Lua tohi a Paulo kia TIMOTEO 1 - Ko te Tohi Tapu i te fakauvea

Fakaalofa

¹ Ko Paulo, apositolo a Sesu-Kilisito i te finegalo o te Atua, ke ina fakaha te fakapapau o te mauli ae e mau ia Sesu-Kilisito,

² kia Timoteo, taku fanau ofaina: Ko te kalasia, mo te manavaofa, pea mo te tokalelei ke tuku atu kia koe e te Atua te Tamai pea mo Sesu-Kilisito totatou Aliki!

Fakamalohi kia Timoteo

³ E au fakafetai ki te Atua, ae nee tauhi ki ai aku tamai, pea e au tauhi ki ai i he loto maa, e au manatui tuumau koe, po mo aho, i aku faikole.

⁴ E au manatui ou loimata, pea e holi mamahi ke au toe sio kia koe, ke au fonu ai i te fiafia,

⁵ koteuhi e au taupau foki te tauhiofa lelei o te tui mooni e ia koe, ae nee uluaki nofo i tau kui ko Loisa pea mo tau fae ko Eunise, ae, e au iloi papau, e toe nofo foki ia koe.

⁶ Koia, e au fakamanatu atu kia koe, ke ke fakaulo te meaofa o te Atua, ae nee ke tali aki te hilifaki atu o oku nima.

⁷ Koteuhi nee mole foaki mai e te Atua kia tatou te Laumalie o te mataku; kae o te malohi, mo te ofa, pea mo te poto.

⁸ Koia ke aua naa ke ufiufi i te fai o te fakamooni ke tuku ki totatou Aliki, pee kia au ko tana tagata pilisoni. Kae ke ke mamahi mo au o uhi ko te Evaselio, i te malohi o te Atua

⁹ ae nee ina fakamauli tatou, pea nee ina paui tatou ke tou liliu ko tana hahai maonioni, o mole tupu ko atatou gaue, kae o mulimuli ki tana fakatuutuu totonu, pea mo te kalasia ae kua foaki mai kia tatou ia Sesu-Kilisito i mua o te kamataaga o te u sekulo.

¹⁰ Kua fakaha te kalasia aena i te temi nei i te ha mai o totatou Fakamauli ko Sesu-Kilisito, ae nee ina fakagata te malohi o te mate pea nee ina fakaha ki te malama te mauli mo te hee mate aki te Evaselio.

¹¹ Ko te Evaselio aia, nee fakanofo au ki ai ko te tagata faiakonaki, mo te apositolo ae e tonu ke ina ako te hahai pagani.

¹² Pea ko te tupuaga aia o taku tali te u mamahi aia; kae e mole au ufiufi pe, koteuhi e au iloi ia ia ae nee au tui ki ai, pea e au iloi papau e ina mau te malohi ke ina taupau toku koloa o kaku ki te aho o te fakamaau.

¹³ Too mau i te tui mo te ofa ae ia Sesu-Kilisito, te faifaitaki o te u palalau mooni ae nee ke tali maia au.

¹⁴ Taupau te koloa lelei, i te Laumalie Maonioni ae e nofo ia tatou.

¹⁵ E ke iloi ko natou fuli ae i Asia kua natou siaki au, o kau i ai ia Fisele mo Elemosene.

¹⁶ Ke liligi e te Aliki tona manavaofa ki te fale o Onesifole, koteuhi nee ina fakapelepelei toku loto o tua lahi, pea nee mole ufiufi ia ia ki oku seini;

¹⁷ kae, i tana hau ki Loma nei, nee ina kumi vave au, pea nee ina mau au.

¹⁸ Ke ofa te Aliki o tuku kia ia tona manavaofa ia tafa o te Aliki i te aho aia. E ke iloi lelei te lahi o te u mea fuli nee ina fai kia au i Efeso.