LUTE 1 - Ko te Tohi Tapu i te fakauvea

Pipiki a Lute kia Naomi

¹ I te temi o te kau tui fakamaau, nee to leva he hoge i te fenua. Nee alu leva he tagata o Petelehemi i Suta mo tona ohoana, mo ona foha toko lua, o nonofo i te fenua o Moape.

² Ko te higoa o te tagata aena ko Elimeleke, ko tona ohoana ko Naomi, pea ko ona foha ko te tahi ko Makelone pea ko te tahi ko Kilisoni; nee natou omai mai Efalata, mai Petelehemi i Suta. I tanatou kaku ki te fenua o Moape, nee natou fakatuu leva i ai tonatou nofoaga.

³ Nee mate leva ia Elimeleke, ohoana o Naomi, pea nee nofo leva ia Naomi mo ana tama e toko lua.

⁴ Nee na ohoana leva mo ni fafine Moape, nee higoa te tahi ko Olipa, pea nee higoa te tahi ko Lute, pea nee natou nonofo leva i Moape o lau kia tau e hogofulu.

⁵ Nee toe mamate leva ia Makelone mo Kilisoni, pea nee nofo toko tahi leva ia Naomi, kua pupuli ana tama toko lua mo tona ohoana.

Toe liliu a Naomi ki Suta

⁶ Pea nee tuu ake leva ia Naomi, ia ia mo ana taahine, ke natou mavae i te fenua o Moape, koteuhi nee logo ia i te fenua o Moape kua ahiahi te Eteleno ki tana hahai pea kua ina foaki he pane kia ia.

⁷ Nee mavae leva ia ia i te kogamea ae nee nofo ai, mo ana taahine, pea nee natou kamata haele leva i te ala ke toe liliu ki te fenua o Suta.

⁸ Pea nee ui leva e Naomi ki ana taahine: Kolua olo, pea kolua tahi liliu ki te api o tana fae! Ke tuku e te Eteleno tona agalelei kia kolua o hage ko takolua agalelei kia natou ae kua mamate pea mo au foki!

⁹ Ke fai e te Eteleno ke kolua mau taki toko tahi te malolo i te fale o he tagata! Pea nee uma leva ia ia kia naua. Nee hiki leva ki oluga ona leo, pea nee na fetagihi leva o leo lahi;

¹⁰ pea nee na ui leva kia Naomi: Kailoa, e ma olo mo koe ki tau hahai.

¹¹ Nee ui leva e Naomi: Kolua toe liliu, nai aku taahine! Kotea e kolua omai ai mo au? Pe e kei au mau ni tamaliki i toku fatu, ke liliu ko ni okolua ohoana?

¹² Ke kolua toe liliu, nai aku taahine, ke kolua olo! E mole kei feala ke au ohoana koteuhi kua au matua. Pea kapau e au ui anai e au mau he amanaki lelei; kapau i te po pe aeni e au momoe anai mo hoku ohoana pea e au fanaui anai ni foha,

¹³ pe e kolua talitali anai ke na lalahi, pe e kolua toe fakafisi anai ke kolua toe ohoana mo ni ihi age? Kailoa, nai aku taahine! O tupu ko kolua, kua au nofo i he mamahi lahi koteuhi kua hiki fakafehagai te nima o te Eteleno kia au.

¹⁴ Pea nee na hiki ake leva ki oluga ona leo, o na toe fetagihi leo lahi. Nee uma leva ia Olipa ki tana fae o tauine kia ia, kae nee pipiki leva ia Lute kia Naomi.

¹⁵ Nee ui leva e Naomi kia Lute: Koeni kua toe liliu leva tou tehina ki tana hahai mo ona atua; ke ke toe liliu, o hage ko tou tehina.

¹⁶ Nee tali leva e Lute: Aua naa ke fakamalohii au ke au siaki koe, pea ke au toe liliu o mamao mo koe! Ko te kogamea ae e ke alu anai ki ai, e au alu anai ki ai; ko te kogamea ae e ke nofo anai i ai, e au nofo anai i ai; e liliu anai tau hahai ko taku hahai, pea e liliu anai tou Atua ko toku Atua;

¹⁷ ko te kogamea ae e ke mate ai anai, e au mate ai anai pea e tanu anai au i ai. Ke tautea au e te Eteleno i tona malohi katoa, mo kapau e i ai he tahi age mea i te mate e ina vahei anai au maia koe!

¹⁸ I tana sio kua tuu malohi te loto o Lute ke alu mo ia, nee tuku leva e Naomi tana fakamalohii ia ia ke nofo.

¹⁹ Nee na faifagona fakatahi leva o kaku ki Petelehemi. I tana feulufi ki Petelehemi, nee gatu leva te kolo katoa, o tupu ko naua, pea nee ui leva e te u fafine: Pe ko Naomi koa aeni?

²⁰ Nee ui leva e Naomi kia natou: Aua naa kotou fakahigoa au ko Naomi, koutou fakahigoa au ko Mala, koteuhi kua fakafonu au e te Mafimafi aki te mamahi.

²¹ Nee au mau koloa i taku mavae i heni, pea kua fakaliliu mai au e te Eteleno mo oku nima atea. Kotea e kotou fakahigoa ai au ko Naomi, kae kua siaki au e te Eteleno, pea kua fakamamahii au e te Mafimafi?

²² Koena leva te toe liliu mai a Naomi mai Moape mo tana taahine ko Lute, te fafine Moape. Nee na kaku leva ki Petelehemi i te kamataaga o te temi tuusi o te olese*.