MIKEA 1 - Ko te Tohi Tapu i te fakauvea

Ita o te Eteleno ki Iselaele mo Suta

¹ Nee fakaha leva te folafola a te Eteleno kia Mikea, mai Moleseti, i te temi o Sotame, mo Akase, mo Esekiasi hau o Suta, kikite ki Samalia mo Selusalemi.

² Koutou fakalogo, koutou fuli, atu hahai! Tokaga, kele, mo te u mea fuli ia koe! Ke fakamooni kia koutou te Aliki, te Eteleno, Te Aliki ae e nofo i te fale hau o tona maonioni!

³ Koteuhi koeni, e ulu mai te Eteleno mai tona nofoaga, E hifo mai ia ia, e haele ia ia i te u potu maoluga o te kele.

⁴ I ona vae e huhua te u mouga, E mafaafaa te u vaevaeliua O hage ko te sela i te afi, O hage ko te vai ae e hali mai he mouga.

⁵ Pea ko te u mea fuli aia o tupu ko te agakovi a Sakopo, O tupu ko te u agahala o te fale o Iselaele! Kotea te agakovi a Sakopo? Pe e mole ko Samalia? Kotea te u kogamea maoluga o Suta? Pe e mole ko Selusalemi?…

⁶ E au fakaliliu anai ia Samalia ko he tuuga maka i te u gaueaga, Ko he kogamea ke to ai te vite; E au laku anai ona maka ki te vaevaeliua, E au tuku anai ke telefua ona fakatafito.

⁷ E fasifasii anai ona fakatata togi fuli, E tutu anai i te afi ona totogi uli fuli, Pea e au maumaui anai ona taulaatua fuli, Ae nee mau ki te totogi o te faiaga, E natou liliu anai ko he totogi o te faiaga…

⁸ Koia e au tagi ai anai, e au tagi laulau anai, E au haele kilii vae anai mo fakatelatela anai, E au kalaga anai o hage ko he kuli vao, Pea e au tagi anai o hage ko te otulusi.

⁹ Koteuhi e mamahi tona lavea, E mafola ia ia o kaku ki Suta, E ulu ia ia o kaku ki te matapa o taku hahai, O kaku ki Selusalemi.

¹⁰ Aua naa koutou fakaha ia ia i Kate, Aua naa koutou tagi i Ako! E au makafulifuli anai i te efu i Pete-Leafala.

¹¹ Fakalaka, ia koe ae e nofo i Safili, i te telefua mo te ufiufi! E mole kei toa ae e nofo i Tesanani i te ulu ki fafo. E tagi laulau ae e nofo i Pete-Aetesele, Pea e mole kei feala te hola ki ai.

¹² E tete te hahai o Maloti o tupu ko tona mauli, Koteuhi kua to te malaia mai te Eteleno O kaku ki te matapa o Selusalemi.

¹³ Hahai o Lakisi, hai ni hosi gaholo ki tau saliote! Nee ke liliu ki te taahine o Sione ko he uluaki tupuaga o te agahala, Koteuhi nee mau ia koe te u agahala a Iselaele.

¹⁴ Koia e ke fakafisi ai anai kia Moleseti-Kate; E liliu anai te u fale o Akesipe ko he matapuna kaka ki te u hau o Iselaele.

¹⁵ Hahai o Malesa, e au aumai anai kia koe he pule foou, E alu anai te kololia o Iselaele o kaku ki Atulami.

¹⁶ Hahai o Selusalemi, tele okotou gutu, kosi okotou ulu, O tupu ko au fanau ofaina! Tele okotou ulu o hage ko te akuila, Koteuhi e natou olo popula o mamao maia koutou!