SOPO 1 - Ko te Tohi Tapu i te fakauvea

Tauhi lelei a Sopo ki te Atua

¹ Nee i ai he tagata i te fenua ko Usi ae nee higoa ko Sopo. Pea nee haohaoa mo agatonu te tagata aia; pea nee mataku ia ia ki te Atua, pea nee fakamamao ia ia mai te kovi.

² Nee tupu leva kia ia ni foha e toko fitu mo ni ofafine e toko tolu.

³ Nee ina mau ni ovi fafine e fitu afe, mo ni kamelo e afe, mo ni hoai pipi tagata e nimageau, mo ni asino fafine e nimageau, mo ni tagata faifekau e kaugamalie. Pea nee mauhiga toko tahi te tagata aia i te u tagata fuli o te potu esite.

⁴ Nee tau olo ona foha ki te api o ae mo ae ia natou, o fai i ai he kai. Pea nee natou fakaafe onatou tuagaane e toko tolu ke kakai mo iinu mo natou.

⁵ Pea ka osi te u aho fakafiafia, e fekau leva e Sopo ke omai kia ia ona foha, ke fakamaa natou; e tuu ake leva ia ia i te mafoata o momoli ni failaulau o fakatatau ki te lahi o tana fanau; koteuhi nee ui e Sopo: E feala ke agahala oku foha pea ke natou palalau hala ki te Atua i onatou loto. Koena te fai mahani a Sopo.

Tukuga kovii o Sopo e Satana

⁶ Kae i he aho, nee omai leva te u foha o te Atua kia mua o te Eteleno, pea nee hau foki ia Satana i te lotomalie o natou.

⁷ Nee ui leva e te Eteleno kia Satana: Pe e ke hau mai fea? Pea nee tali leva e Satana ki te Eteleno: Mai taku folii te kele, o evaeva i ai.

⁸ Nee ui leva e te Eteleno kia Satana: Pe kua ke tokagai taku tagata faifekau ko Sopo? E mole tatau he tahi mo ia i te kele; ko he tagata haohaoa ia mo agatonu, mo mataku ki te Atua, pea mo fakamamao mai te kovi.

⁹ Pea nee tali leva e Satana ki te Eteleno: Pe e hoi ofa noa pe ia Sopo ki te Atua?

¹⁰ Pe e mole tupu ko tau puipui ia ia, mo tona famili, pea mo ana mea fuli? Kua ke fakamanuia te gaue o ona nima, pea kua uufi e ana faga manu te fenua.

¹¹ Kae ke faoi tou nima, o taai ana mea fuli, pea e au iloi papau, e laukovi anai ia ia kia koe.

¹² Pea nee ui leva e te Eteleno kia Satana: Koeni, kua au tuku atu te u mea fuli a Sopo kia koe; kae aua pe naa fafa ou nima kia ia. Pea nee mavae leva ia Satana mai te afioaga o te Eteleno.

Puli o koloa mo te famili o Sopo

¹³ I he aho ae nee kakai ai mo iinu vino ai te u foha mo te u ofafine o Sopo i te fale o tonatou tehina uluaki,

¹⁴ nee kaku mai leva he tagata avelogo kia Sopo, o ui kia ia: Nee fakamalu kele te u pipi tagata, pea nee kai te u asino fafine i onatou tafa;

¹⁵ nee feohofi mai leva ni tagata Sapesi, o ave natou, pea nee natou tamatei leva aki te heleta te u tagata faifekau. Pea ko au pe toko tahi nee hola, ke aumai te logo kia koe.

¹⁶ Kei lolotoga palalau ia ia, kae kaku mai he tahi age tagata avelogo, o ui: Kua to te afi a te Atua mai lagi, o tutu te u ovi mo te u tagata tauhi ovi, o mamate fuli. Pea nee au hao, ia au toko tahi, o aumai te logo kia koe.

¹⁷ Kei lolotoga palalau ia ia, kae kaku mai he tahi age tagata avelogo, o ui: Ko he kau Kaletea, nee vaega tolu, nee natou ohofi te u kamelo o ave, kae natou tamatei aki te heleta te u tagata faifekau. Pea nee au hao, ia au toko tahi, o aumai te logo kia koe.

¹⁸ Kei lolotoga palalau ia ia, kae kaku mai he tahi age tagata avelogo, o ui: Nee lolotoga kai mo inu vino ou foha mo ou ofafine i te fale o tonatou tehina uluaki;

¹⁹ pea koeni, nee hau leva he tuani matagi mai te toafa, o taai te u potupotu e fa o te fale; pea nee holo leva ia ki te kau tupulaga, o natou mamate fuli. Pea nee au hao, ia au toko tahi, o aumai te logo kia koe.

²⁰ Pea nee tuu leva ia Sopo ki oluga, o hae tona pulupulu, mo tele tona ulu; pea nee fakamapee leva ia ia ki te kele, pea nee hu leva ia ia,

²¹ o ui: Nee au hau telefua mai te fatu o taku fae, pea e au toe liliu telefua anai ki te fatu o te kele. Nee foaki e te Eteleno, pea kua toe too e te Eteleno; ke tapuaki ki te huafa o te Eteleno!

²² I te u mea fuli aia, nee mole pe agahala ia Sopo, pea nee mole pe ina tuku he kovi ki te Atua.