LEVITIKO 1 - Ko te Tohi Tapu i te fakauvea

Failaulau

¹ Nee paui leva e te Eteleno ia Moisese, o palalau kia ia mai loto o te falela tapu, o ui:

² Palalau ki te u fanau a Iselaele, o ui kia natou: Kapau e fia fai e he tagata ia koutou hana molaga ki te Eteleno, e ina momoli anai he manu lahi, pee ko he manu veliveli.

³ Kapau ko tana molaga ki te failaulau ko he manu lahi, e ina momoli anai he manu tagata hee mele; e ina momoli anai te manu i te uluaga o te falela tapu, ke tali lelei ia ia ia mua o te Eteleno.

⁴ E ina hili anai tona nima ki te ulu o te failaulau tutu ae e tali lelei anai e te Eteleno ki te fakamolemole o ana agahala.

⁵ E ina tamatei anai te pipi tagata mui ia mua o te Eteleno; pea e momoli anai e te u tagata faisakilifisio, foha o Alone, te toto, o natou huhua ia i te takatakai katoa o te aletale ae e tuu i te uluaga o te falela tapu.

⁶ E ina too anai te u tootooga o te manu o te failaulau, pea e ina tafa anai o fakainasi.

⁷ E tafu anai e te u foha o te tagata faisakilifisio ko Alone he afi i oluga o te aletale, pea e natou tanaki ni fafie ki oluga o te afi.

⁸ E hili anai e te u tagata faisakilifisio, foha o Alone te u inasi, mo te foi ulu, pea mo te gako loto ki oluga o te fafie ae kua tanaki i te afi i oluga o te aletale.

⁹ E ina fufulu anai aki he vai te u tootooga mo te u vae, pea e tutu anai e te tagata faisakilifisio te u mea fuli aia i te fuga aletale. Ko te failaulau tutu aia, ko he failaulau kua tutu e te afi, pea ko he mea magoni lelei ki te Eteleno.

¹⁰ Pea kapau ko tana molaga ki te failaulau ko he manu veliveli, ko he akeno tagata mui pee ko he tao tagata mui e ina momoli anai he manu tagata hee mele.

¹¹ E ina tamatei anai te manu i te potu noleto o te aletale, ia mua o te Eteleno; pea e huhua anai e te tagata faisakilifisio, foha o Alone, te toto o te manu i te takafoli katoa o te aletale.

¹² E ina tafa inasi anai te manu; pea e hili anai e te tagata faisakilifisio te u inasi, o fakatahi mo te foi ulu mo te gako loto ki oluga o te fafie ae kua tanaki i te afi i oluga o te aletale.

¹³ E ina fufulu anai te gakau aki he vai pea mo te u vae; pea e tutu anai e te tagata faisakilifisio te u mea fuli i oluga o te aletale. Ko he failaulau tutu ia, ko he failaulau ia kua tutu e te afi, pea ko he mea magoni lelei ia ki te Eteleno.

¹⁴ Pea kapau ko tana molaga ki te Eteleno, ko he manulele ki te failaulau, e ina momoli ni kulukulu pee ko ni lupe kei mui.

¹⁵ E momoli anai e te tagata faisakilifisio te manulele i oluga o te aletale; e ina motuhi anai te foi ulu aki tona paninia, pea e ina tutu anai ia ia i oluga o te aletale; pea e ina fakahali anai te toto ki he fahai o te aletale.

¹⁶ Pea e ina too anai tona kete mo tona otaota o li ki te aletale, ki te potu esite, ki te kogamea ae e laku ki ai te u lefulefu.

¹⁷ E ina haei anai te manulele i te lotomalie o te u pakakau, kae e mole ina motuhi osi anai ia. Pea e tutu anai e te tagata faisakilifisio te manulele i te fuga aletale, i oluga ake o te fafie ae kua tanaki i te afi. Ko he molaga ia o te failaulau, ko he sakilifisio ia kua tutu e te afi, ko he mea magoni lelei ia ki te Eteleno.