Yuda 1 - Iduna

¹ Yo siule omi Yaubada giluwafami-ma kalivai-mina. Iya Yuda Yesu Keliso ana agetoga kadu bana Yemesa taina yami leta ga'etoladina be wana'itana. Omi higa Yaubada Tamada agaimiya ginuwanuwa kadu Yesu Keliso giyavayavami.

² Yaubada yana hinekalikali yana aseniwalova yana nuwakabubu ana ayauna againe wanatutuveguvegulami.

Yuda tovehawala fwayafwayadiyao fa'idiya givenuwa'atada.

³ Tobohiya'ase'asekweyao, keke gavana fa'ina tu nagona ganuwanuwa vaita ada kibababala Yaubada againe omi kadu ime buye kanuhagana-ma fa'ina agaimiya gada'etoladini, tu adamoya nuwanuwa sa'eyana magigiku gimadubodana. Fa'ina nuwanuwaku ganagahevagadonemi be tovehawala fwayafwayadiyao agaidiya Keliso ana vetumagana velemo'ena wanalugolegolena, vetumaganai-nadi boi tuwaina tova sa'eyanaga Yaubada ime afositolo awameya ide yana yo'ogaga gihawaveleveleda.

⁴ Wa'ita, kaliva tufoidi Yaubada hivenikohiyena-ma yami yo'o agaimiya hilukukau be hilolomi. Yaubada yana gahe hikivilavilana higahe higayo, “Dewa udo'udona au adafaiweya fa'ina Yaubada ginanuwadogeda be yada koyona keke ginalaufata.” Au hidedemi hivehawala be Yesu Keliso hivekekeyena, Bana anakaibe yada Tovehimeya kadu yada Kaiwabu. Tuwai-mo'ena tovehawalai-dina fwayafwayadiyao adi matahiwadi fa'ina Veyao Tuwaina ana buki gigaheye-vagahina.

⁵ Wona velemona badi Yaubada hivenikohiyena-ma adi matahiwadi hinanuhagana. Au hidedemi ahe wahalamanena. Halamanimiyao nonogana nuwanuwaku nuwami ganatalafolena higa Kaiwabu yana yo'o Idifita againe gilugolegoledi, tu muliya tufoidi keke hidavetumaganeni fa'ina giluyaweyawelidi.

⁶ Kadu badi lobama ana tovenuwa'ata dibudibutoyogidiyao wananuwenuwedi. Yaubada abavehimeya giveledi tu adi vehimeya keke hida'itave'avini. Keke nuwanuwadi Bana hina'idibumuhigeni fa'ina, yadi abamiya hihegena ada Yaubada umalovaneya gikive'avidi-yo bulava miyamiya-vagahina againe giyogodi be hinamiyami tu vedewayauga ana toveya.

⁷ Meda anafaiweya Sodoma be Gomola kadu adi awa'awaneya melala tufoidi wananuwenuwedi. Badi kalivai-dina dewa udo'udona againe hihawahegedi lobama ana tovenuwa'ata koyodiyao amine. Yaubada adi ayauna giveledi amine keke hidahuluva, au mali kaliva agaidiya matadi giludigadigaga-mo'a. Mena melalai-dina aba'ita higa kaliva gaveyao dewa udo'udona tulina tulina agaidiya hinahawahegedi digo, ai gi'alata-vagata ma againe adi matahiwadi hinanuhagana.

Yadi gahe ma ihawadanana moya'aina.

⁸ Kadu meda anafaiweya badi tovehawala fwayafwayadiyao hihuluhuluva. Yadi avayauna hiyauyauna vaita Yaubada gidahawahegedi be dewa udo'udona againe taudiyao wowodi hikikivekoyona, abavehimeya hihawave'iyohoyohoyena, lobama ana kaliva kikaiwabudiyao hi'ihawadamanedi.

⁹ Gilubodadi be keke hina'ihawadamanedi. Boi tuwai-mo'ena Mosese gi'alika againe Yaubada yana tovenuwa'ata adi tonagona ana egana Maikeli Mosese ana aitauna fa'ina gi'iveninisena, ada wowona fa'ina Setani buye hivekwageya. Tu bana Maikeli kaliva kikaiwabu-mo'ena nonogana keke-mo'a yana wa'ihawadamana Yaubada matane Setani gidahawavekoyoyeni. Au gigahe'abobowena gigayo, “Kaiwabu ginadakeye.”

¹⁰ Maikeli kaliva kikaiwabuna nonogana yana wawowomumu Setani gigahena. Badi tovehawalai-dina kaliva-kawowodiyao fa'ina gilubodadi be lobama ana kaliva kikaiwabudiyao hidawowomumuyedi. Tu badi kwavakwavadiyao gaitoma tulina tulina keke hidahalamanedi-ma hihawavelaigedi. Ada gaitoma higa-kawokawowoyedi vaita kevakeva walawala'a keke wanuwadiyao amine, medema gaitomai-dina agaidiya adi agolaufofola hinuhagana.

Yadi dewa ma abaluvefota tulina tulina giyakahidi.

¹¹ Hoiyoi tovehawala fwayafwayadiyao! Keni yana dewa hi'itavaina, bana Yaubada keke gidawowomumuyeni tu taina giluve'alikana. Kadu Belami mani gi'italuvadigena fa'ina gikoyo amine, meda badi yadi italauvadiga fa'ina koyona againe hihawahegedi. Kadu badi Kola ahenao tuwaina Mosese be Eloni yadi abavehimeya Yaubada giveledi-ma hidalemadi fa'ina adi agolaufofola hinuhagana amine, meda badi tovehawalai-dina adi agolaufofola hinanuhagana.

¹² Hida hima kalivai-dina vaita lai gava sevasevauyana tu waka givetulana amine, yami anuwa'udu'udu Yesu fa'ine againe hi'ela be yadi nuwanuwa aya'ayafanina hiseusena fa'ina yami'a hikivekoyokauyena. Vaita Yaubada yana sifi hida'itave'avidi tu taudiyaogaga hive'adi. Kakaha ana tova buhibuhi giyo'o vaita wehi gidalugaga tu bolimana gi'alugena amine, badi tovehawalai-dina yadi vehawala againe keke tamo ami veluga wadavaini. Kadu badi vaita aiyoyo ana toveya keke tamo guwadi hidaseni higa vaita boudiyao, ada kaliva hihabudi be hibou, yadi bou luhei. Meda tovehawalai-dina guwadi keke.

¹³ Lefo dokidoki wabugobugona taliyeya gilulakahina amine, badi yadi dewa wowowomumuna hiseseyemaunena. Kadu badi vaita ibadibadi akolukoludiyao amine. Nagona ka'itadi vaita mahamahalidiyao tu muliya gimaduhavaidi. Yadi abaga umalovana-kahukahu againe Yaubada ahe gikidewedewena ada medema againe hinamiyamiya-vagata.

^14-15 Tu boi tuwai-mo'ena bana Inoki badi tovehawala fwayafwayadiyao fa'idiya gigaheye-vagahina. Bana hima Inoki Adama yana yo'o anaveseveni ada gigaheye-vagahina gigayo, “Wa'ita, Kaiwabu ginahobu'ela kadu yana tovenuwa'ata mahamahalidiyao tausani tausani a gavaiyehi buye hinahobu'ela be kaliva moya'aida ginavedewayaugida. Ginavehimeya be kaliva gaveyao moya'aidi Yaubada hivenikohiyena, medema adi matahiwadi hinanuhagana. Yadi dewa koyona moya'aina hififaisewadi kadu yadi wonakoyokoyo Yaubada againe hiyakayakahina-ma vaita Yaubada hidavenikohiyeni. Yadi venikohihegahega fa'ina Yaubada ginavematahiwadiyedi.” Au hidedemi Inoki gigahe.

¹⁶ Tova moya'aina hida hima tovehawalai-dina hi'ala'alawoluwolu kadu vita taudiyao hinuhagana-ma fa'ina mali kaliva hikiholiholina. Taudiyao yadi nuwanuwa ita'italuvadigana hihuluvina. Taudiyao adi egana hikilakahina kadu mali kaliva hive'amohinesebesebedi.

Yuda gigahevagadonedi be hina'atuvefa'ila.

^17-18 Tu tobohiya'ase'asekweyao, gavadi yada Kaiwabu Yesu Keliso yana afositolo agaimiya higaheye-vagahina, medema againe nuwami gidanauna. Higahemi higayo, “Tova ana abalauyabu againe tohawavelaiga hinalakayemu. Taudiyao yadi nuwanuwa ita'italuvadigana vaita Yaubada ana venikohi amine ma hinahuluvina.”

¹⁹ Hida hima kalivai-dina omi tovetumagana hiludakami, dibudi koyona ana nuwanuwa hihuluvina, badi agaidiya Alu'aluwa Mahalina keke gidamiyami.

^20-21 Tu omi tobohiya'ase'asekweyao, Keliso ana vetumagana againe ahe wahawahegemi, vetumaganai-nadi mahamahalinaga. Au yami vetumagana ana nuwanuwa wanaluvefovefofoni-yo wanavewaba, kadu tova moya'aina Alu'aluwa Mahalina yana faiwala againe wanave'ove'o'ola. Kadu aimo yada Kaiwabu Yesu Keliso walulubodena tu taumiyao wana'ita'itave'avimi be higa Yaubada yana nuwanuwa agaimiya wana'aya'ayaunena. Au hidedemi wananunauwena tu Yesu yana yewa'ela ana toveya yana wahinekalikali yawai-vagahimi ana abageya ginavega'aulemi.

^22-23 Badi hinuwanuwaluga amanadi yami wahinekalikali wanakivetuvetunudi. Kaliva ai'ala'alata againe gibe'u tu walugolegolena be wasilakahina amine, badi dewa koyona againe hibe'u-ma wanamadusilakahidi. Kadu badi tova moya'aina koyona hififaisewana-ma wanahinekalikaliyedi be nuwadi Yesu againe wanakiviviyena, tu taumiyao wana'itave'avimi be yadi dewa koyona keke nuwami gina'abini-yo adi bwanene agaimiya ginadamana.

Yaubada be Yesu Keliso adi davadava.

^24-25 Tu Yaubada ana egana kanakilakahina. Keke tamo hakwadi velugana Yaubada au Bana anakaibe'u-mo'a. Bana'e yada koyona agaidiya yada Kaiwabu Yesu Keliso againe gikibababaleda. Kadu Bana anafaiweya omi ginayavayavami be keke wanabe'u, au ginanunauwena tu keke ami wavita tu yami wavemwamwala keke kabi'ona Tauna matane ginakilakahimi-yo yana kaiwabu wana'itana. E, tova moya'aina Bana'e kanadavadavana fa'ina yana mahalina ve'akinamanamalina be yana kaiwabu be yana faiwala be yana abavehimeya giduva-vagata. Tuwai-lokalokana tova aimo keke gidave'inuba kadu tova adamoya giduva-vagata, meda tova mulina ginaduva-vagata tova inaga inaga keke ana abalauyabu. Ehe hidedemi. (Iya Yuda bonaku.)