Tohi a Paulo ki te kau KOLOSE 1 - Ko te Tohi Tapu i te fakauvea

Fakaalofa

¹ Ko au Paulo, ko te apositolo a Sesu-Kilisito i te finegalo o te Atua, pea mo te tehina ko Timoteo,

² ki te kau sagato mo te u tehina agatonu ia Sesu-Kilisito i Kolose: Ko te kalasia mo te tokalelei ke foaki atu kia koutou e te Atua ko tatatou Tamai!

Fakafetai mo te kole a Paulo

³ E ma fakafetai ki te Atua, te Tamai o totatou Aliki ko Sesu-Kilisito, pea e mole toe gata tama faikole o uhiga mo koutou,

⁴ talu mai tama logo o uhiga mo takotou tui kia Sesu-Kilisito pea mo tokotou ofa ki te kau sagato fuli,

⁵ uhi ko te falala kua taofi atu kia koutou i te atu lagi, aia nee koutou fua logo ki ai i te fagonogono o te mooni, te folafola o te Evaselio.

⁶ E nofo ia i lotomalie o koutou, pea mo te malamanei katoa; pea e ina mau ni fua, pea e mafola ia, o hage foki ko tana fai ia koutou, talu mai te aho nee kotou fagono ai pea mo iloi ai te kalasia o te Atua i te mooni,

⁷ o mulimuli ki te akonaki nee kotou tali maia Epafalasi, toma kaumea ofaina i te gaue, ae ko he faifekau agatonu a Kilisito kia koutou,

⁸ pea nee ina fakaha mai kia maua te lahi o te ofa e fakaalaala e te Laumalie ia koutou.

⁹ Koia ko maua foki, talu mai te aho nee ma logo ai ki te mea aia, e mole kei gata tama faikole ki te Atua o uhiga mo koutou; e ma kole ke kotou fonu i te iloi o tona finegalo, i te poto katoa pea mo te atamai fakalaumalie,

¹⁰ ke kotou haele o gali mo te Aliki, pea ke kotou lelei kia ia i te u mea fuli, pea ke kotou mau ni fua o lahi i te u gaue lelei kehekehe, pea ke kotou tupu o lahi i te iloi o te Atua,

¹¹ pea ke fakamalohii koutou e tona malohi fakakololia, ke kotou matatali te u mea fuli i te fiafia, pea ke kotou kataki tuumau.

¹² Koutou fakafetai ki te Tamai, ae kua feala ai ke kotou kau i te tofiga o te kau sagato i te malama;

¹³ nee ina haofaki tatou mai te malohi o te fakapouli pea nee ina hiki ake tatou ki te puleaga o tona Alo ofaina,

¹⁴ ae e tou mau ai te totogi, pea mo te fakamolemole o te u agahala.

Maoluga kehe o Kilisito

¹⁵ Ko te Alo ko te paaki ia o te Atua ae e mole tou sio mata ki ai, ko te uluaki tupu ia o te u mea fuli nee fakatupu.

¹⁶ Koteuhi nee ina fakatupu te u mea fuli, ae i te atu lagi pea mo ae i te kele, mo te u mea e ha pea mo te u mea e mole ha, pee ko te u nofoaga hau, pee ko te u nofoaga fakaaliki, pee ko te kau malohi, pee ko te kau pule. Nee ina fakatupu te u mea fuli ma ana.

¹⁷ E mua ia i te u mea fuli, pea e tuu te u mea fuli ia ia.

¹⁸ Ko te ulu ia ia o te sino, o te Ekelesia; ko te kamataaga ia, ko te uluaki tupu ia mai te kau mate, o tupu ke uluaki ia ia i te u mea fuli.

¹⁹ Koteuhi nee loto te Atua ke nofo te u katoaga fuli ia ia;

²⁰ pea nee loto ia ke fakatokatoka ia ia te u mea fuli mo ia totonu, tatau te u mea i te kele pea mo te u mea i te lagi, o fakatuu te tokalelei ia ia aki te toto o tona koluse.

²¹ Pea ko koutou, ae nee matapule i mua pea nee fili i akotou manatu mo akotou gaue kovi, kua ina fakatokatoka koutou i te temi nei aki tona mate i te sino o tona kakano,

²² ke ina fakaha koutou i ona mua, e kotou maonioni, mo hee mele, pea mo hee vavalo,

²³ mo kapau e kotou tuu mau i te tui, o mole kotou maliu kehe mai te falala o te Evaselio ae nee kotou fagono ki ai, ae nee fakaha ki te u tagata fuli i te lalo lagi, pea kua au hoko ai, ia au Paulo, ko tona tagata gaue.

Te tau a te apositolo

²⁴ E au fiafia i te i temi nei i oku mamahi o uhiga mo koutou; pea ko te mea ae e puli i te u mamahi o Kilisito, e au fakakatoa ia i toku kakano, o uhiga mo tona sino, ia te Ekelesia.

²⁵ Pea nee fakanofo au ko te tagata gaue ki te Ekelesia aia o mulimuli ki te kavega ae nee tuku mai e te Atua kia au, o uhiga mo koutou, ke au fakaha te folafola katoa a te Atua,

²⁶ te misitelio ae nee fufu talu mai te u sekulo fuli, mo te u taitupu fuli, pea kua fakaha i te lakaga nei ki tana kau sagato.

²⁷ Nee finegalo te Atua ke ina fakaha kia natou aia te lahi o te u koloa o te kololia o te misitelio aeni i te lotolotoga o te kau pagani, ke iloi: Kilisito ia koutou, ko te falala o te kololia.

²⁸ E ko ia ae e ma fakaha, pea e ma kole ki te tagata fuli, pea e ma fakapotoi te tagata fuli i te katoa o te poto, ke ma momoli ki te Atua te tagata fuli kua katoa ia Kilisito.

²⁹ Ko te tupuaga aia o taku gaue, pea e au tau aki tona malohi ae e gaue malohi ia au.