HAPAKUKE 1 - Ko te Tohi Tapu i te fakauvea

Ko te tagi a Hapakuke

¹ Ko te folafola kikite nee fakaha ki te polofeta ko Hapakuke.

² E kaku anai ki afea, oi Eteleno?… Nee au tagi, Kae e mole ke fakalogo mai! Nee au kalaga kia koe o tupu ko te agamalohi, Kae e mole ke tokoni mai!

³ Kotea e ke fakasio ai au ki te agakovi, Pea e ke sio ai ki te hee faitotonu? Kotea e tuu ai te fakataga mo te fakamalohi i oku mua? I te u kogamea fuli, e malaga ake ni fakamaau mo ni ke.

⁴ Koia e mole kei mauli ai te lao, E mole kei malohi ai te faitotonu: Koteuhi kua malo te tagata agakovi i te tagata faitotonu, Pea kua halahala te u fakamaau.

Fakaha o te tautea o Suta

⁵ Koutou haga okotou mata ki te atu puleaga, pea koutou sisio, Pea koutou punamauli, pea koutou matataku! Koteuhi e au fai anai he gaue i tokotou temi, Ae e mole koutou tui anai ki ai moka fakamatala ia ia.

⁶ Koeni, e au lagai anai te kau Kaletea, He hahai itaita mo malolohi, Ae e haele i ni fenua lalahi o too ni nofoaga o ni ihi.

⁷ Ko he hahai mamalu mo fakamatakutaku; E fakalogo pe ia ia kia ia mo tona malohi.

⁸ E gaholo age ana hosi i te u leopale*, Pea e natou makamu age i te u lupo o te afiafi. E haele ana tagata heka hosi i te fiamealahi, E omai ana tagata heka hosi mai mamao, E natou felelei o hage ko te akuila ae e oho ki tana meakai.

⁹ E omai te hahai katoa aia ki te kaihaa. E sio ona mata manumanu ki mua, Pea e ina fakatahii ni kau pilisoni o hage ko te one.

¹⁰ E kata ia ia ki te u hau, Pea e nukinuki ia ia ki te u pule. E kata ia ia ki te u kolo tau fuli, E ina fakatuuga ni kele, pea e ina too natou.

¹¹ Pea e ina liuga lua tona malohi, E ina hoko atu tana haele, pea e asilisili age tana agahala. Ko tona malohi o ona, koena tona atua!

¹² Pe e mole ke afio mai te heegata, Eteleno, toku Atua, toku Sagato? E mole matou mamate anai! Oi Eteleno, nee ke fakanofo te hahai aeni ke ina fai au fakamaauaga; Oi toku utu, nee ke lagai ia ia ke ina tuku au tautea.

¹³ E maa osi ou mata ke sio ki te kovi, Pea e mole feala ke ke sio ki te agakovi. Kotea e ke sio ai anai ki te kau agatuu, pea ke fakaheeheegu anai, Kae lolotoga kai e te tagata agakovi ia ia ae e agatonu age ia ia?

¹⁴ Pe e ke fai anai ki te tagata o hage ko te u ika o te tai, O hage ko te manu totolo ae e mole hona pule?

¹⁵ E ina toho ake natou fuli aki te matau, E ina aumai natou ki tona kupega, E ina tanaki natou ki ana kenu. Koteuhi e lahi anai tona fiafia mo tona nekenekea ia natou.

¹⁶ Koia e ina momoli ai ni sakilifisio ki tona kupega, E ina tutu he iseso aki ana kenu; Koteuhi e ina mau ni meakai gako mo kano lelei i te u mea aia.

¹⁷ Pe e gata anai afea tana toho tona kupega? Pe e gata anai afea tana tamatei kovii te atu puleaga?