Tohi a Paulo ki te kau KALATE 1 - Ko te Tohi Tapu i te fakauvea

Fakaalofa

¹ Ko au Paulo, ko te apositolo, mole mai te u tagata, pee i he tagata, kae maia Sesu-Kilisito pea mo te Atua te Tamai, ae nee ina fakatuuake ia mai te kau mate,

² pea mo te u tehina fuli e nonofo mo au, ki te u Ekelesia o Kalatia:

³ Ke foaki atu kia koutou te kalasia mo te tokalelei e te Atua ko te Tamai pea mo te Aliki ko Sesu-Kilisito,

⁴ ae nee ina foaki ia ia o uhiga mo atatou agahala, pea ke taaki ai tatou mai te sekulo kovi aeni, o mulimuli ki te finegalo o totatou Atua mo Tamai,

⁵ ae e tuku ki ai te kololia i te u sekulo mo sekulo! Ameni!

Siaki o te Evaselio mooni e te kau Kalate

⁶ E au punamauli i takotou situa vave kia ia ae nee ina paui koutou i te kalasia o Kilisito, o fakalaka ki he tahi age Evaselio.

⁷ Ko te mooni e mole he tahi age Evaselio, kae e i ai ni hahai e natou fakamaveuveu koutou pea e natou loto ke fetogi te Evaselio a Kilisito.

⁸ Kae kapau ko matou totonu, pee ko he aselo mai lagi, nee matou fakaha kia koutou he Evaselio e fehagai mo te Evaselio nee matou akonaki atu kia koutou, ke malaia ia!

⁹ Nee matou fakaha atu ia i mua, pea e au toe liuga atu ia i te hola aeni: Kapau nee fakaha atu e he tahi he Evaselio e fehagai mo te Evaselio nee koutou tali, ke malaia ia!

¹⁰ Pea i te temi nei, pe ko te ofa o te tagata ae e au holi ki ai, pee ko ae o te Atua? Pe e au kumi ke au lelei ki te tagata? Kapau kei au lelei ki te tagata, pea e mole ko te tagata faifekau leva au a Kilisito.

Tafoki mo te vokasio o Paulo

¹¹ E au fakapapau atu kia koutou, u tehina, ko te Evaselio ae nee au akonaki atu nee mole hau mai he tagata;

¹² koteuhi nee mole au tali ia pee nee au ako ia mai he tagata, kae maia Sesu-Kilisito ae nee ha mai kia au.

¹³ He kua kotou logo ki taku aga i mua i te lotu fakasutea, mo taku fakatagai te Ekelesia o te Atua, pea mo taku maumaui ia ia;

¹⁴ pea mo taku fakalaka mamao i te tauhi ki te lotu fakasutea i he kaugamalie o toku taitupu mo toku hahai, koteuhi nee au tauhi lelei age ia natou ki te u talatisio o taku u tamai.

¹⁵ Kae, i te finegalo lelei o te Atua, ae nee ina vahei kehe au mai te fatu o taku fae, ae nee ina paui au aki tona kalasia,

¹⁶ ki te fakaha o tona Alo ia au, ke au fakaha ia i te hahai pagani, i te temi pe aia, nee mole au kumi he tokoni ki te kakano mo te toto,

¹⁷ pea nee mole pe au hake ki Selusalemi, kia natou ae nee apositolo mua atu ia au, kae nee au alu ki Alapia; pea nee au toe liliu mai ki Tamaso.

¹⁸ Hili tau e tolu, nee au hake leva ki Selusalemi o feiloiaki mo Kefasi, pea nee au nofo ia aho e hogofulu ma nima i tona api;

¹⁹ kae nee mole au sio ki he tahi ake o te kau apositolo, gata pe kia Sakopo, te tehina o te Aliki.

²⁰ I te mea aeni e au faitohi atu kia koutou, koeni, ia mua o te Atua, e mole pe au loi.

²¹ Pea nee hili aia, nee au alu leva ki te u fenua o Silia mo Silisia.

²² I te temi aena, nee heeki iloi oku mata e te u Ekelesia o Sutea ia Kilisito;

²³ kae nee gata pe i tanatou logo ki te palalau: ko ae nee ina fakatagai tatou i mua e ina fakamafola i te temi nei te tui ae nee faiga ia ke maumaui.

²⁴ Pea nee natou fakakololia leva ki te Atua o uhiga mo au.