EKESOTE 1 - Ko te Tohi Tapu i te fakauvea

Popula o Iselaele i Esipito

¹ Koeni te u higoa o te u foha o Iselaele, ae nee hihifo ki Esipito mo Sakopo pea mo onatou famili taki tahi.

² Ko Lupeni, mo Simeone, mo Levi, mo Suta,

³ mo Isakale, mo Sapulone, mo Pesamino,

⁴ mo Tane, mo Nefetali, mo Kate, mo Asele.

⁵ Ko natou fuli aia nee hihifo maia Sakopo ko te toko fitugofulu. Nee nofo ia Sosefo i te temi aia i Esipito.

⁶ Pea nee mate leva ia Sosefo, mo ona tehina fuli pea mo te taitupu katoa aia.

⁷ Nee fanaunau leva te u fanau a Iselaele o lahi osi, pea nee natou liliu leva o malolohi mo mauhiga. Pea nee fonu leva te fenua ia natou.

⁸ Nee malaga ake leva i Esipito he hau foou, ae nee mole ina iloi ia Sosefo.

⁹ Pea nee ina ui leva ki tana hahai: Koeni kua liliu te u fanau a Iselaele ko he hahai kaugamalie mo malohi age ia tatou.

¹⁰ Koeni, ke tou tokaga kia natou; ke tou fai ni puleaki ke aua naa natou lalahi age ia tatou, koteuhi naa hoko anai he tau, pea e natou kau anai mo otatou fili o taui tatou, pea e natou mavae anai i te fenua.

¹¹ Pea nee fakanofo leva ni pule gaue, o tupu ke natou fakamamahii natou aki ni kavega mamafa. Koia nee fakatuu ai leva te u kolo ko Pitomi mo Lamisese, ke tanaki ai te u koloa o Falaone.

¹² Kae nee logo ai tonatou fakamamahii, nee toe asilisili age tonatou kaugamalie mo tonatou malohi; nee toe asilisili age te fehia ki te u fanau a Iselaele.

¹³ Koia nee fakapopulai kovi leva e te kau Esipito te u fanau a Iselaele.

¹⁴ Nee natou fakamamahii tonatou mauli aki ni gaue mamafa ki te kelepulu, mo te fau piliki, pea mo te u gaue kehekehe i te u gaueaga. Pea nee natou fakamaua kia natou te u gaue fuli aia aki te agafakapo.

¹⁵ Pea nee palalau foki te hau o Esipito ki te u fafine faifanau a te kau Hepeleo, ko te tahi nee higoa ko Sifela, pea ko te tahi ko Pua.

¹⁶ Nee ina ui leva kia naua: Ka kolua fakafanau anai te u fafine a te kau Hepeleo, pea kapau e kolua sisio anai i te to age o te fanau, ko he fanau tagata, pea kolua tamatei ia ia, kae kapau ko he fanau fafine, pea kolua tuku ia ia ke mauli.

¹⁷ Kae nee matataku leva te u fafine faifanau ki te Atua, pea nee mole na fakalogo leva ki te mea ae nee ui ki ai e te hau o Esipito; kae nee na tuku leva ke mauli te u fanau.

¹⁸ Pea nee paui leva e te hau o Esipito te u fafine faifanau, o ui kia naua: Kotea nee kolua fai feia ai, kotea nee kolua tuku ai ke mauli te u fanau?

¹⁹ Nee tali leva e te u fafine faifanau kia Falaone: E tupu e mole tatau te u fafine a te kau Hepeleo mo te u fafine a te kau Esipito; e natou malolohi pea e natou fanau i mua o te kaku atu a te fafine faifanau.

²⁰ Nee tapuaki leva e te Atua ki te u fafine faifanau; pea nee liuliuga leva te kau Iselaele, o liliu leva o kaugamalie osi.

²¹ Koteuhi nee matataku te u fafine faifanau ki te Atua, nee tapuakii leva e te Atua ona famili.

²² Pea nee tuku leva e Falaone te fakatotonu aeni ki tana hahai katoa: E koutou li anai ki te vaitafe te u fanau tagata fuli ae e tupu anai, kae e koutou tuku anai ke mauli te u fanau fafine fuli.