AKESEO 1 - Ko te Tohi Tapu i te fakauvea

Fakamalohii o te hahai ke toe lagai te fale tapu

¹ I te lua tau o te hau ko Taliusi, i te uluaki aho o te mahina ono, nee tuku leva te folafola a te Eteleno ki te polofeta ko Akeseo, kia Solopapele, foha o Saletiele, kovana o Suta, kia Sosue, foha o Sotesatake, tagata faisakilifisio lahi, i te u kupu aeni:

² E folafola te Eteleno o te atu fua tau: E ui e te hahai aeni: E heeki hoko mai te temi, te temi ke toe laga ai te fale o te Eteleno.

³ Koia nee tuku ai te folafola a te Eteleno kia natou ia Akeseo, te polofeta, i te u kupu aeni:

⁴ Pe ko te temi aeni ke koutou nonofo ai i okotou fale aofi papa, Kae kua maumau te fale aeni?

⁵ Koia e folafola ai i te aho nei te Eteleno o te atu fua tau, o ui: Koutou fakakaukau ki okotou ala!

⁶ Kua lahi takotou nunusi, kae siisii takotou utu, E koutou kai, kae e mole kotou makona, E kotou inu, kae e mole kotou malie, E koutou kofu, kae e mole kotou mafana, Ko te totogi o ae e gaue paaga, E to ki he taga pu.

⁷ Koia e folafola ai te Eteleno o te atu fua tau: Kotou fakakaukau lelei ki okotou ala!

⁸ Kotou hahake ki te mouga, kotou aumai ni akau, Pea kotou laga te fale: E au mau anai i ai toku fiafia, pea e au kololia ai anai, E folafola te Eteleno.

⁹ Nee kotou amanaki ki he mea lahi, Kae koeni e kotou mau he kii mea siisii pe; Nee kotou fakaulu ia ia ki okotou fale, kae nee au puhii ia ia. Kotea tona tupuaga? E ui e te Eteleno o te atu fua tau. O tupu ko toku fale, ae kua maumau, Kae kua kotou tahi feohoaki ki tona fale.

¹⁰ Koia kua fakafisi ai e te atu lagi tona hahau kia koutou, Pea kua taofi ai e te kele ona fua.

¹¹ Nee au aumai te tai laa ki te fenua, ki te u mouga, Ki te fulumeto, ki te vino, ki te lolo, Ki te u mea fuli ae e feala ke mau mai te kele, Ki te tagata mo te u manu, Pea ki te u gaueaga fuli o te u nima.

¹² Ko Solopapele, foha o Saletiele, mo Sosue foha o Sotesatake, te tagata faisakilifisio lahi, pea mo te toega fuli o te hahai, nee natou logo leva ki te leo o te Eteleno, tonatou Atua, pea mo te u folafola a Akeseo, te polofeta, o mulimuli ki te fekau ae nee tuku kia ia e te Eteleno, tonatou Atua. Pea nee mau leva e te hahai he mataku ki te Eteleno.

¹³ Nee ui leva e Akeseo, te tagata faifekau a te Eteleno, ki te hahai, o mulimuli ki te fakatotonu a te Eteleno: E ui e te Eteleno: E au nofo mo koutou.

¹⁴ Nee fafagu leva e te Eteleno te laumalie o Solopapele, foha o Saletiele, kovana o Suta, pea mo te laumalie o Sosue, foha o Sotesatake, te tagata faisakilifisio lahi, pea mo te laumalie o te toega katoa o te hahai. Nee natou omai leva, pea nee natou kamata leva te gaue i te fale o te Eteleno o te atu fua tau, tonatou Atua,

¹⁵ i te aho uafulu ma fa o te mahina ono, i te lua tau o te hau ko Taliusi.