Uluaki tohi a Paulo ki te kau TESALONIKA 1 - Ko te Tohi Tapu i te fakauvea

Fakaalofa

¹ Ko Paulo, mo Silivano, mo Timoteo, ki te Ekelesia o te kau Tesalonika, ae e nonofo i te Atua ko te Tamai pea mo Sesu-Kilisito ko te Aliki: Ke foaki atu kia koutou te kalasia mo te tokalelei!

Te tui a te kau Tesalonika

² E matou fakafetai tuumau ki te Atua o uhiga mo koutou fuli, e matou manatui kotou i amatou faikole;

³ pea e matou fakamanatu tuumau ia mua o te Atua, tatatou Tamai, te gaue o takotou tui, mo te gaue o tokotou ofa, pea mo te malohi o takotou falala ki totatou Aliki ko Sesu-Kilisito.

⁴ E matou iloi, u tehina ofaina, kua filifili koutou e te Atua;

⁵ he nee mole pe gata tamatou fakaha te Evaselio kia koutou aki te palalau, kae aki foki te malohi, mo te Laumalie Maonioni, pea mo te loto pau; pea e mole puli kia koutou nee matou fakaha fena matou kia koutou i te lotolotoga o koutou, o uhiga mo koutou.

⁶ Pea ko koutou totonu, nee koutou faifaitaki mai kia au pea mo te Aliki, i takoutou tali te folafola aki te fiafia o te Laumalie Maonioni i te lolotoga o takotou tali te u mamahi nee lahi aupito.

⁷ I te mea aia kua kotou liliu ai ko he faifaitakiaga ki te kau kilisitiano fuli o Masetonia mo Akaia.

⁸ Koteuhi nee mole gata pe te mafola a te folafola a te Aliki maia koutou ki Masetonia mo Akaia, kae nee logo takotou tui ki te Atua i te u kogamea fuli pe, o mole kei aoga tamatou palalau ki ai.

⁹ Koteuhi e fakamatala, o uhiga mo matou, pe nee feafeai takotou tali matou i tamatou tau atu kia koutou, pea nee feafeai takotou tafoki ki te Atua o siaki te u taulaatua, kae kotou tauhi ki te Atua mauli mo mooni,

¹⁰ pea mo talitali ki te toe liliu mai te atu lagi o tona Alo, ae nee ina fakatuuake mai te kau mate, ia Sesu, ae e ina haofaki tatou mai te hauhau ka hau.