MALAKIA 1 - Ko te Tohi Tapu i te fakauvea

Situa a Iselaele ki te ofa o tona Atua

¹ Folafola a te Eteleno ki Iselaele ia Malakia.

² Nee au ofa kia koutou, e ui e te Eteleno. Kae e koutou ui: Kotea te mea ae nee ke ofa ai kia matou? Pe e mole ko te tehina o Esau ko Sakopo? E ui e te Eteleno. Kae nee au ofa kia Sakopo,

³ Pea nee au mau he fehia kia Esau, Nee au fakaliliu ona mouga ko he potu lavaki, Nee au tuku tona tofiga ki te u kuli vao o te toafa.

⁴ Kapau e ui e Etome: Kua matou maumau, E matou toe lagai anai te ua maumau! Koia e folafola ai te Eteleno o te atu fua tau: Ke natou fakatuu! E au holoi anai, Pea e fakahigoa anai natou ko te fenua o te agakovi, Hahai ae e itaita ki ai te Eteleno o heegata.

⁵ E sio anai ki ai okotou mata, Pea e koutou ui anai: E lahi te Eteleno O fakalaka i te u tuakoi o Iselaele!

Agahala a te kau faisakilifisio

⁶ E fakaapaapa he foha ki tana tamai, pea mo he tagata faifekau ki tona pule. Kapau e au tamai, kofea te fakaapaapa ae e tonu ke fai mai kia au? Kapau e au pule, kofea te mataku ae e tonu ke mau kia au? E ui e te Eteleno o te atu fua tau kia koutou, kau faisakilifisio, Ae e kotou fakanoai toku huafa, Pea e kotou ui: Kotea te mea ae nee matou fakanoai ai tou huafa?

⁷ E kotou momoli i toku aletale ni meakai uli, Pea e koutou ui: Kotea te mea ae nee matou fakanoai ai ia koe? O tupu nee kotou ui: E noa te laupapa o te Eteleno!

⁸ Ka kotou momoli he failaulau aki he manu kivi, pe e mole kovi? Ka kotou momoli he manu ketu pee maimoa, pe e mole kovi? Ke ke momoli ia ia ki tou kovana! Pe e ina tali lelei anai ia koe, pe e ina tuku anai kia koe he mea lelei? E ui e te Eteleno.

⁹ Kotou kole ki te Atua i te temi nei, ke ofa atu ia ia kia koutou! O tupu ko koutou ae e hau mai ai te mea aia: Pe e ina tali lelei anai koutou? E ui e te Eteleno o te atu fua tau.

¹⁰ Ko ai ae ia koutou e ina mapunui anai te u matapa, Ke aua naa kotou tutu noa te afi i oluga o toku aletale? E mole pe au mau he fiafia e tahi ia koutou, e ui e te Eteleno o te atu fua tau, Pea e mole lelei kia au te u molaga o okotou nima.

¹¹ Koteuhi mai te hopo o te laa o kaku ki tona to, E lahi toku huafa i te lotolotoga o te atu puleaga, Pea e tutu i te u kogamea fuli te iseso ki toku huafa, Pea e fai mai kia au ni failaulau maa; Koteuhi e lahi toku huafa i te lotolotoga o te atu puleaga, E ui e te Eteleno o te atu fua tau.

¹² Kae ko koutou, e koutou ulihi toku huafa, O kotou ui: E uli te laupapa o te Eteleno, Pea ko te mea ae e mau i ai ko he meakai kovi.

¹³ E kotou ui: Ko te hoki e he mea fakakinakina! Pea e kotou fehihia kia au, E ui e te Eteleno o te atu fua tau. Koia e kotou aumai ai kia au ni manu kaihaa, mo ketu pea mo maimoa! Pea koena te u molaga ae e kotou fai mai kia au! Pe e feala ke au tali lelei natou mai okotou nima? E ui e te Eteleno.

¹⁴ Malaia te tagata kaka ae e ina mau i tana faga manu he manu tagata, Kae e ina foaki ke momoli ki te Aliki he manu sino kovi! Koteuhi ko au ko he hau lahi, e ui e te Eteleno o te atu fua tau, Pea e fakamatakutaku toku huafa i te lotolotoga o te atu puleaga.