PESALEMO 1 - Ko te Tohi Tapu i te fakauvea

Tagata e lua, ala e lua, fakaosi e lua

¹ Manuia te tagata ae e mole haele o mulimuli ki te tokoni a te kau agakovi, Ae e mole tuu i te ala o te kau agahala, Pea e mole heka fakatahi mo te kau fakaagaaga,

² Kae e mau tona fiafia i te lao a te Eteleno, Pea e metitasio ki ai i te aho mo te pouli!

³ E tatau ia ia mo he akau nee to ia tafa o he tafeaga vai, Ae e fua i tona lakaga, Pea e mole migi tona lau: Ko mea fuli ae e ina fai e manuia kia ia.

⁴ E mole fena te kau agakovi: E natou hage ko te otaota ae e viligia i te matagi.

⁵ Koia e mole tuu ai te kau agakovi i te aho o te fakamaau, Pee ko te kau agahala i te fakatahi a te kau agatonu;

⁶ Koteuhi e iloi e te Eteleno te ala o te kau agatonu, Pea ko te ala o te kau agahala e ina taki ki te malaia.