Lua tohi a Paulo ki te kau KOLINITO 1 - Ko te Tohi Tapu i te fakauvea

Fakaalofa

¹ Ko Paulo, apositolo a Sesu-Kilisito i te finegalo o te Atua, mo te tehina ko Timoteo, ki te Ekelesia o te Atua i Kolinito, mo te kau sagato fuli i te Akaia katoa:

² Ke tuku atu kia koutou te kalasia mo te tokalelei e te Atua tatatou Tamai pea mo te Aliki ko Sesu-Kilisito!

Fakafetai a Paulo

³ Ke tapuaki ki te Atua, te Tamai o totatou Aliki ko Sesu-Kilisito, te Tamai o te manavaofa fuli pea mo te Atua o te fakafimalie fuli,

⁴ ia ia e ina fakafimaliei maua i oma mamahi fuli, ke ma mafai te fakafimaliei o natou e nofo i te u mamahi, aki te fakafimalie nee ma tali mai te Atua!

⁵ Koteuhi, o hage pe ko te lahi o te u mamahi o Kilisito ia maua, e toe lahi foki toma fakafimalie ia Kilisito.

⁶ Kapau e fakamamahii maua, e uhiga mo tokoutou fakafimalie mo tokoutou haofaki; pea kapau e fakafimaliei maua, e uhiga mo tokoutou fakafimalie, ae e hoko i takoutou katakii te u mamahi tatau mo ae e ma tali.

⁷ Pea e malohi tama falala o uhiga mo koutou, koteuhi e ma iloi, kapau e kotou kau ki te u mamahi, pea e kotou toe kau foki ki te fakafimalie.

⁸ Koteuhi e mole ma loto, u tehina, ke tuku koutou i te fakapouli o uhiga mo te mamahi fakamataku nee hoko mai kia maua i Asia, he nee ma taomia lahi osi, o fakalaka foki i oma malohi, koia nee ma lotovaivai aupito o uhiga foki mo oma mauli.

⁹ Pea nee ma sio ko he mea pau toma tautea ki te mate, koteuhi ke aua tama falala kia maua totonu, kae ki te Atua ae e ina toe fakatuuake te kau mate.

¹⁰ Ko ia ae nee ina haofaki maua mai he toe mate fakamataku feia, pea e ma falala kia ia e ina toe haofaki anai maua;

¹¹ pea e kotou tokoni mai foki kia maua aki akotou faikole, koteuhi ke liliu te kalasia e ma mau anai aki te hufaki a te kaugamalie ko he tupuaga o te fakafetai a he kaugamalie o uhiga mo maua.

Te loto mooni o Paulo

¹² Koteuhi ko te mea ae e ma fiafia ai, ko te fakamooni aeni o oma loto, nee ma mauli i te malamanei, kae tafito kia koutou, i te maonioni pea mo te maa ia mua o te Atua, o mole i he poto fakatagata, kae i te kalasia o te Atua.

¹³ Koteuhi e mole ma tohi atu kia koutou he tahi age mea i te mea ae e kotou lau pea mo koutou mahino ki ai. Pea e au falala foki e koutou kaku anai o mahino lelei ki te mea aeni i te fakaosi.

¹⁴ I te aho aeni kua kotou kamata iloi ko tokotou kololia ko maua, kae e kotou liliu anai ko toma kololia i te aho o te Aliki Sesu.

Te fai e Paulo tana gaue

¹⁵ I te falala pau aena, nee au loto ke au alu atu kia koutou i mua, ke kotou mau ni kalasia e lua;

¹⁶ nee au loto ke au fakalaka atu ia koutou o alu ki Masetonia, pea ke au toe liliu leva mai Masetonia kia koutou, pea e kotou tokoni mai anai ki taku fagona ki Sutea.

¹⁷ I taku fai te tonu aena, pe nee au fai he mea fakavale? Pe ko aku fakatuutuu ko te u fakatuutuu fakatagata, o hage e mau ia au te io mo te kailoa?

¹⁸ E au fakamooni atu i te Atua, ae e agatonu, ko te folafola nee ma fakaha atu kia koutou nee mole ko te io mo te kailoa.

¹⁹ Koteuhi ko te Alo o te Atua, Sesu-Kilisito, ae nee matou akonaki kia koutou, e au, mo Silivano, pea mo Timoteo, nee mole ko te io mo te kailoa, kae nee io pe ia;

²⁰ koteuhi ko te u fakapapau fuli a te Atua e io ia te ia; pea koia foki ae e tou puaki ai te Ameni ia te ia ki te kololia o te Atua.

²¹ Pea ko te Atua totonu ae e ina fakamalohii maua o fakatahi mo koutou ia Kilisito; pea ko te Atua totonu ae nee ina vahei kehe tatou,

²² ae nee ina fakailoga tatou ki tona huafa, pea nee ina huai mai ki otatou loto te Laumalie Maonioni ko he fakamooni o te u koloa e ina taofi mai kia tatou.

Mamahi mo te u fiafia o Paulo

²³ E au too te Atua ko te fakamooni, ke ina matehi au mo ka e au loi, uhi pe ke kotou hao, koia nee au tonu ai e mole au toe liliu atu ki Kolinito.

²⁴ E mole uhi ke ma pulei takotou tui, koteuhi kua koutou tuu malohi i te tui; kae e ma kumi ke ma kaugaue fakatahi mo koutou o uhiga mo tokotou fiafia.