SOELE 1 - Ko te Tohi Tapu i te fakauvea

Ko te u hee, fakatata o te kau Asilia

¹ Nee fakaha te folafola a te Eteleno kia Soele, te foha o Petuele.

² Kau matua, koutou fakalogo mai ki te mea aeni! Koutou fakalogo mai okotou taliga, koutou fuli, ko te u hahai o te fenua! Pe kua hoko he mea fenei i tokotou temi, Pee ko te temi o akotou tamai?

³ Koutou fakamatala ia ia ki akotou fanau, Pea ke fakamatala ia ia e akotou fanau Ki anatou fanau pea ke fakamatala e anatou fanau ki te taitupu ae e muli mai anai!

⁴ Ko te mea ae nee tuku e te lauka, nee kai ia ia e te hee; Ko te mea ae nee tuku e te hee, nee kai ia ia e te seleki*, Ko te mea ae nee tuku e te seleki, nee kai ia ia e te asile*.

⁵ Koutou alaala, kau konana, pea ke koutou fetagihi! Koutou fuli, kau inu vino, koutou tagi laulau, Koteuhi kua too te vino mai okotou gutu.

⁶ Koteuhi kua omai he hahai ki toku fenua, Ae e malolohi pea kaugamalie. E ina mau te u nifo o te laione, Pea mo te u kaugao o he laione fafine.

⁷ Kua ina maumaui taku vite; Kua ina fasifasii taku fiki, Kua ina hauvaa ona vaa, pea kua ina tuusi ia ia ki lalo. Kua hihina te u toulu o te vite.

⁸ Ke ke tagi laulau, o hage ko te taahine taupoou ae e ina tui te taga, O tagi ki te ofaaga o tona temi tupulaga!

⁹ Kua pupuli te u molaga mo te u lipasio i te fale o te Eteleno. Kua mamahi te u tagata faisakilifisio, te u tagata faifekau a te Eteleno.

¹⁰ Kua maumau te u gaueaga, Kua tagi te kele; Koteuhi kua maumau te fulumeto, Kua ago te vino, kua moamoa te lolo.

¹¹ Kua ufiufi te kau gaue kele; kua lauga te kau gaue vite, O tupu ko te fulumeto mo te olese*; Koteuhi kua maumau te u fua o te u gaueaga.

¹² Kua matagafua te vite, Kua mae te fiki, Mo te kelenate*, mo te palemie*, mo te pome, Kua mae te u fuu akau fuli o te u gaueaga… Kua puli te fiafia i te u foha o te tagata!

¹³ Tagata faisakilifisio, koutou tui okotou kofu fakamamahi, pea koutou fetagihi! Koutou tagi laulau, tagata faifekau o te aletale! Koutou omai o nofo i te pouli katoa mo ni taga Tagata faifekau o te fale o toku Atua! Koteuhi kua puli te u molaga mo te u lipasio i te fale o tokotou Atua.

¹⁴ Koutou fagonogono he sesunio, he fakatahi mamalu! Koutou fakatahii te u matua, mo te u hahai fuli o te fenua I te fale o te Eteleno, tokotou Atua, Pea koutou tagi ki te Eteleno!

¹⁵ Oi, he aho fakamatakutaku! Koteuhi kua ovi mai te aho o te Eteleno: E hau ia ia o hage ko he maumau mai te Mafimafi.

¹⁶ Pe e mole kua too te meakai i otatou mata? Pe e mole kua puli te fiafia mo te nekenekea i te fale o totatou Atua?

¹⁷ Kua moamoa te u pulapula i te kele; Kua lavaki te u tanakiaga magisi; Kua maumau te u fale koloa, Koteuhi e mole kei mau he fulumeto.

¹⁸ Oi, kua fetagihi te u manu! Kua gaegae te faga pipi Koteuhi e mole kei mau he luna; Pea kua fakaofaofa foki te u faga ovi.

¹⁹ Oi Eteleno, ko koe ae e au tagi ki ai! Koteuhi kua tutu e te afi te luna o te toafa, Pea kua tutu e te ulo te u ulu akau fuli o te vao.

²⁰ Kua tagi foki te u manu o te u gaueaga kia koe; Koteuhi kua ago te u liua, Pea kua tutu e te afi te u luna o te toafa.