SONASI 1 - Ko te Tohi Tapu i te fakauvea

Vokasio o Sonasi; tana hola

¹ Nee fakaha leva te folafola a te Eteleno kia Sonasi, te foha o Amitai, o ui:

² Ke ke tuu ki oluga, o alu ki Ninive, ki te kolo lahi, pea ke ke kalaga ki ai! Koteuhi kua kaku mai kia au tana agakovi.

³ Kae nee tuu ake leva ia Sonasi, ke hola ki Talesisi, o mamao maia mata o te Eteleno. Nee hifo leva ia ia ki Safo, pea nee ina mau leva i ai he vaka ae nee teuteu folau ki Talesisi; pea nee ina totogi leva tona tohi folau, pea nee heka leva ia ia ke alu mo te kau folau ki Talesisi, o mamao maia mata o te Eteleno.

⁴ Kae nee fakaagi leva e te Eteleno he matagi malohi ki te tai, pea nee malaga leva i te tai he afa lahi. Pea nee hage te vaka ka mou.

⁵ Pea nee matataku lahi osi te kau vaka, pea nee natou tahi tagi leva ki tona atua, pea nee natou laku leva ki te tai te u mea ae nee tuku i te vaka, o tupu ke fakamaamaa ia ia. Nee hifo leva ia Sonasi ki te takele o te vaka, pea nee moe mate leva ia ia.

⁶ Nee fakaovi age leva te kapiteni kia ia, o ui: Kotea e ke moe ai? Tuu ki oluga, kalaga ki tou atua! Naa mea age e manatu mai anai ia ia kia tatou, pea e mole tou mamate anai.

⁷ Pea nee palalau leva te kau vaka ia natou, o ui: Koutou omai ke tou toho pe e ko ai ae e tupu ai te malaia aeni. Nee natou toho leva, pea nee to leva te toho kia Sonasi.

⁸ Pea nee natou ui leva kia ia: Fakaha mai kia matou pe e ko ai ae nee tupu ai te malaia aeni kia tatou? Kotea au gaue? Pe e ke hau mai fea? Ko ai tou fenua mo tau hahai?

⁹ Nee ina tali leva kia natou: Ko he Hepeleo au, pea e au mataku ki te Eteleno, te Atua o te atu lagi, ae nee ina fakatupu te tai mo te kele.

¹⁰ Nee matataku lahi leva te u tagata aia, pea nee natou ui leva kia ia: Kotea nee ke fai ai te mea aia? Koteuhi kua iloi e te kau tagata aia nee hola ia ia maia mata o te Eteleno, koteuhi nee ina fakaha age kia natou.

¹¹ Nee natou ui leva kia ia: Kotea e tonu ke matou fai anai kia koe, ke tupu ai te tokalelei o te tai kia tatou? Koteuhi kua asilisili kovi te tai.

¹² Nee ina tali leva kia natou: Koutou too au, pea koutou si au ki te tai, pea e tokalelei anai te tai kia koutou; koteuhi e au iloi e tupu te afa lahi aeni ko au.

¹³ Kae nee aalo fakamalohi te u tagata aena ke kaku ki te kele, kae nee mole natou fealagia, o tupu nee asilisili kovi te tai kia natou.

¹⁴ Koia nee natou fetagihi ai leva ki te Eteleno, o ui: Oi Eteleno, aua naa ke tuku matou ke mamate o tupu ko te mauli o te tagata aeni, pea aua naa ke hili kia matou te toto maa! Koteuhi ko koe, Eteleno, e ke fai te mea ae e ke loto ki ai.

¹⁵ Pea nee natou too leva ia Sonasi, pea nee natou si leva ia ia ki te tai. Pea nee malu leva te itaita o te tai.

¹⁶ Pea nee mau leva e te kau tagata aia he mataku lahi ki te Eteleno, pea nee natou momoli leva he sakilifisio ki te Eteleno, pea nee natou fai leva ni fakapapau.