SOSUE 1 - Ko te Tohi Tapu i te fakauvea

Fetogi o Moisese e Sosue

¹ I te osi o te mate o Moisese, tagata faifekau a te Eteleno, nee ui leva e te Eteleno kia Sosue, foha o Nune, tagata faifekau a Moisese:

² Kua mate taku tagata faifekau ko Moisese. I te aho nei, tuu ki oluga o fakalaka i te Solotane aeni, ia koe mo te hahai katoa aeni, o ulu ki te fenua ae e au foaki ki te u fanau a Iselaele.

³ Ko te u kogamea fuli e tuu ki ai okotou alofi vae, e au foaki ia ia kia koutou, o hage ko taku palalau kia Moisese.

⁴ E kamata anai tokotou fenua mai te toafa, i te saute, o kaku ki te u mouga o Lipane, i te noleto, pea mai te vaitafe lahi o te Eufalate, i te esite, o alu i te fenua katoa o te kau Eti, o kaku ki te tai lahi ko te Metitelanea, i te uesite.

⁵ E mole tuu anai he tahi i ou mua, i te temi o tou mauli. E au nofo anai mo koe, o hage ko taku nofo mo Moisese; e mole au tuku noa anai ia koe, e mole au siaki anai ia koe.

⁶ Ke ke fakamalohi mo ke loto toa, koteuhi ko koe ae e ke ave anai te hahai aeni ki te fenua ae nee au fakapapau ki anatou tamai ke foaki kia natou.

⁷ Kae kehe pe ke ke fakamalohi, mo ke loto toa lahi, o agatonu ki te lao katoa ae nee au tuku kia Moisese, taku tagata faifekau; e mole ke maliu ki te fahai matau pee ko te faahi hema, o tupu ke ke manuia i te u kogamea fuli e ke alu anai ki ai.

⁸ Ke aua naa mamao mai tou gutu te tohi aeni o te lao; kae ke ke metitasio ki ai i te aho mo te pouli, o tupu ke ke agatonu ki te u mea fuli e tuu i ai; koteuhi e ke manuia anai i ou ala, koia e ke poto ai anai.

⁹ Pe nee mole au tuku atu kia koe te fakatotonu aeni: Ke ke fakamalohi mo ke loto toa? Aua naa ke mataku, pea aua naa ke loto vaivai, koteuhi ko te Eteleno, tou Atua, e nofo mo koe i te u kogamea fuli ae e ke alu ai anai.

¹⁰ Nee tuku leva e Sosue te fakatotonu aeni ki te kau ofisa o te hahai:

¹¹ Koutou folii te nofoaga, pea koeni te mea e kotou fakatotonu anai ki te hahai: E kotou teuteui anai ni meakai, koteuhi ka osi anai ni aho e tolu, e kotou fakalaka anai i te Solotane aeni, o olo o taui te fenua ae nee foaki atu kia koutou e te Eteleno, tokotou Atua.

¹² Nee ui leva e Sosue ki te kau Lupeni, mo te kau Kate pea mo te vaelua o te kau Manase:

¹³ Ke kotou manatui te mea ae nee fakatotonu atu kia koutou e Moisese, tagata faifekau a te Eteleno i te aho ae nee ina ui ai: Kua foaki atu e te Eteleno, tokotou Atua, kia koutou te malolo, pea kua ina foaki atu kia koutou te fenua aeni.

¹⁴ E nonofo anai akotou hahai fafine, mo akotou fanau liliki pea mo akotou faga manu i te fenua aeni nee tuku atu kia koutou e Moisese i te faahi aeni o te Solotane. Kae ko koutou fuli, ae ko te u tagata tau loto toa, e kotou fakalaka anai mo akotou mahafu ia mua o okotou tehina, pea e kotou tokoni anai kia natou,

¹⁵ o kaku ki te temi e tuku ai anai e te Eteleno te malolo ki okotou tehina o hage ko koutou, pea ke natou mau foki te fenua ae e foaki anai kia natou e te Eteleno, tokotou Atua. Ka osi anai pea kotou liliu mai leva o nonofo i te fenua ae nee tuku atu kia koutou e Moisese, tagata faifekau a te Eteleno, i te faahi aeni o te Solotane, i te hopoaga o te laa.

¹⁶ Nee natou tali leva kia Sosue, o ui: E matou fai anai te u mea fuli ae nee ke tuku mai kia matou, pea e matou olo anai ki te u kogamea fuli ae e ke fekaui anai matou ki ai.

¹⁷ E matou fakalogo atu anai kia koe i te u mea fuli, o hage ko tamatou fakalogo kia Moisese. Kehe pe ke nofo mo koe te Eteleno, tou Atua, o hage ko tana nofo mo Moisese!

¹⁸ E tauteai anai ki te mate te u tagata fuli e fakatutuu anai ki tau lagiaki, pea e mole fakalogo anai ki te u mea fuli ae e ke fakatotonu anai ki ai. Kehe pe ke ke fakamalohi, pea mo ke loto toa!