Uluaki tohi a Paulo ki te kau TESALONIKA 5 - Ko te Tohi Tapu i te fakauvea

Te haele fakakilisitiano

¹ Ki te mea o uhiga mo te u temi pea mo te u lakaga, e mole aoga, u tehina, ke au faitohi atu ki ai.

² Koteuhi kua kotou iloi papau e koutou totonu ko te aho o te Aliki e hau anai o hage ko he tagata kaihaa i te pouli.

³ I te temi ae e ui ai anai e te u tagata: Tokalelei mo fimalie! I te temi pe aia e fakamautoka anai natou e he tuutamaki fakapunamauli, o hage ko te u mamahi fanau ae e natou fakamautoka te fafine faitama; pea e mole feala anai hanatou hao i ai.

⁴ Kae ko koutou, u tehina, e mole koutou nofo i te fakapouli, ke pooki koutou e te aho aia o hage e he tagata kaihaa;

⁵ ko koutou ko he u fanau fuli o te malama pea mo te aho. E mole tou kau i te pouli pee i te fakapouli.

⁶ Koia aua naa tou momoe o hage ko natou ake ae, kae tou alaala pea tou fakapotopoto.

⁷ He ko natou ae e momoe, e natou momoe i te pouli, pea ko natou ae e konahia, e natou konahia i te pouli.

⁸ Kae kia tatou, ae e tou kau ki te aho, tou fakapotopoto, o tou kofu te kofu tau o te tui mo te ofa, pea tou too te puloga tau o te falala o te fakamauli.

⁹ Koteuhi nee mole fakatuutuu tatou e te Atua ki te hauhau, kae ki te mau o te fakamauli i totatou Aliki ko Sesu-Kilisito,

¹⁰ ia ia nee mate o uhiga mo tatou, ke tou mauli fakatahi mo ia, pee ke tou alaala, pee ke tou momoe.

¹¹ Koia, kotou fetokoniaki pea kotou fefaufauaki, o hage pe ko te mea e kotou fai mooni.

Fakatotonu fakamuli

¹² E matou kole atu kia koutou, u tehina, koutou fakaapaapa kia natou ae e gaue kia koutou, mo takitaki koutou i te Aliki, pea mo ako koutou.

¹³ Koutou mau kia natou he ofa lahi, uhi ko tanatou gaue. Koutou nonofo i te tokalelei ia koutou.

¹⁴ E matou toe kolekole atu foki kia koutou, u tehina, ke koutou fakatonutonu natou ae e mauli maveuveu, mo koutou fakalotomalohii natou e mamahi, mo koutou tokoni kia natou e vaivai, pea kotou kataki ki te tagata fuli.

¹⁵ Koutou tokaga ke aua naa liufaki e he tahi te kovi aki te kovi, kae ke koutou kumi tuumau te lelei i okotou vahaa pea mo te tagata fuli pe.

¹⁶ Koutou fiafia tuumau.

¹⁷ Koutou faikole hohoko.

¹⁸ Koutou fakafetai i te u mea fuli, koteuhi ko te finegalo aia o te Atua kia koutou ia Sesu-Kilisito.

¹⁹ Aua naa koutou tamatei te Laumalie.

²⁰ Aua naa koutou fakanoai te u folafola fakapolofeta.

²¹ Kae koutou sivi te mea fuli; koutou taofi te mea e lelei;

²² koutou fakamamao mai te u mea fuli e kovi.

²³ Ke te Atua o te tokalelei, ke ina fakamaonionii koutou katoa e ia totonu, pea ke ina taupau koutou katoa, te loto, mo te laumalie, pea mo te sino, ke hee mele i te aho o te toe liliu mai o totatou Aliki ko Sesu-Kilisito.

²⁴ E agatonu ia ia ae nee ina paui koutou, pea ko ia ae e ina fai anai te mea aia.

²⁵ U tehina, koutou hufaki matou.

²⁶ Koutou avage omatou ofa ki te u tehina fuli aki he fekita maonioni.

²⁷ E au kole malohi atu kia koutou i te Aliki, ke lau te tohi aeni ki te u tehina fuli.

²⁸ Ke nofo te kalasia o totatou Aliki ko Sesu-Kilisito mo koutou!