Tohi a Paulo ki te kau EFESO 6 - Ko te Tohi Tapu i te fakauvea

Fanau mo matua

¹ U fanau, kotou fakalogo ki akotou matua i te Aliki, he ko te mea aia e tonu.

² Fakaapaapa ki tau tamai mo tau fae, ko te uluaki fakatotonu aia, pea e muli i ai he fakapapau,

³ koteuhi ke ke mau te manuia mo te mauli loa i te kele.

⁴ Pea ko koutou, u tamai, aua naa koutou fakatupu ita ki akotou fanau, kae ke koutou taupau natou o tuku he ako pea mo he lekula i te Aliki.

Pule mo te u tagata faifekau

⁵ U faifekau, kotou fakalogo ki okotou pule fakamalama, i te mataku mo te lulu, i te loto faigafua, o hage kia Kilisito,

⁶ o mole gata pe i onatou mua, o hage ke matalelei ki te u tagata, kae o hage ko ni tagata faifekau a Kilisito, ae e natou fai i te lotokatoa te finegalo o te Atua.

⁷ Koutou tauhi natou i te lotolelei, o hage e kotou tauhi ki te Aliki kae mole ki ni tagata,

⁸ o kotou iloi e tali anai e te tagata takitahi, pee popula, pee ateaina, mai te Aliki o mulimuli ki te lelei nee ina fai.

⁹ Pea ko koutou, u pule, koutou fai fena kia natou, pea aua naa koutou fakamatakui natou, ke kotou iloi e i te lagi tonatou pule mo tokotou, pea e mole ina fakakehei he tahi i ona mua.

Mahafu a te kilisitiano

¹⁰ Fakaosi, kotou fakamalohii koutou i te Aliki, pea kotou fakamalohii aki tona malohi mafimafi.

¹¹ Kotou kofu te u mahafu tau fuli a te Atua, ke feala ai takotou tuu o fehagai ki te u puleaki kaka a te tiapolo.

¹² He ko tatatou tau e mole ko he tau fakafehagai ki te kakano mo te toto, kae fakafehagai ki te u lagiaki, mo te u pule, mo te u aliki o te malama aeni o te fakapouli, mo te u laumalie agakovi i te u potu fakalagi.

¹³ Koia, kotou too te u mahafu tau fuli a te Atua, ke feala ai takotou tuu mau i te aho kovi, pea mo takotou tutuu malohi moka osi takotou malo i te u mea fuli.

¹⁴ Koia, kotou tuu ke mau: Kotou tui i okotou vakavaka te kilii pipi o te mooni, kotou tui ki te fatafata te kofu tau o te faitotonu,

¹⁵ kotou tui ki okotou vae te u sulie o te mafi e foaki e te Evaselio o te tokalelei;

¹⁶ kotou too i oluga o te u mea fuli aena te paletau o te tui, ke feala ai takotou tamatei te u nahau uloulo fuli a te tagata kovi;

¹⁷ kotou too foki te puloga tau o te fakamauli, mo te heleta a te Laumalie, ae ko te folafola a te Atua.

¹⁸ Kotou fai i te temi fuli aki te Laumalie te u kole kehekehe fuli pea mo ni tagi. Kotou tokaga ki te mea aena mo he kataki katoa, pea kotou hufaki te kau sagato fuli.

¹⁹ Kotou hufaki au, ke foaki mai kia au, mo ka au avahi toku gutu, ke au fakaha i te loto toa pea mo te ateaina te misitelio o te Evaselio,

²⁰ ae kua au hoko ai ko tona fakafofoga kua hai ki te u seini, pea ke au toa i te palalau, he ko te maua ke au palalau ki ai.

Fakaalofa

²¹ Pea ke kotou iloi foki te mea o uhiga mo au, mo te mea e au fai, ko Tisike, te tehina ofaina mo te faifekau agatonu a te Aliki, e ina fakaha atu anai kia koutou te u mea fuli.

²² Kua au fekaui tafito atu ia kia koutou, ke kotou iloi tomatou aluaga, pea ke ina fakafimaliei okotou loto.

²³ Ke foaki te tokalelei, mo te ofa, pea mo te tui ki te u tehina e te Atua ko te Tamai pea mo te Aliki ko Sesu-Kilisito!

²⁴ Ke nofo te kalasia ia natou fuli e ofa ki totatou Aliki ko Sesu-Kilisito i he ofa hee popo.