NUMELO 1 - Ko te Tohi Tapu i te fakauvea

Tohi o te kau Iselaele i te toafa o Sinai

¹ Nee palalau te Eteleno kia Moisese i te toafa o Sinai, i te falela tapu, i te uluaki aho o te lua mahina, i te lua tau mai te mavae i Esipito. Nee ina ui:

² Kotou tohi te hahai katoa o Iselaele, i te u faahiga, mo te u famili, o lau te u higoa o te u tagata fuli.

³ Ko Alone mo koe, e kolua lau anai te u tagata fuli ae kua tau uafulu o fai ki oluga, natou ae kua aoga ki te solia, ke natou liliu ko te solia o Iselaele.

⁴ E kau anai mo kolua ki te tohi aia he tagata i te faahiga, ko he tagata ae e pule i tona famili.

⁵ Koeni te u higoa o te u tagata ae e tokoni anai kia kolua. Kia Lupeni: ko Elisule, foha o Seteule;

⁶ kia Simeone: ko Selumiele, foha o Sulisatai;

⁷ kia Suta: ko Nasoni, foha o Aminatape;

⁸ kia Isakale: ko Netaneele, foha o Sua;

⁹ kia Sapulone: ko Eliape, foha o Elone;

¹⁰ ki te u foha o Sosefo, kia Efalaimi: ko Elisama, foha o Amiute; kia Manase: ko Kameliele, foha o Petasuli;

¹¹ kia Pesamino: ko Apitane, foha o Kiteoni;

¹² kia Tane: ko Aiesele, foha o Amikatai;

¹³ kia Asele: ko Pakiele, foha o Okalane;

¹⁴ kia Kate: ko Eliasafe, foha o Teueli;

¹⁵ kia Nefetali: ko Aila, foha o Enani.

¹⁶ Ko te u higoa aia o natou ae nee kau i te tohi o te u fanau a Iselaele. Ko natou aia kua filifili ko ni pule o te u famili o Iselaele, mo ni pule o te kau solia a Iselaele.

¹⁷ Nee too leva e Moisese mo Alone te u tagata aia, ae nee tuku onatou higoa kia naua.

¹⁸ Pea nee na fakatahii leva te hahai katoa o Iselaele, i te uluaki aho o te lua mahina. Ko te u tagata fuli o Iselaele, ae kua tau uafulu o fai ai ki aluga, pea kua aoga ki te solia, nee olo leva o tohi onatou higoa o mulimuli ki onatou faahiga, mo onatou famili.

¹⁹ Nee tohi leva e Moisese onatou higoa i te toafa o Sinai, o mulimuli ki te u fakatotonu ae nee tuku kia ia e te Eteleno.

²⁰ Ki te u foha o Lupeni, ko te uluaki o Iselaele, o mulimuli ki te tai tagata, mo te faahiga, mo te famili, nee tohi leva te u higoa o te u tagata fuli, mai te tau uafulu o fai ki oluga, natou fuli ae kua aoga ki te solia,

²¹ pea nee mau leva i te tohi o te faahiga o Lupeni ko te toko fagofulu ma ono afe nimageau (46 500).

²² Ki te u foha o Simeone, o mulimuli ki te tai tagata, mo te faahiga, mo te famili, nee tohi leva te u higoa o te u tagata fuli ae kua aoga ki te solia, mai te tau uafulu o fai ki oluga,

²³ pea nee mau leva i te tohi o te faahiga o Simeone ko te toko nimagofulu ma hiva afe tolugeau (59 300).

²⁴ Ki te u foha o Kate, o mulimuli ki te tai tagata mo te faahiga, mo te famili, nee tohi leva te u higoa o te u tagata fuli mai te tau uafulu o fai ki oluga, natou fuli ae kua aoga i te solia,

²⁵ pea nee mau leva i te tohi o te faahiga o Kate ko te toko fagofulu ma nima afe onogeau nimagofulu (45 650).

²⁶ Ki te u foha o Suta, o mulimuli ki te tai tagata, mo te faahiga, mo te famili, nee tohi leva te u higoa o te u tagata fuli mai te tau uafulu o fai ki oluga, natou fuli ae kua aoga ki te solia,

²⁷ pea nee mau leva i te tohi o te faahiga o Suta ko te toko fitugofulu ma fa afe onogeau (74 600).

²⁸ Ki te u foha o Isakale, o mulimuli ki te tai tagata, mo te faahiga, mo te famili, nee tohi leva te u higoa o te u tagata fuli mai te tau uafulu o fai ki oluga, natou fuli ae kua aoga ki te solia,

²⁹ pea nee mau leva i te tohi o te faahiga o Isakale ko te toko nimagofulu ma fa afe fageau (54 400).

³⁰ Ki te u foha o Sapulone, o mulimuli ki te tai tagata, mo te faahiga, mo te famili, nee tohi leva te u higoa o te u tagata fuli mai te tau uafulu o fai ki aluga, natou fuli ae kua aoga ki te solia,

³¹ pea nee mau leva i te tohi o te faahiga o Sapulone ko te toko nimagofulu ma fitu afe fageau (57 400).

³² Ki te u foha o Sosefo, ki te u foha o Efalaimi, o mulimuli ki te tai tagata, mo te faahiga, mo te famili, nee tohi leva te u higoa o te u tagata fuli mai te tau uafulu o fai ki oluga, natou fuli ae kua aoga ki te solia,

³³ pea nee mau leva i te tohi o te faahiga o Efalaimi ko te toko fagofulu afe nimageau (40 500).

³⁴ Ki te u foha o Manase, o mulimuli ki te tai tagata, mo te faahiga, mo te famili, nee tohi leva te u higoa o te u tagata fuli mai te tau uafulu o fai ki aluga, natou fuli ae kua aoga ki te solia,

³⁵ pea nee mau leva i te tohi o te faahiga o Manase ko te toko tolugofulu ma lua afe luageau (32 200).

³⁶ Ki te u foha o Pesamino, o mulimuli ki te tai tagata, mo te faahiga, mo te famili, nee tohi leva te u higoa o te u tagata fuli mai te tau uafulu o fai ki aluga, natou fuli ae kua aoga ki te solia,

³⁷ pea nee mau leva i te tohi o te faahiga o Pesamino ko te toko tolugofulu ma nima afe fageau (35 400).

³⁸ Ki te u foha o Tane, o mulimuli ki te tai tagata, mo te faahiga, mo te famili, nee tohi leva te u higoa o te u tagata fuli mai te tau uafulu o fai ki aluga, natou fuli ae kua aoga ki te solia,

³⁹ pea nee mau leva i te tohi o te faahiga o Tane ko te toko onogofulu ma lua afe fitugeau (62 700).

⁴⁰ Ki te u foha o Asele, o mulimuli ki te tai tagata, mo te faahiga, mo te famili, nee tohi leva te u higoa o te u tagata fuli mai te tau uafulu o fai ki aluga, natou fuli ae kua aoga ki te solia,

⁴¹ pea nee mau leva i te tohi o te faahiga o Asele ko te toko fagofulu ma tahi afe nimageau (41 500).

⁴² Ki te u foha o Nefetali, o mulimuli ki te tai tagata, mo te faahiga, mo te famili, nee tohi leva te u higoa o te u tagata fuli mai te tau uafulu o fai ki aluga, natou fuli ae kua aoga ki te solia,

⁴³ pea nee mau leva i te tohi o te faahiga o Nefetali ko te toko nimagofulu ma tolu afe fageau (53 400).

⁴⁴ Ko te lahi aia o te hahai ae nee tohi e Moisese mo Alone, pea mo te u tagata pule o Iselaele e hogofulu ma lua; ko te famili pe mo tona tagata.

⁴⁵ Ko te u foha fuli o Iselaele, o mulimuli ki te tai tagata, mo te faahiga, mo te famili, nee tohi leva te u higoa o te u tagata fuli mai te tau uafulu o fai ki oluga, natou fuli ae kua aoga ki te solia,

⁴⁶ pea nee mau leva i te tohi o te hahai katoa o Iselaele ko te toko onogeau ma tolu afe nimageau nimagofulu (603 550).

Tuulaga kehe o te famili o Levi

⁴⁷ Kae nee mole tohi leva te kau Levi mo te u fanau ake ae o Iselaele.

⁴⁸ Nee ui leva e te Eteleno kia Moisese:

⁴⁹ Aua naa ke tohi fakatahi te kau Levi mo te u fanau ake ae o Iselaele.

⁵⁰ Tuku ki te kau Levi ke tokaga ki te falela tapu, mo ona mea gaue fuli, pea mo te u mea fuli ae e tuku i ai. E natou amo anai te falela pea mo ona mea gaue fuli, pea e natou fai anai tona tauhi, pea e natou nonofo leva i ona tafa.

⁵¹ Ka alu leva te falela tapu, e veteki anai ia e te kau Levi. Ka fakatuu leva te falela tapu, e fakatuu anai ia e te kau Levi, pea ko te matapule ae ka fakaovi age ki te falela tapu e tautea anai ia ki te mate.

⁵² E tahi nofo anai te fanau a Iselaele i tona nofoaga, i te kogamea ae e tuu ai tona fuka, o mulimuli ki tona solia.

⁵³ Kae e nofo leva te kau Levi o a takai te falela tapu, o tupu ke aua naa to toku hauhau ki te u fanau a Iselaele. E tauhi anai e te kau Levi te falela tapu.

⁵⁴ Nee fai leva e te u fanau a Iselaele te u fakatotonu fuli ae nee tuku e te Eteleno kia Moisese.