FILEMO 1 - Ko te Tohi Tapu i te fakauvea

Fakaalofa

¹ Ko au Paulo, ko te tagata pilisoni a Sesu-Kilisito, pea mo te tehina ko Timoteo, kia Filemo, ko toma ofaaga mo toma kaumea i te gaue,

² ki te tuagaane ko Afia, mo Alesipe ko toma kaumea i te tau, pea mo te Ekelesia e fakatahi i tou lotofale:

³ Ke foaki atu kia koutou te kalasia mo te tokalelei e te Atua ko tatatou Tamai pea mo te Aliki ko Sesu-Kilisito!

⁴ E au fakafetai ki toku Atua, o lau mau aipe ia koe i aku faikole,

⁵ koteuhi e au mau logo o uhiga mo te tui e ke mau ki te Aliki Sesu, pea mo tou ofa ki te kau sagato fuli.

⁶ E au kole ki te Aliki o uhiga mo te komunio ae e ina hai ia koe kia maua i te tui ke ina fakatupu he iloilo e lelei age o uhiga mo te u mea fuli e tou mau i totatou mauli fakatahi mo Kilisito.

⁷ Koia nee au logoi ai he fiafia lahi mo he fakafimalie uhi ko tou ofa; he ne ke fakafimaliei, tehina, te loto o te kau sagato.

Kole a Paulo o uhiga mo Onesime

⁸ Koia, logo pe e au mau ia Kilisito te ateaina katoa ke au fakatotonu atu kia koe te mea e tonu ke ke fai,

⁹ kae e lelei age, i te higoa o te ofa, ke au fai atu kia koe he kole, e au i toku uhiga totonu ko he matua, pea i te temi nei ko te tagata pilisoni foki a Sesu-Kilisito.

¹⁰ E au kole atu kia koe, o uhiga mo taku fanau nee au fanaui i oku seini, ia Onesime,

¹¹ i te temi mua nee mole aoga ia kia koe, kae i te temi nei kua aoga ia kia koe pea mo au.

¹² E au liufaki atu ia kia koe, ia ia ko toku mafu.

¹³ Nee au fia taofi ia i oku tafa, ke tauhi ia kia au o fetogi koe, i te temi aeni e au nofo ai i te u seini uhi ko te Evaselio.

¹⁴ Kae nee mole au fia fai he mea e mole ke loto ki ai, koteuhi e mole tonu tou ofa ke hage ko he fakamaua, kae ke ke fai ia i te loto lelei.

¹⁵ Naa mea age nee mavae ia maia koe i he kii temi noa, koteuhi ke ke toe mau ia ki te heegata,

¹⁶ kae e mole kei hage ia ko hau kaugana, kae kua maoluga age ia i te kaugana, o hage ia ko he tehina ofaina. Ko he tehina ofaina ia kia au tafito, kae e toe kehe age tona mauhiga kia koe, o mole pe ko hau kaugana ia ia, kae ko hou tehina ofaina foki ia i te Aliki.

¹⁷ Koia, kapau e ke lau au ko tou kaumea, ke ke tali ia o hage ko au totonu.

¹⁸ Pea kapau nee ina fai he kovi kia koe, pee e tuu maua ia kia koe, lau ia kia au.

¹⁹ Ko au Paulo, e au faitohi atu i toku nima totonu, e au totogi anai ia kia koe: kae e mole au ui atu kia koe e ke tuu maua kia au.

²⁰ Io, tehina, e au fia mau maia koe te tokoni aia i te Aliki; fakafimalie toku loto ia Kilisito.

²¹ Kua au faitohi atu kia koe i taku falala ki tau fakalogo, pea e au iloi e ke fai anai o lahi age i te mea e au ui atu ki ai.

²² Pea ko te tahi mea, ke ke teuteui mai kia au he nofoaga, koteuhi e au falala, aki akoutou faikole, kua vave pe toku tuku atu kia koutou.

²³ E ofa atu kia koe ia Epafalasi, toku kaumea i te pilisoni ia Sesu-Kilisito,

²⁴ mo Maleko, mo Alisitake, mo Temasi, mo Luka, oku kaumea i te gaue.

²⁵ Ko te kalasia o totatou Aliki ko Sesu-Kilisito ke nofo i tou loto!