Maleko 1 - Ko te Tohi Tapu i te fakauvea

Gaue a Soane-Patita

¹ Kamataaga o te Evaselio o Sesu-Kilisito, Alo o te Atua.

² O mulimuli ki te mea ae e tuu i te tohi a te polofeta ko Esaia: Koeni, e au fekaui taku tagata faifekau i ou mua E ina teuteui anai tou ala;

³ Ko te leo o ia ae e kalaga i te toafa: Koutou teuteui te ala o te Aliki. Koutou fakatokatoka ona ala liliki.

⁴ Nee ha leva ia Soane, o faipapitema i te toafa, pea mo akonaki ki te papitema o te fakahemala o uhiga mo te fakamolemole o te u agahala.

⁵ Nee alu kia ia te fenua katoa o Sutea pea mo te hahai fuli o Selusalemi, o kofesio anatou agahala, pea nee papitemai natou e Soane i te vaitafe o te Solotane.

⁶ Nee kofu ia Soane ki he kofu fului kamelo, pea nee ina hai he kilii pipi i ona vakavaka. Nee kai ia ki te u hee mo te meli vao.

⁷ Nee akonaki ia ia, o ui: E hau i oku muli ae e malohi age ia au, pea e mole au gali i te punou o veteki te hai o ona sulie.

⁸ Ko au, nee au papitemai koutou i te vai; kae e ina papitemai anai koutou i te Laumalie Maonioni.

Papitemai o Sesu-Kilisito

⁹ I te temi aia, nee hau leva ia Sesu mai Nasaleti ki Kalilea, pea nee papitemai leva ia ia e Soane i te Solotane.

¹⁰ I te lakaga ae nee mavae ai ia ia mai te vai, nee sio leva ia ki te ava o te lagi, pea mo te hifo a te Laumalie Maonioni kia ia o hage ko he lupe.

¹¹ Pea nee fakaha leva e he leo nee hau mai te lagi te u folafola aeni: Ko koe ko toku Alo ofaina, ae kua au tuku ki ai toku ofa katoa.

Fakahalai o Sesu-Kilisito

¹² I te lakaga pe aia, nee taki leva Sesu e te Laumalie Maonioni ki te toafa,

¹³ pea nee nofo leva ia ia i ai i ni aho e fagofulu, o fakahalai e Satana. Nee fakatahi ia ia mo te u manu o te vao, pea nee tauhi kia ia e te kau aselo.

Kamataaga o te gaue a Sesu i Kalilea

¹⁴ I te osi o te puke o Soane, nee alu leva ia Sesu ki Kalilea, o fagonogono te Evaselio o te Atua.

¹⁵ Nee ina ui: Kua hoko te temi, pea kua ovi mai te puleaga o te Atua. Koutou fakahemala, pea koutou tui ki te logo lelei.

Uluaki tisipulo a Sesu-Kilisito

¹⁶ I tana haele i te matatai o te tai o Kalilea, nee sio leva ia ia kia Simone mo Atelea, tehina o Simone, ae nee na li he kupega ki te tai; koteuhi nee na tautai.

¹⁷ Nee ui leva e Sesu kia naua: Kolua muli mai ia au, pea e au fakaliliu anai kolua ko ni tautai tagata.

¹⁸ I te lakaga pe aia, nee na tuku leva ona kupega, kae na mulimuli leva ia ia.

¹⁹ Pea i tana fakamamao atu fakasiisii pe, nee sio leva ia ia kia Sakopo, foha o Sepeteo, mo Soane, tona tehina, ae nee nonofo foki i he vaka pea e na onoono ona kupega.

²⁰ I te lakaga pe aia, nee ina paui leva naua; pea nee na tuku leva tana tamai ko Sepeteo i te vaka mo te kau gaue, kae nee na muli leva ia ia.

Kapu o ni temonio i Kafanaume

²¹ Nee natou olo leva ki Kafanaume. Pea, i te aho o te sapato, nee ulu leva ia Sesu ki te sinakoka o akonaki i ai.

²² Nee natou ofolele i tana akonaki; koteuhi nee akonaki ia ia o hage ko he tahi e ina mau he pule, kae nee mole akonaki ia ia o hage ko te kau sekelipa.

²³ Nee nofo leva i tonatou sinakoka he tagata ae nee ina mau he laumalie kovi, pea nee kalaga leva ia ia:

²⁴ Kotea ae e ke loto ke ke fai kia matou, Sesu mai Nasaleti? Pe nee ke hau o fakapuli matou? E au iloi pe ko ai ia koe: Ko te Sagato ia koe a te Atua.

²⁵ Nee pupulai leva ia ia e Sesu, o ui: fakalogologo, pea ke mavae i te tagata aia.

²⁶ Pea nee mavae leva te laumalie kovi i te tagata aia, i te osi o tana lu fakakovi ia ia, pea mo tana kalaga leo lahi.

²⁷ Nee natou ofolele fuli i te mea aia, o natou fefehui aki ia natou: Kotea te mea aeni? Ko he akonaki foou! E fakatotonu ia ia mo he pule, tatau foki ki te u laumalie kovi, pea e natou fakalogo kia ia!

²⁸ Pea nee mafola leva tona logologona i te lakaga pe aia ki te u fenua fuli i te u tafaaki o Kalilea.

Fakamauli o te fae o te ohoana o Petelo

²⁹ I tanatou mavae i te sinakoka, nee natou olo leva mo Sakopo mo Soane ki te api o Simone mo Atelea.

³⁰ Nee takoto te fae o te ohoana o Simone, koteuhi nee fiva ia ia; pea i te lakaga pe aia nee fakaha leva ia ia kia Sesu.

³¹ Nee fakaoviovi age leva ia Sesu kia ia, pea nee ina too leva tona nima o fakatuu ia ia ki oluga, pea i te lakaga pe aia nee mavae leva te fiva ia ia. Pea nee tauhi leva te fafine kia natou.

Fakamauli o te u mahaki

³² I te afiafi, i te to o te laa, nee aumai leva kia Sesu ia natou fuli nee mahahaki pea mo natou nee ulusino ai te u temonio.

³³ Pea nee fakatahi age te kolo katoa ki tona matapa.

³⁴ Nee ina fakamauli leva ni hahai kaugamalie ae nee natou mau ni mahaki kehekehe; nee ina kapu foki ni temonio toko lahi, pea nee mole ina fakagafua ke palalau te u temonio koteuhi nee natou iloi ia ia.

³⁵ I te hegihegi, kae kei fakapouli, nee ala ake leva ia ia, pea nee alu leva ia ia ki he kogamea lavaki, ae nee faikole ai leva ia ia.

³⁶ Ko Simone mo natou ae nee fakatahi mo ia, nee olo leva o kumi ia ia.

³⁷ Pea, i tanatou mau leva ia ia, nee natou ui leva kia ia: E kumi koe e te hahai katoa.

³⁸ Nee tali leva Sesu kia natou: Tou olo ki he tahi kogamea kehe, ki te u kolo e ovi mai, ke au akonaki foki i ai; koteuhi ko te tupuaga aia o taku hau.

³⁹ Pea nee alu leva ia ia o akonaki i te u sinakoka, i Kalilea katoa, pea nee ina kapu leva te kau temonio.

Fakamauli o he tagata kilia

⁴⁰ Nee hau leva he tagata kilia kia ia; pea nee tuutuli leva ia ia, o kolekole kia Sesu: Kapau e ke loto ki ai, pea e ke fealagia toku fakamaa.

⁴¹ Ko Sesu, i tona ofa mamahi kia ia, nee ina faoi leva tona nima, o kapa ki ia, o ui: E au loto ki ai, ke ke maa.

⁴² I te lakaga pe aia, nee mavae leva te kilia ia ia, pea nee maa leva ia ia.

⁴³ Pea nee fekau leva e Sesu kia ia ke alu aipe, mo ni fakatotonu mamafa,

⁴⁴ o ina ui kia ia: Aua pe naa ke fakaha he mea ki he tahi; kae ke alu o fakaha ia koe ki te tagata faisakilifisio, pea ke momoli o uhiga mo tou fakamaa te mea ae nee fakatotonu e Moisese, o tupu ke fakamooni te mea aia kia natou.

⁴⁵ Kae nee alu leva te tagata aia, pea nee ina kamata fakaha leva mo fakamafola i te u kogamea fuli te mea ae nee hoko kia ia. Koia nee mole toe feala ai te ulu fakahaha a Sesu ki he kolo. Nee nofo ia ia i te u tua kolo, i ni kogamea lavaki, pea nee omai kia ia mai te u potu fuli.