Maki 1 - Iduna

Yoni Tobafitaiso Yesu yana ela fa'ina givenuwa'ata.

¹ Venuwa'ata Yamumuna Yesu Keliso Yaubada Natuna fa'ina hidede amine.

^2-3 Tuwai-mo'ena Yaubada bonana ana to'awatalatalaina ana egana Aiseya gahe sa'eyana gi'etoladina. Yaubada yana gahe Natuna againe gi'etoladina gigayo, U'ita, hida yaku tovenuwa'ata. Bana gana'iveninisena be wai ginanagona, ya eda kaliva ase'asediya ginakidewedewena. Kaliva agona hinanogalina wala'aiya ginakovakovadadana ginagayo, Kaiwabu yana eda wanavetauna, yana eda ase'asemiya wana'ihagihagiyena. Hidedemi Aiseya gigahe.

⁴ Ada gavaimi tuwai-mo'ena Aiseya gigaheye-vagahina, medemi gilakayemu velemo'ena. Fa'ina Yoni wala'aiya yana ivemogatala gilakayemu gilulumamala gigayo, “Yami dewa koyona wanavenikohiyena be wanahagavilami-yo wanabafitaiso be Yaubada yami koyona ginayawelina.” Hidedemi Yoni gilulumamala.

⁵ Kaliva moya'aidi Yudiya ana fafali kadu Yelusalema againe hitauya be hina Yoni yana laumamala hinanogalina. Yadi dewa koyona hiyau-yo gufa ana egana Yolidani againe gikivebafitaisoyedi.

⁶ Bana Yoni ma yana miyami kaliva koyokoyo-'avana amine. Aikeva kameli utuutuna againe hiyogona-ma gi'osena ada gaiyona bulumakau kwafiline hiyogona ma goline gihifona. Ada anaga ma koloma kadu ma'awa gufadi amine.

⁷ Ada gilulumamala gigayo, “Iya wai ganagona tu kaliva sa'eyana wai ginamulina-ma gifaiwalahegeku. Bana kikaiwabu-mo'ena tu iya kwamana kabisoku fa'ina, keke akufaiweya Bana againe ganave'agetoga be gana'aibo'ula-yo ana ageyafayafa adi aba'aiyauga ganayauni.

⁸ Iya gufa againe gakivebafitaisoyemi tu Bana'e ma Alu'aluwa Mahalina againe ginakivebafitaisoyemi be ginavemagami.” Hidedemi Yoni gilulumamala.

Yesu gibafitaiso tu Setani gi'aladibidibiyena.

⁹ Himiyami tu Yesu Nasaledi Galili ana fafaliya gitauya be Yoni againe gi'ela, ada Yoni Yolidani againe gikivebafitaisoyena.

¹⁰ Ada Yesu gibafitaiso gihavaina, gufeya gi'a'alakahini tu auhe'ama lobama gi'ayavalini-yo Yaubada Alu'aluwana ana ita vaita bunebune amine Bana againe gihobu'ela ma gi'itana.

¹¹ Ada Yaubada agona lobameya gikova gigayo, “O'eni natu'ase'aseku, nuwaku ukiveyamumu-mo'ena.”

¹² Yesu Yolidani againe gibafitaiso tu auhe'ama Alu'aluwa Mahalina babigaga againe giwavina.

¹³ Ada aiyeta foti agaidiya babigaga againe gimiyami tu Setani gi'ala'aladibidibiyena. Ada kevakeva walawala'a hinafadiya gimiyami keke tamo kaliva tu lobama ana tovenuwa'ata hi'ela hi'itave'avina.

Yesu tobayauma gikovadi be hinavetomuliya.

^14-15 Tu Yesu Yoni valeyana ginogalina higa deliya hisena. Ada hidedemi ginogalini-yo gilowoga fafali ana egana Galili againe gina be Yaubada yana Venuwa'ata Yamumuna gilulumamalena gigayo, “Yaubada yana aituha a gilakayemu. Tova kabisona kaliva yana itave'avina againe hinamiyami be ase'asediya ginavehivehimeya. Au yami dewa koyona wanavenikohiyeni-yo wanahagavilami be Venuwa'ata Yamumuna wanavetumaganena.” Hidedemi Yesu gilulumamala.

¹⁶ Tova sa'eyana Yesu tobu ana egana Galili ana taliyeya ginauna tu Saimoni kadu taina Anidulu gi'itadi. Alevatu hisesehobuyeni tu gi'itadi fa'ina badi tobayauma.

¹⁷ Ada Yesu gigahedi gigayo, “Wa'ela wanamuliyeku be kaliva adi bayauma ganavehawalemi.”

¹⁸ Ada auhe'ama kaliva adi'iselu yadi alevatu hisehobuye-vagahini tu himuliyena.

¹⁹ Kadu ginauna tu matalaviseya Yemesa wataina Yoni Sebedi natuneyao gi'itadi, wakeya hihiyoto yadi alevatu gi'akaninina-ma hikikidewedewena.

²⁰ Ada auhe'ama gikovadi be hinamuliyena. Au tamadi Sebedi yana tofaisewa buye wakeya himiyami-ma hinuyabuyabudi be Yesu himuliyena.

Yesu kaliva wayafunena gikiveyamumuna.

²¹ Hinauna tu Kafeneumi againe hiyemu. Ada sabati againe Yesu manuwa-abavehawala ana egana sinagogi againe giluku givebutu givehawala.

²² Ada yo'o yana vehawala fa'ina hiyaulowoga higayo, “Keke Mosese yana vehimeya ana tovehawala amine gidavehawala, au vaita tovehimeya velemo'ena amine givehavehawala, yana vehawala ase'aseda gi'onana.”

^23-24 Higahegahe tu kaliva wayafunena yadi sinagogi againe giluku gikova'awafatafata gigayo, “Yesu kwanaNasaledi gavadi ime agaimeya unagani-yo u'ela? Ka'i O u'ela be ime yafune ama loi unamunuma-yo anabwavi? O ya inuba gahalamanena. O'eni Yaubada yana Kaliva Mahamahali.”

²⁵ Tu Yesu yafune gihawatana gigayo, “Gi'alove. Una, kaliva unuyabuyabuni.”

²⁶ Yafune kaliva gikivefavefanina toyogina gitatawayana-yo ginuyabuyabuna.

²⁷ Kaliva moya'aidi hi'ita-yo hiyaulowoga-mo'a buye hive'agahegahe higayo, “Hida hima gava'ana? Yana vehawala tuli-mo'ena kadu ana wavehimeya. Yafune nonogana hida kaliva gihawatadi-ma bonana hi'abina.”

²⁸ Ada au Yesu valeyana Galili ana fafali matatabuna againe give'aliyahega.

Yesu to'aulolo moya'aidi gisiveyawadi.

²⁹ Tu Yesu manuwa-abavehawala againe gihobu-yo gina Saimoni Anidulu yadi manuweya. Ada Yemesa Yoni badi buye hina manuweya hiluku.

³⁰ Saimoni lawana adi iviya hidauda wowodi vaita ai, ada badi fa'idiya Yesu himaduvenuwa'atana.

³¹ Au gina gi'itadi nimadiya gi'abi be gisivemidididi. Wowodi auhe'ama gituluna ada hivebutu adi wakawaka adiga hikidewedewena.

³² Mala gibogi kauwana giholu-yo kaliva yadi to'aulolo moya'aidi kadu wayafunediyao Yesu againe hi'aliyedi.

^33-34 Melala ana kaliva moya'aidi Saimoni yana eda'awaneya hivaga'auta-'owoga, ada Yesu to'aulolo moya'aidi yadi aulolo tulina tulina ma gisiveyawadi. Kadu yafune moya'aidi kaliva hiluvaiyedi-ma giwavidi, ada yafune Bana inubana hihalamanena fa'ina gihawatadi be keke hinalukahihiyeni.

Yesu Galili ana fafaliya gilulumamala.

³⁵ Tu aiyeta anavelu mala aimo keke gidalauni tu Yesu gi'enohobu be gina melalagaga sa'eyana againe give'ove'o'ola.

^36-37 Saimoni tobohiyaneyao buye hina hilelena ada hinuhagana againe higayo, “Kaliva moya'aidi O hilelele.”

³⁸ Yesu gigayo, “Wa'ela be kana mali melaleya be kadu badi agaidiya ganalulumamala. Hidema fa'ina gahobu'ela.”

³⁹ Ada au Galili ana melala moya'aina agaidiya ginunuwaliliuga, yadi manuwa-abavehawala agaidiya gilulumamala, adi yafune giwaviwavidi.

Yesu tovedawodawowo gikiveyamumuna.

⁴⁰ Tu tovedawodawowo sa'eyana gi'ela Yesu againe tugana give'etodonena be gihawayafeyafena gigayo, “Ka'i nuwanuwa digo, afaiweya unakiveyamumuku.”

⁴¹ Gigahe-yo Yesu gihinekalikaliyena nimana gitunena kaliva gi'abina gigayo, “Iya nuwanuwaku. Au unayamumu.”

⁴² Ada auhe'ama ana dawodawowo gihavaina be giyamumu.

^43-44 Giyamumu tu Yesu gimadu'atuhegena ana hawata givelena gigayo, “Unogali. Keke tamo hakwadi unavenuwa'atani, au abaveyao ana tofaisewa againe unamaduna be wowo unavehawalena. Kadu ya yamumu fa'ina manuga luhei ada sifi, higa abaveyao Mosese boi tuwai-mo'ena givehimeyena amine ma unanauwedi be moya'aidi o uyamumu velemo'ena ma hinahalamanena.”

⁴⁵ Atu kaliva gilowoga be gina yana yamumu valeyana givebutu kaliva moya'aidi agaidiya gilukahihiyena, ada au valeyana ginauna. Moya'aidi hiyo'oyo'o fa'ina, Yesu keke anafaiweya melaleya ginaluku kaliva matadiya. Au melalagaga agaidiya gimiyami. Atu kaliva melala tulina tulina agaidiya hitauya be Yesu againe hiyo'o.