te higoa ko Pelesatesale, kia Anania ae ko Satalake, kia Misaele ae ko Mesake, kia Asalia ae ko Apeteneko.

⁸ Nee fakapapau leva ia Taniela i tona loto ke aua naa ulihi ia ia e te u meakai a te hau mo te vino ae e ina inu, pea nee ina kolekole leva ki te pule o te kau enuke ke aua naa fakamaua kia ia ke ulihi ia ia.

⁹ Nee fakatupu leva e te Atua i te loto o te pule o te kau enuke he loto lelei mo he ofa kia Taniela.

¹⁰ Pea nee ui leva e te pule o te kau enuke kia Taniela: E au mataku ki toku aliki hau, ae nee ina fakatotonu te mea ae e tonu ke kotou kai mo inu; kotea e sio ai anai ia ia ki okotou mata e mamahi age i te u mata o te u tupulaga age ae e tau tahi mo koutou; e koutou tuku anai toku ulu ki te mate ia mua o te hau.

¹¹ Pea nee ui leva e Taniela ki te tagata ae nee tuku ki ai e te pule o te kau enuke ke tokaga kia Taniela, mo Anania, mo Misaele pea mo Asalia:

¹² Ke ke ahiahii au tagata faifekau i ni aho e hogofulu, pea ke foaki mai kia matou ni magisi atea ke matou kai pea mo he vai atea ke matou inu;

¹³ pea e ke sioi anai omatou mata mo te u mata o te kau tupulaga ae e natou kai ki te u meakai a te hau, pea e ke fai anai ki au tagata faifekau o mulimuli ki te mea ae e ke sio anai ki ai.

¹⁴ Nee ina tali leva tanatou kole, pea nee ina ahiahii leva natou i ni aho e hogofulu.

¹⁵ I te osi o te u aho e hogofulu, nee natou mata fiafia age mo sisino age i te kau tupulaga fuli ae nee kai ki te u meakai a te hau.

¹⁶ Pea nee ave leva e te tagata ae nee tauhi kia natou te u meakai mo te vino ae nee tonu ke foaki kia natou, kae nee ina foaki leva kia natou ni magisi atea.

¹⁷ Nee foaki leva e te Atua ki te u tupulaga aia e toko fa te sienisia, mo te atamai i te u faahiga tohi fuli, pea mo te poto; pea nee fakamatala leva e Taniela te u sio fuli mo te u moemisi fuli.

¹⁸ I te osi o te temi ae nee fakatuutuu e te hau ke avake ai natou kia ia, nee ave leva natou e te pule o te kau enuke kia mua o Nepukatenesale.

¹⁹ Nee palalau leva te hau mo natou; pea nee mole pe he tahi i te kau tupulaga aia, nee tatau mo Taniela, mo Anania, mo Misaele pea mo Asalia. Nee natou ulu leva o tauhi ki te hau.

²⁰ I te u mea fuli ae nee aoga ki ai he poto mo he atamai, pea mo te u mea fuli ae nee fakafehui natou ki ai e te hau, nee mau leva natou e te hau e natou popoto lahi age o tua hogofulu i te kau gaohi mea fakatalakitupua mo te kau sivi o te temi, ae nee mau i tona puleaga katoa.

²¹ Nee fena leva te mauli o Taniela o kaku ki te uluaki tau o te hau ko Silusi.