LEVITIKO 27 - Ko te Tohi Tapu i te fakauvea

Fakapapau mo te u vaega hogofulu

¹ Nee palalau leva te Eteleno kia Moisese, o ui:

² Palalau ki te u fanau o Iselaele, o ui kia natou: Ka fai anai e he tagata he fakapapau mamafa ke momoli he tahi ki te Eteleno, e ina fakahoko anai tana fakapapau, o ina foaki anai te totogi o te tagata aena, o mulimuli ki te lekula aeni.

³ Kapau ko he tahi e tau uafulu o kaku ki te tau onogofulu: ko tona totogi ko te foi sikele* paaga e nimagofulu, i te paaga o te sagatualio, ki he tagata,

⁴ pea kapau ko he fafine, e ke fakafuafua anai ko foi sikele paaga e tolugofulu.

⁵ Kapau ko he tahi e tau nima o kaku ki te tau uafulu: ko te u foi sikele paaga e uafulu ki te tama, pea ko te u foi sikele paaga e hogofulu ki te taahine.

⁶ Kapau ko he tahi e mahina tahi ki te tau nima: ko te u foi sikele paaga e nima ki te toe tagata, pea ko te u foi sikele paaga e tolu ki te toe fafine.

⁷ Kapau ko he tahi e tau onogofulu o fai ki oluga: ko te u foi sikele paaga e hogofulu ma nima ki he tagata, pea ko te u foi sikele paaga e hogofulu ki he fafine.

⁸ Pea kapau e masiva kovi he tahi ke totogi ai te paaga totonu, e ina ave anai kia mua o te u tagata faisakilifisio ia ia ae e tonu ke ina totogi; pea e fuafua anai e te tagata faisakilifisio te lahi o te totogi o mulimuli ki te mea ae e mau e te tagata aia nee ina fai te fakapapau.

⁹ Pea kapau nee fai te fakapapau o uhiga mo he manu i te u manu ae e aoga ki te u sakilifisio ki te Eteleno, e liliu anai te manu aia o tapu.

¹⁰ E mole feala anai ke toe fetogi ia ia aki he tahi age manu, pe e lelei age pee kovi age. Pea kapau e fetogi te manu aia aki he tahi age manu, e tapu anai te u manu aia e lua.

¹¹ Pea kapau nee fai te fakapapau o uhiga mo he manu uli, i te u manu ae e mole feala ke momoli ki te Eteleno i he sakilifisio, e ave anai e te tagata aia te manu ki te tagata faisakilifisio.

¹² Pea e tuku anai e te tagata faisakilifisio te totogi o te manu, o fakafuafua ki tona lelei mo tona kovi, pea e tonu leva ke fai ki te totogi aia.

¹³ Pea kapau e loto anai te tagata aia ke ina toe totogi tana manu, e ina totogi leva he tupu, ko te vaega nima o te totogi o te manu.

¹⁴ Pea kapau e fakatapui anai e he tagata tona fale ki te Eteleno, e fakaha anai e te tagata faisakilifisio te totogi o mulimuli ki te lelei mo te kovi o te fale, e fai leva ki te totogi aena.

¹⁵ Pea kapau e loto te tagata ke ina toe totogi tona fale, e ina totogi anai mo he tupu ko te vaega nima o te totogi aia kua fakaha e te tagata faisakilifisio, pea e ina toe mau anai tona fale.

¹⁶ Pea kapau e fakatapui e he tagata tana gaueaga ki te Eteleno, e fakafuafua anai tona totogi ki te lahi o te pulapula ae e to i ai. Ko te u foi sikele paaga e nimagofulu ki te u kilo fulumeto e tolugeau.

¹⁷ Pea kapau e fakatapui anai te gaueaga i te tau totonu o te supileo, e katoa anai te totogi.

¹⁸ Pea kapau e fakatapui te gaueaga i te osi o te tau o te supileo, e fuafua anai e te tagata faisakilifisio he totogi maamaa o mulimuli ki te lahi o te u tau ae kei toe ki te supileo foou.

¹⁹ Pea kapau e loto anai te tagata a ana te gaueaga ke ina toe totogi tana gaueaga, e ina totogi anai ia he tupu ko te vaega nima o te totogi ae kua fakaha e te tagata faisakilifisio.

²⁰ Pea kapau e mole ina toe totogi tana gaueaga, kae e ina fakatau anai ia ki he tahi, e mole toe feala anai ke ina totogi tana gaueaga.

²¹ I te tau o te supileo, e mau anai te gaueaga aena e te Eteleno, pea e tuku anai ia ia ki te kau tagata faisakilifisio, o hage ko he gaueaga ae kua fakatapui ki te Eteleno o heegata.

²² Pea kapau e fakatapui e he tahi ki te Eteleno he gaueaga ae kua ina osi totogi kae nee mole kau ki tona tofiga,

²³ e fakaha anai ki te tagata faisakilifisio tona totogi o mulimuli ki te lahi o te u tau ae kei toe ki te supileo foou, pea e foaki anai e te tagata aia te totogi i te aho pe aia. E fakatapui anai te paaga ki te Eteleno.

²⁴ Kae i te tau o te supileo, e toe liliu anai te gaueaga ki te tagata uluaki, ki ae nee ina mau tofiga ia ia.

²⁵ E fai anai te u totogi fuli aki te paaga o te sagatualio, ae ko kalame e hogofulu te foi sikele paaga e tahi.

Mea e tolu a te Eteleno Te u manu uluaki tupu

²⁶ E mole anai gafua ke fakatapui e he tagata ki te Eteleno he manu uluaki o tana faga manu, koteuhi e mau te u manu uluaki fuli e te Eteleno: te pipi, te akeno, mo te tao.

²⁷ Pea kapau ko he uluaki o he manu uli, e toe totogi anai ia ia o mulimuli ki tau fakafuafua, o fakalahi aki he tupu ko te vaega nima o te totogi ae kua fakaha. Pea kapau e mole toe totogi anai ia ia, e fakatau anai ia o mulimuli ki tau fuafua.

Mea kua fakatapu

²⁸ Ko mea fuli ae e fakatapui anai e he tagata o tukupau ki te Eteleno i ana mea fuli, e mole toe feala anai ke toe fakatau ia ia, pee ke toe totogi, tatau ai pee ko he tagata, pee ko he manu, pee ko he gaueaga; ko mea fuli ae e fakatapui anai o tukupau ki te Eteleno e tuku anai ki te Eteleno o heegata.

²⁹ E mole feala anai ke toe totogi ae kua fakatapui ki te Eteleno o heegata, e tamatei anai ia.

Vaega hogofulu

³⁰ E mau e te Eteleno te vaega hogofulu fuli o te u magisi o te kele pea mo te u fua o te u akau; ko he mea ia kua fakatapui ki te Eteleno.

³¹ Kapau e loto he tagata ke ina toe totogi he koga o tana vaega hogofulu, e ina fakalahi anai ia aki he vaega nima.

³² I te u pipi, mo te u ovi, mo te u tao, e fakailoga anai he manu e tahi ia manu e hogofulu ke fakatapui ia ia ki te Eteleno.

³³ E mole sioi anai pe e lelei pee kovi te manu aia, pea e mole fai anai he fetogi manu; pea kapau e fetogi anai he manu ki he tahi age manu, e tuku anai te u manu aia e lua ki te Eteleno, pea e mole feala anai ke toe totogi naua.

³⁴ Koena te u lao nee fakaha e te Eteleno kia Moisese ki te u fanau o Iselaele, i oluga o te mouga o Sinai.