Levitiku 6 - Emakhuwa Bible

¹ Yave aamweerelatho Moisesi:

² “Mukina attheka ampahulaka Yave, amulokotthaka mwaattamanaawe mwaha wa yoosunga hoye hoye yooweemexera, naari etthu yoowiiyiwa, hata yoowoopopiherela,

³ hoye hoye attotta etthu yooriheya ni akhuwa, naari alipela, oothaka mwaha wa yakhalaru etthu atthekaka hiiho,

⁴ vanonto, mutthu apaka moota hiiho, akhalanaka nthowa, ontthuneya ohokoloxa yeeyo iiyalaawe hoye hoye okunxaawe oopopiherelaka, hoye hoye innyereriwaawe naari sooriheya ottonttawe,

⁵ naari yakhalaru etthu olipenlaawe oolokottha. Vano owo aliveke wookwanela aandyeererakatho mpatta wanaathanu wa yeeyo, amvahaka sootheene muneene nihuku nenenenno aneeraawe oonihere yooveleelelaawe nthowa.

⁶ Owo amuruuheleke musaserdoti* yoomveleelela Yave: napunci a muhuwaawe oohirakala ni oowaakhuleliwa.

⁷ Moota hiiho musaserdoti* onoomurehererela wiiwanana ni Yave, ni owo onooleveleliwa vamaithoni wa Yave yakhalaru etthu ya seiyo opankaawe simutatunxe nanthowa.”

Soolamulela mwaha wa sooveleela soohisa

⁸ Yave aamweerela Moisesi:

⁹ “Mwamulamulele Aharoni ni anamwanaawe nlamulo nna: ‘Ikano mwaha wa yooveleela yoohisa ti iya: Eyo epwaherereke oza vamakhalani a valtaarini* mpaka oxeexelo ni mooro ohicipihiweke.

¹⁰ Vano musaserdoti* awareke ikuwo sa eliinyu* ni kaputtulaawe campuwa a eliinyu*, akhupeke ettuura ya yooveleela yoohisa yaalalihiwa ni mooro wa altaari* ni iikaathiki mukerekhere wa altaari*.

¹¹ Vahoolowaya aceendyeke soowara ni arongheke ettuura okhwipi wa okonelingwe vanipuroni noothanliwa ntoko nootteela.

¹² Ohicipihiweke mooro valtaarini* opwaherereke ovarela. Khula oxeexelo musaserdoti* aandyeerereke ikhuuni ni iikaathiki vayikho sooveleela soohisa, ni ahiserekewo makhura a sooveleelela murettele.

¹³ Opwahererihiweke mooro valtaarini* ohicipihiweke.

Soolamulela mwaha wa sooveleela sa irooro

¹⁴ Ikano mwaha wa sooveleela sa irooro ti iya: anamwane asilopwana a Aharoni eruuheke vamaithoni wa Yave, ohoolo wa altaari*.

¹⁵ Musaserdoti* anyottoleke ephepa yooreerela ni makhura vamoha ni erubani* yootheene eri vasulu wa yooveleela ya irooro ni ahisereke valtaarini* mpatta wa eyuupuxero ntoko yoowunkhelaxa enimusiveliha Yave.

¹⁶ Aharoni ni anamwanaawe asilopwana eceeke yooveleela enghala eyo, mene eceeke yoohikhalano eferementu vaNipuroni Nootteela*; vanipuwani na Eheema ya Muthukumano.

¹⁷ Yooveleela eyo ehooxiwe ni eferementu; kohaavaha yeeyo ntoko mpattaaya wa sooveleela kireherereliwaaka Miyo vayikho. Ti yootteelaxa ntoko yooveleelela yoottheka ni yooveleelela nthowa.

¹⁸ Paahi ekhapira ya asilopwana ootheene a Aharoni ti eneera eceeke yeeyo. Ti mpattaaya wa sooveleela soomveleelela Yave soorehereriwa vayikho. Ti ekano yoohimala wa ikhapira sa muhoolotho. Ootheene eniitave seiyo anoothatuwa ootteela.’”

¹⁹ Yave aamweerelatho Moisesi:

²⁰ “Nihuku na ottikittheliwa wa Aharoni ni anamwanaawe asilopwana, awosa emuruuheleke Yave yooveleela ela: iliitru* piili sa ephepa yooreerela ntoko yooveleela ya irooro – vakhaani oxeexelo ni vakhaanitho oxekuwa.

²¹ Mureherere yeeyo ni makhura vanooxeriwa, muruuheke yootakanseriwa nnenesene ni moonihere yooveleela ya irooro yoomeyanyiwa ntoko yoowunkhelaxa enimusiveliha Yave.

²² Khula mwaana mulopwana a Aharoni aneera amurandele ntoko musaserdoti* oottikittheliwa, areherereke yooveleela eyo. Ti mpatta wa Yave mukanoni yoohimala ni ehisiweke woomalela.

²³ Khula yooveleela ya irooro ya musaserdoti* ehisiweke woomalela – eyo ehiciweru.”

Soolamulela mwaha wa sooveleelela yoottheka

²⁴ Yave aamweerela Moisesi:

²⁵ “Mwamuleele Aharoni ni anamwanaawe asilopwana: ‘Ikano mwaha wa sooveleelela yoottheka ti iya: Yooveleelela yoottheka yiiviweke vamaithoni wa Yave vanipuroni eniiveliwaayawo yooveleela yoohisa. Eyo ti yooveleela yootteelaxa.

²⁶ Musaserdoti* aneera amveleele mwaamunama amukhuureleke vaNipuroni Nootteela* – vanipuwani na Eheema ya Mutkukumano.

²⁷ Ootheene eneera etave yooveleeleene yeeyo anoothatuwa ootteela ni ephome yattonyera vakuwoni, vano ecapeliweke vaNipuroni Nootteela*.

²⁸ Mwaapu oneera waapeeliwe enama opwexiweke, vaheera yaapeeliwa mmwaapuni wa ebronze*, mwaapweene yoowo okutthiweke ni orapihiweke ni maahi.

²⁹ Khula mulopwana a mweemusini ya musaserdoti* aceeke yeeyo; ti yootteelaxa.

³⁰ Vaheera khula yooveleelela yoottheka ephomaaya eneera eruuhiwe Muheemani mwa Muthukumano weera ereherereliwe wiiwanana ni Yave vaNipuroni Nootteela*, ehikhuuriwe; eyo ehisiweke.