OSEO 1 - Ko te Tohi Tapu i te fakauvea

Famili o Oseo, paaki totonu o Iselaele

¹ Nee fakaha leva te folafola a te Eteleno kia Oseo, foha o Peeli, i te temi o Osiasi, mo Sotame, mo Akase, pea mo Esekiasi, ko te u hau o Suta, pea mo te temi o Selopoamo, foha o Soasi, hau o Iselaele.

² I te uluaki fakaha e te Eteleno tana folafola kia Oseo, nee ui leva e te Eteleno kia Oseo: Alu, o too he fafine faiaga mo ni fanau o te faiaga; koteuhi kua faiaga te fenua pea kua ina siaki te Eteleno!

³ Pea nee alu leva ia Oseo, o too ia Komela, ofafine o Tipalaimi. Nee faitama leva ia Komela, pea nee ina fanaui leva he tama.

⁴ Pea nee ui leva e te Eteleno kia ia: Fakahigoa ia ia ko Siseleele; koteuhi kei toe pe he kii temi siisii, pea e au tauteai anai te fale o Seu o tupu ko te toto ae nee liligi i Siseleele, pea e au fakagata anai te puleaga o te fale o Iselaele.

⁵ I te aho aia, e au fasii anai te fana a Iselaele i te vaevaeliua o Siseleele.

⁶ Nee toe faitama leva ia Komela pea nee ina fanaui leva he taahine. Pea nee ui leva e te Eteleno kia Oseo: Fakahigoa ia ia ko Lolusama; koteuhi e mole au toe ofa anai ki te fale o Iselaele, pea e mole au toe fakamolemole anai kia ia.

⁷ Kae e au ofa anai ki te fale o Suta; pea e au haofaki anai natou i te Eteleno, tonatou Atua. E mole au haofaki anai natou aki te kaui nahau, pee ko te heleta, pee ko te tau, pee ko ni hosi, pee ko ni kau heka hosi.

⁸ Nee vahei leva e Komela ia Lolusama, pea nee toe faitama leva ia ia, o toe fanaui he tahi tama.

⁹ Pea nee ui leva e te Eteleno: Foaki kia ia te higoa ko Loami; koteuhi e mole ko taku hahai koutou, pea e mole ko tokotou Atua au.