LUA KOLONIKO 1 - Ko te Tohi Tapu i te fakauvea

Salomone: tona poto mo tona kololia

¹ Nee malohi leva ia Salomone, foha o Tavite, i tona puleaga; pea nee nofo leva mo ia te Eteleno, tona Atua, o hiki ia ia o lahi osi.

² Nee tuku leva e Salomone ni fakatotonu ki Iselaele katoa, ki te u pule o te toko afe mo te toko teau, mo te u tui fakamaau, mo te u pule fenua o Iselaele katoa, pea mo te u pule o te u fale fakatamai;

³ pea nee alu leva ia Salomone mo te fakatahiga katoa ki te kogamea tapu ae nee tuu i Kapaone. Nee tuu i ai te falela tapu o te Atua, ae nee fai e Moisese, tagata faifekau a te Eteleno i te toafa;

⁴ kae kua ave e Tavite te aleka a te Atua mai Kiliate-Sealimi ki tona tukuaga ae nee ina teuteui kia ia, koteuhi nee ina fakatuu he falela kia ia i Selusalemi.

⁵ Nee tuu foki i ai, i mua o te tapenakulo o te Eteleno, te aletale sila ae nee fai e Petesaleele, foha o Uli, foha o Ulu. Nee kumi leva e Salomone mo te fakatahiga katoa te Eteleno.

⁶ Pea nee momoli leva e Salomone, i te aletale sila ae nee tuu i mua o te falela tapu, ni failaulau e afe.

⁷ I te pouli, nee ha leva te Atua kia Salomone, o ui kia ia: Kole mai te mea ae e ke loto ke au foaki atu kia koe.

⁸ Nee tali leva e Salomone ki te Atua: Kua ke fakaha tou agalelei mo tou agatonu ki taku tamai ko Tavite, koteuhi kua ke fakanofo au ko te hau, o fetogi ia ia.

⁹ I te lakaga nei, Eteleno Atua, ke fakahoko tau fakapapau ae nee ke fai kia Tavite, taku tamai, koteuhi kua ke fakanofo au ke hau ki he hahai kaugamalie osi o hage ko te efu o te kele!

¹⁰ Foaki mai foki kia au te poto mo te iloilo, o tupu ke au iloi te haele ia mua o te hahai aeni! Koteuhi ko ai e feala anai ke ina fakamaaui tau hahai, te hahai kaugamalie aeni?

¹¹ Nee ui leva e te Atua kia Salomone: O tupu koena te manatu o tou loto, o tupu nee mole ke kole ni koloa pee ko ni mea lelei, pee ko te kololia, pee ko te mate o ou fili, pee ko he mauli fualoa, kae e ke kole kia koe he poto mo he iloilo o tupu ke fakamaaui taku hahai ae kua au fakahau ia koe ki ai,

¹² kua tuku atu leva kia koe te poto mo te iloilo. Pea kua au toe foaki atu foki kia koe ni koloa, mo ni mea lelei, pea mo te kololia, o lahi age i te u hau fuli i ou mua pea mo te u hau fuli i ou muli.

¹³ Nee toe liliu leva ia Salomone ki Selusalemi, mai te kogamea taputapu ae nee tuu ai te falela tapu i Kapaone. Pea nee hau leva ia ia i Iselaele.

¹⁴ Nee tanaki leva e Salomone ni saliote tau mo ni kau tagata heka hosi: pea nee ina mau ni saliote e afe fageau, pea mo ni kau tagata heka hosi e hogofulu ma lua afe, pea nee ina tuku leva natou ki te u kolo ae nee ina tanaki ai ana saliote, pea mo Selusalemi ke ovi ki te hau.

¹⁵ I te hau a Salomone, nee tatau leva te lahi o te aulo mo te siliva i Selusalemi mo ni maka, pea nee tatau leva te lahi o te sete* mo te sikomole* ae nee tupu i te fenua.

¹⁶ Nee aumai te u hosi a Salomone mai Esipito; nee hihifo ni kau tagata faikoloa a te hau, o totogi mai natou mai ai;

¹⁷ nee aumai mai Esipito e te kau tagata faikoloa aena ia te saliote e tahi aki ni foi sikele* siliva e onogeau, pea ko te hosi aki ni foi sikele siliva e teau nimagofulu. Nee natou toe totogi mai foki ni saliote mo ni hosi mai te u hau o te kau Eti mo te u hau o Silia.