SELEMIA 1 - Ko te Tohi Tapu i te fakauvea

Vokasio o Selemia

¹ Palalau a Selemia, foha o Ilekisa, ko he tahi i te kau faisakilifisio o Anatote, i te fenua o Pesamino.

² Nee tuku leva kia ia te folafola a te Eteleno, i te temi o Sosiasi, foha o Amone, ko te hau o Suta, i te tau hogofulu ma tolu o tana hau,

³ kae nee hau ia Sosakimi, foha o Sosiasi i Suta, o kaku ki te fakaosi o te tau hogofulu ma tahi o Setesiasi, foha o Sosiasi, hau o Suta, o kaku ki te ave popula o Selusalemi i te mahina nima.

⁴ Nee tuku mai leva te folafola a te Eteleno kia au, o ui:

⁵ Nee au iloi ia koe i mua o taku fakatupu ia koe i te fatu o tau fae, pea nee au fakatapui ia koe, pea nee au fakanofo ia koe ko te polofeta o te atu puleaga i mua o tau mavae i tona fatu.

⁶ Nee au tali leva: Oi Aliki Eteleno! Koeni, e mole pe au poto i te palalau, koteuhi ko au ko he kii toe.

⁷ Pea nee ui mai leva e te Eteleno kia au: Aua naa ke ui: Ko he kii toe au. Koteuhi e ke alu anai kia natou fuli ae e au fekaui anai ia koe ki ai, pea e ke fakaha anai te u mea fuli ae e au fakatotonu atu anai kia koe.

⁸ Aua naa ke mataku kia natou, koteuhi e au nofo mo koe o haofaki ia koe, e ui e te Eteleno.

⁹ Pea nee falo leva e te Eteleno tona nima o fafa ki toku gutu; pea nee ui mai leva e te Eteleno kia au: Koeni, e au tuku aku folafola ki tou gutu.

¹⁰ Sio, e au fakanofo ia koe i te aho nei ki te atu puleaga mo te atu puleaga fakahau, o tupu ke ke taaki pea ke ke tuusi, ke ke maumaui pea ke ke holoi, ke ke lagai pea ke ke to.

¹¹ Nee tuku mai leva kia au te folafola a te Eteleno, o ui: Selemia, kotea e ke sio ki ai? Nee au tali leva: E au sio ki he vaa amatie.

¹² Pea nee ui mai leva e te Eteleno kia au: E tonu tau sio; koteuhi e au tokaga ki taku folafola ke fai ia ia.

¹³ Pea nee toe tuku mai leva kia au te folafola a te Eteleno, o ui: Kotea e ke sio ki ai? Nee au tali leva: E au sio ki he kulo kua pula, ae e hagahaga mai tona gutu mai te potu noleto.

¹⁴ Pea nee ui mai leva e te Eteleno kia au: E tupu anai mai te potu noleto te kovi ki te hahai katoa o te fenua.

¹⁵ Koteuhi e ui e te Eteleno: Sio, e au paui anai te hahai fuli o te atu puleaga i te noleto; pea e natou omai anai, pea e natou tahi fakatuu anai tona nofoaga tau i mua o te u matapa o Selusalemi, ki ona kaupa takatakai, pea mo te u kolo fuli o Suta.

¹⁶ E au fakaha anai aku tautea kia natou, o tupu ko anatou agahala fuli, koteuhi kua natou siaki au kae natou momoli te iseso ki ni atua kehe, pea kua natou tauhi ki te gaueaga o onatou nima.

¹⁷ Pea ko koe, tui tou kilii pipi, pea ke tuu ki oluga, pea ke fakaha kia natou te u mea fuli ae e au fakatotonu atu anai kia koe. Aua naa ke mataku i onatou mua, ke aua naa au fakatete anai koe i onatou mua.

¹⁸ Koeni, kua au fakanofo ia koe i te aho nei ki te fenua katoa o hage ko he kolo tau, mo he foi pou ukamea, pea mo he kaupa sila, ki te u hau o Suta, mo ona pule, mo ona tagata faisakilifisio, pea mo te hahai katoa o te fenua.

¹⁹ E natou tau anai kia koe, kae e mole natou malo anai ia koe; koteuhi e ui e te Eteleno: E au nofo mo koe o haofaki ia koe.