Uluaki tohi a Paulo kia TIMOTEO 1 - Ko te Tohi Tapu i te fakauvea

Fakaalofa

¹ Ko au Paulo, apositolo a Sesu-Kilisito i te fakatotonu a te Atua totatou Fakamauli pea mo Sesu-Kilisito totatou falalaaga,

² kia Timoteo taku fanau totonu i te tui: Ko te kalasia, mo te manavaofa, pea mo te tokalelei ke foaki atu kia koe e te Atua ko te Tamai pea mo Sesu-Kilisito ko totatou Aliki!

Valoki o te u akonaki hala

³ E au toe fakamanatu atu kia koe te kole nee au tuku atu kia koe i taku mavae i Masetonia: Nee au kole atu kia koe ke ke nofo i Efeso o fakatotonu ihi ke taofi tanatou fai ni ihi age akonaki,

⁴ pea ke aua tanatou pipiki ki ni fanaga mo ni hako hee osi, ae e natou fakatupu ni fihi kae e mole natou fakatuputupua te gaue a te Atua i te tui.

⁵ Ko te uhiga o te fekau aia, ko he ofa e hau mai he loto e maa, mo he manatu e lelei, pea mo he tui e mooni.

⁶ Kua maliu ni ihi mai te u mea aia, pea kua natou hehe i ni fihi vaiga;

⁷ e natou loto ke natou liliu ko ni toketa o te lao, kae e mole pe natou mahino ki te u mea e natou palalau ki ai, pee ko te mea e natou fakamooni ki ai.

⁸ E mole puli kia tatou e lelei te lao, kae e tonu ke totonu tona fakaaoga;

⁹ e tou iloi papau nee mole fakatupu te lao ki te tagata agatonu, kae ki te hahai pauu pea mo te hahai agatuu, ki te hahai pagani pea mo te hahai agahala, ki te hahai hee fakaapaapa ki te Atua mo te u mea taputapu, ki te hahai fakapo tamai mo fae, ki te hahai fakapo fuli,

¹⁰ ki te hahai feauaki, ki te tagata vale tagata, ki te hahai kaihaa tagata, ki te hahai kaka, ki te hahai maumau fuakava, pea mo te u mea fuli e fakafehagai ki te akonaki mooni,

¹¹ ae e tuha mo te Evaselio o te kololia o te Atua manuia, Evaselio nee tuku mai kia au.

Paulo, te manavaofa o te Atua

¹² E au fakafetai kia ia ae nee ina fakamalohii au, kia Sesu-Kilisito totatou Aliki, i tana sio mai kia au o hage ko he tagata agatonu, o ina fakanofo au ki tana gaue,

¹³ ia au ae nee nofo i mua ko he tagata laukovi ki te Atua, ko he tagata fakataga, ko he tagata pauu. Kae nee manavaofa te Atua kia au, koteuhi nee au fai te u mea aia i te fakapouli, koteuhi nee mole au mau te tui;

¹⁴ pea ko totatou Atua nee ina liligi mai kia au tona kalasia o lahi aupito, mo te tui pea mo te ofa ae e mau ia Sesu-Kilisito.

¹⁵ Ko he folafola mooni pea mo gali ke tali, nee hau ia Sesu-Kilisito ki te malamanei o fakamauli te kau agahala, pea ko au ko te uluaki o natou.

¹⁶ Kae uhi ko te mea aia nee au mau te manavaofa o te Atua: nee loto ia ke fakaha e Sesu-Kilisito ia au, ko te uluaki, te katoa o tana kataki, pea ke au liliu ko he faifaitakiaga kia natou e tui anai kia ia o uhiga mo te mauli heegata.

¹⁷ Ki te hau o te u sekulo, tuputupua, fakalilo, te Atua e tahi, ke tuku te fakaapaapa mo te kololia, i te u sekulo mo te u sekulo! Ameni!

¹⁸ Ko te fakatotonu aeni e au fai atu kia koe Timoteo, ko taku fanau, o mulimuli ki te u tala fakapolofeta nee fai o uhiga mo koe i mua, ae nee natou fakaha, ke ke tau te tau lelei,

¹⁹ pea ke ke taupau te tui mo he loto e lelei. Ko ihi nee natou siaki te fakalogo ki onatou loto e lelei, pea nee natou fakatupu ai te maumau o tanatou tui.

²⁰ Ia natou aena e kau ai ia Imeneo mo Alesatelo, ae nee au tuku kia Satana, ke na ako ai e mole tonu ke laukovi ki te Atua.