LUA HAU 1 - Ko te Tohi Tapu i te fakauvea

Mahaki mo te mate o Akasia

¹ I te osi mate a Akapo, nee agatuu leva ia Moape ki Iselaele.

² Pea nee to leva ia Akasia mai te matapa fakamalama o tona kogafale fata i Samalia, o mahaki. Nee ina fekaui leva ni tagata avelogo, o ui kia natou: Kotou olo o kumi kia Paale Sepu, atua o Ekeloni, pe e au mauli anai mai te mahaki aeni.

³ Kae nee ui leva e te aselo o te Eteleno kia Elia, tagata Tisipe: Tuu ki oluga, pea ke alu o fakafetaulaki ki te u tagata avelogo a te hau o Samalia, pea ke ui kia natou: Pe e mole he Atua i Iselaele, ae e kotou olo ai o kumi kia Paale-Sepu, atua o Ekeloni?

⁴ Koia e folafola ai te Eteleno, o ui: E mole ke hifo anai mai te palepale ae e ke moe ai, koteuhi e ke mate anai. Pea nee alu leva ia Elia.

⁵ Nee toe liliu leva te u tagata avelogo kia Akasia, pea nee ui leva e Akasia kia natou: Kotea kua kotou toe liliu mai ai?

⁶ Nee natou tali leva ki te hau: Nee hake mai he tagata o fakafelavei mai kia matou, pea nee ina ui mai kia matou: Kotou olo, kotou toe toe liliu ki te hau ae nee ina fekaui mai koutou, pea kotou ui kia ia: Koeni te folafola a te Eteleno: Pe e mole he Atua i Iselaele ae e ke fekau ai ke olo o kumi kia Paale-Sepu? Koia e mole ke hifo ai anai mai te palepale aena e ke moe ai, koteuhi e ke mate anai.

⁷ Nee ui leva e Akasia kia natou: E feafeai te u mata o te tagata aena nee hau o fakafelavei mai kia koutou, pea nee ina fai kia koutou te u palalau aena?

⁸ Nee natou tali leva kia ia, ko he tagata nee teu ki ni fului manu pea nee hai i tona vakavaka he kilii pipi. Pea nee ui leva e Akasia: Ko Elia, te tagata Tisipe.

⁹ Nee fekaui leva e te hau kia Elia he pule, ae nee pule ki te toko nimagofulu mo tana kau tagata e nimagofulu. Nee hake leva te pule aena kia Elia, ae nee lala i te tumutumu o he mouga, pea nee ina ui leva kia Elia: Tagata a te Atua, kua ui mai e te hau: Ke ke hifo mai!

¹⁰ Nee ui leva e Elia ki te pule o te toko nimagofulu: Kapau ko he tagata au a te Atua, pea ke hifo te afi mai lagi, o tutu ia koe mo tau kau tagata e toko nimagofulu! Pea nee hifo leva te afi mai lagi, o tutu ia ia mo tana kau tagata e toko nimagofulu.

¹¹ Nee toe fekaui leva e Akasia kia Elia he tahi ake pule solia mo tana kau tagata e toko nimagofulu. Nee ui leva e te pule aena kia Elia: Tagata a te Atua, kua ui mai e te hau: Ke ke hifo fakavilivili mai!

¹² Nee tali leva e Elia kia natou: Kapau ko he tagata au a te Atua, pea ke hifo te afi mai lagi o tutu ia koe mo tau kau tagata e toko nimagofulu! Pea nee hifo leva te afi a te Atua mai lagi o tutu ia ia mo tana kau tagata e toko nimagofulu.

¹³ Nee toe fekaui leva e Akasia he tahi ake pule mo tana kau tagata e toko nimagofulu. Nee hake leva te tolu pule aena kia Elia; kae i tana kaku leva kia Elia, nee ina peluki leva ona tuli ia mua o Elia, pea nee ina kolekole leva, o ui: Tagata a te Atua, e au kolekole atu ke mauhiga kia koe toku mauli mo te mauli o te u tagata aeni e toko nimagofulu, ko au tagata faifekau!

¹⁴ Koeni, nee hifo mai te lagi te afi o tutu te u uluaki pule ki te toko nimagofulu ae e lua mo ana kau tagata e toko nimagofulu: kae i te lakaga nei, ke mauhiga toku mauli ki ou mata!

¹⁵ Nee ui leva e te aselo a te Eteleno kia Elia: Hifo mo ia, pea aua pe naa ke mataku kia ia. Nee tuu ake leva ia Elia, o hifo mo ia ki te hau.

¹⁶ Nee ui leva e Elia ki te hau: Koeni te folafola a te Eteleno: Koteuhi nee ke fekaui ni tagata avelogo kia Paale-Sepu, atua o Ekeloni, o hage nee mole mau i Iselaele he Atua ae e feala ke kumi ki ai, e mole ke hifo anai mai te palepale ae e ke moe ai, koteuhi e ke mate anai.

Solame, hau o Iselaele

¹⁷ Nee mate leva ia Akasia o mulimuli ki te folafola a te Eteleno ae nee fakaha e Elia. Pea nee hau leva ia Solame, tona tehina, o fetogi ia ia, koteuhi nee mole mau hona foha, i te lua tau o te hau a Solame, hau o Suta, foha o Sosafate.

¹⁸ Ko te toe o te u gaue a Akasia, mo te u mea ae nee ina fai, pe e mole tohi ia i te tohi fakamatala ki te u hau o Iselaele?