ESITELE 1 - Ko te Tohi Tapu i te fakauvea

Kaitahi a te hau ko Asuelusi

¹ Nee hoko te hisitolia aeni i te temi o Asuelusi, te Asuelusi ae nee pule i Initia o kaku ki Etiopia ki te u fenua e teau uafulu ma fitu.

² I te aho aia nee heka te hau ko Asuelusi i tona hekaaga fakahau i Suse, ko te kolo mua.

³ I te tau tolu o tana hau, nee ina fai leva he kai lahi ki te u aliki fuli o tona puleaga pea mo ana tagata faifekau; pea nee fakatahitahi leva te u pule o te kau tau o Pelesi mo Meti, mo te kau lalahi pea mo te kau pule fenua fuli ki ona mua.

⁴ Nee ina fakaha leva i ni tuuga aho te lahi o te u koloa o tona puleaga pea mo te matalelei o tona kololia, ia aho e teau valugofulu.

⁵ I te hili o te u aho aia, nee fai leva he kai e te hau ki te hahai katoa ae nee nonofo i Suse ko te kolo mua, lolotoga aho e fitu, i te malae o te fale o te hau.

⁶ Nee nonoo ni foi kie hina, mo fuluihega pea mo uui aki te maea nilo hina mo kula, pea nee fakamau te u foi kie aki ni mama siliva ki ni pou maka hihina. Nee tuu ni palepale aulo mo siliva i te faliki o te fale ae nee fai aki te polefile*, mo te malepe*, mo te nakele* pea mo ni maka uli.

⁷ Nee ohu te meainu i ni ipu aulo, pea nee kehekehe fuli te u ipu, pea nee tafe te vino o gali mo te hau, o fakatatau ki te koloa to a te hau.

⁸ Kae nee mole pe fakamalohi he tahi ke inu, koteuhi nee fakatotonu e te hau ki te hahai katoa o tona fale ke mulimuli ki te loto o te tagata taki toko tahi.

⁹ Pea nee fai foki e te fafine hau ko Vaseti he kai lahi ki te u fafine i te fale o te hau ko Asuelusi.

Agatuu a te fafine hau ko Vaseti

¹⁰ I te fitu aho, i te fiafia o te loto o te hau i te vino, nee fakatotonu leva e te hau ko Asuelusi kia Meumani, mo Pisita, mo Alepona, mo Pikita, mo Apakita, mo Setale, pea mo Kalekasi, ko te u enuke e toko fitu ae nee tauhi kia ia,

¹¹ ke aumai ki ona mua te fafine hau ko Vaseti, mo te pale fakahau, o tupu ke fakaha tona finemui ki te hahai pea mo te kau lalahi, koteuhi nee taulekaleka osi ia ia.

¹² Kae nee mole fia hau te fafine hau ko Vaseti, i tana mau te fakatotonu a te hau i te kau enuke. Koia nee itaita lahi osi leva te hau, pea nee kukula katoa leva ia ia i tona ita.

¹³ Pea nee palalau leva te hau ki te kau poto, ae nee natou iloi te temi. Koteuhi nee fai fenai te u mea fuli a te hau, ia mua o natou fuli ae nee natou iloi te u lao mo te fakamaau.

¹⁴ Nee nonofo i ona tafa ia Kalesena, mo Setale, mo Atemate, mo Talesisi, mo Melese, mo Malesena, pea mo Memukani, ko te u aliki e toko fitu o Pelesi mo Meti, ae nee sisio ki te u mata o te hau, pea nee natou mau te u tuulaga lalahi o tona puleaga.

¹⁵ Nee ina ui leva kia natou: Kotea te lao ae e tonu ke tuku ki te fafine hau ko Vaseti, o tupu ko tana fakafisi ki te fai o te fakatotonu a te hau ko Asuelusi i te kau enuke?

¹⁶ Nee tali leva e Memukani ia mua o te hau mo te u aliki: Nee mole gata pe ki te hau ae nee fai ki ai te mea kovi aena e te fafine hau ko Vaseti; kae ki te u aliki fuli mo te hahai fuli foki ae e nonofo i te fenua fuli o te puleaga o te hau ko Asuelusi.

¹⁷ Koteuhi e kaku anai ki te u fafine fuli te mea ae nee fai e te fafine hau, pea e tupu ai anai ia natou te fia nukinuki ki onatou ohoana, o natou ui anai: Nee fakatotonu e te hau ko Asuelusi ke aumai ki ona mua te fafine hau ko Vaseti, pea nee mole alu ia ia.

¹⁸ I te aho aia, e fakamatala anai e te u fafine aliki o Pelesi mo Meti, ae e logo anai ki te mea ae nee fai e te fafine hau ko Vaseti, ki te kau aliki fuli a te hau; pea e tupu ai anai he nukinuki lahi mo he ita lahi.

¹⁹ Koia kapau e lelei ia ia ki te hau, pea ke ina fai he lao fakahau, pea ke tohi ia ia i te lao a te kau Pelesi mo te kau Meti, o tupu ke aua naa toe maumaui ia ia, pea ke aua naa toe ha te fafine hau ko Vaseti ia mua o te hau ko Asuelusi, pea ke foaki e te hau tona tuulaga ko te fafine hau ki he tahi age ae e lelei age ia ia.

²⁰ E tonu ke iloi te lao a te hau i tona puleaga katoa, logo ai tona lahi, pea ke fakaapaapa te u fafine fuli ki onatou ohoana, maia ia ae e lahi kia ia ae e veliveli.

²¹ Nee lelei leva te tonu aia ki te hau mo te kau aliki, pea nee fai leva e te hau o mulimuli ki te palalau a Memukani.

²² Nee fakamomoli leva e te hau ko Asuelusi ni tohi ki te u fenua fuli o tona puleaga, ki te fenua taki tahi o mulimuli ki tana faitohi pea mo te hahai taki tahi o mulimuli ki tana lea; pea nee fakamaua e te u tohi aia ke pule te tagata i tona fale, pea ke palalau ia ia i te lea o tana hahai.