Uluaki tohi a Paulo ki te kau KOLINITO 1 - Ko te Tohi Tapu i te fakauvea

Fakaalofa

¹ Ko au Paulo, nee paui ke liliu ko te apositolo a Sesu-Kilisito i te finegalo o te Atua, mo te tehina ko Sositeme,

² ki te Ekelesia o te Atua i Kolinito, kia natou ae kua vahei kehe ia Sesu-Kilisito, pea kua paui ke maonioni, pea mo natou fuli ae e natou too i te potu kehekehe te huafa o totatou Aliki ko Sesu-Kilisito, ko tonatou Aliki pea ko toma Aliki foki:

³ Ke foaki atu te kalasia mo te tokalelei kia koutou e te Atua ko tatatou Tamai pea mo te Aliki ko Sesu-Kilisito!

Fakafetai

⁴ E au fakafetai tuumau ki te Atua o uhiga mo koutou, o tupu ko te kalasia o te Atua ae kua ina tuku atu kia koutou ia Sesu-Kilisito,

⁵ koteuhi ia ia kua kotou koloaia i te u meaofa fuli o uhiga mo te folafola pea mo te iloilo.

⁶ O uhiga mo te kua malohi ia koutou o te fakamooni kia Sesu-Kilisito,

⁷ e mole pe kei puli ia koutou he meaofa, o uhiga mo takotou talitali ki te fakaha o totatou Aliki ko Sesu-Kilisito.

⁸ Ko ia ae e ina poupouki anai koutou o kaku ki te fakaosi, ke kotou haohaoa i te aho o totatou Aliki ko Sesu-Kilisito.

⁹ E agatonu te Atua ki ana fakapapau, ia ia nee ina paui koutou ki te komunio mo tona Alo, ko Sesu-Kilisito totatou Aliki.

Fakavaevaega i te Ekelesia

¹⁰ U tehina, e au kole mamahi atu kia koutou i te huafa o totatou Aliki ko Sesu-Kilisito, ke koutou palalau fuli ki he palalau e tahi, pea ke aua naa mau ni fakavaevaega ia koutou, kae ke kotou pipiki tahi i he loto e tahi, pea mo he fakakaukau e tahi.

¹¹ Koteuhi, oku tehina, kua au logo o uhiga mo koutou, mai te hahai o Koloe, e i ai he u fihi ia koutou.

¹² E au fia ui atu te mea aeni, koteuhi e tahi ui e kotou: Ko au, a Paulo! – pea ko au, a Apolosio! – pea ko au, a Sefasi! – pea ko au a Kilisito! –

¹³ Pe nee mavaevae Kilisito? Pe nee kolusifikoi Paulo o uhiga mo koutou, pe nee papitemai koutou i te higoa o Paulo?

¹⁴ E au fakafetai ki te Atua koteuhi nee mole au papitemai he tahi ia koutou, gata pe kia Kilisipusi mo Kaiusi;

¹⁵ koteuhi naa lau e he tahi nee papitemai koutou i toku higoa.

¹⁶ Nee au papitemai foki te famili o Setefano. Ki te toe, e mole au iloi pe nee au papitemai he tahi age.

Poto o te malamanei; Poto o te Atua

¹⁷ Koteuhi nee mole fekaui mai au e Kilisito ke au faipapitema, kae ke au fagonogono te Evaselio, pea ko te mea aia hala mo te poto o te palalau, ke aua naa fakanoai te koluse o Kilisito.

¹⁸ Koteuhi ko te akonaki o te koluse ko he vale ia kia natou e lolotoga mamate, kae kia tatou kua haofaki, ko te mafimafi ia o te Atua.

¹⁹ Koteuhi kua tohi: E au maumaui anai te poto o te kau poto, Pea e au fakaliliu anai o noa te atamai o te kau atamai.

²⁰ Kofea te tagata poto? Kofea te sekelipa? Kofea te tagata fakafihi o te malamanei? Pe nee mole fakamooni e te Atua ko he vale te poto o te malamanei?

²¹ Koteuhi, aki tona poto, nee mole pe iloi e te malamanei te Atua, nee lelei ki te Atua i tona poto ke ina haofaki te hahai tui aki te vale o te akonaki.

²² E kole e te kau Sutea ni milakulo, pea e kumi e te kau Keleka te poto:

²³ ko matou, e matou fakaha ia Kilisito nee kolusifikoi, ko te tukiaaga ia ki te kau Sutea, pea ko te vale ia ki te kau pagani,

²⁴ kae mafimafi o te Atua mo poto o te Atua kia natou kua paui, i te kau Sutea mo te kau Keleka.

²⁵ Koteuhi ko te vale o te Atua e poto age i te u tagata, pea ko te vaivai o te Atua e malohi age i te u tagata.

²⁶ Koutou fakasiosio mua, u tehina, kia koutou ae kua paui: E mole pe kaugamalie ia koutou he kau poto o mulimuli ki te kakano, pea e mole pe kaugamalie he kau tagata mauhiga, pea e mole pe kaugamalie he kau tupu aliki.

²⁷ Kae nee filifili e te Atua te u mea fakavale o te malamanei ke fakalainoai ai te kau poto; pea nee filifili e te Atua te u mea vaivai o te malamanei ke fakalainoai ai te u mea malolohi;

²⁸ pea nee filifili e te Atua te u mea e malalo o te malamanei, mo te u mea e fehiainai, mo te u mea e noa, ke maumaui ai te u mea ae e mauhiga ki te malamanei,

²⁹ koteuhi ke aua naa fakakololia he tagata kia ia totonu ia mua o te Atua.

³⁰ Pea ko te finegalo o te Atua ke tou fakatahi mo Sesu-Kilisito, ae kua liliu kia tatou ko totatou poto, ko totatou faitotonu, ko totatou maonioni, pea ko totatou fakamauli,

³¹ o hage ko tona tuu i te tohi: Ko ae e fakakololia ke fakakololia ia i te Aliki.