Luke 1 - Iduna

^1-4 Yo siule Kauveya Tiyofilo. Keke gavana fa'ina tu vaita gidalubodaku be Yesu kahihina matana matana amine o fa'iniya gada'etoladina be higa ana nuwanuwa kaliva yadi vehawala againe ahe unogalidi-ma nuwanuwai-dina au velemo'ena ma unahalamanena. Boi badi kaliva Yesu yana gugai give'inubena be ginauwena ana abalauyabu ma taudiyao matadiya hi'itana ada yana venuwa'ata hilumamalena au gaitomai-dina hihawavelevelema. Kaliva tufoidi moya'aidi hivegalena be gavadi gavadi hinafameya hilakayemu, medema kahihidi hi'etoladina, badi to'itai-dina hihawavelevelema amine. Siule Kauveya, badi hi'etoladina tu iya tauku kahihi matatabuna matana matana ana abave'inuba be gina ana abalauyabu yaku wa'idibumuhiga galele-hagihagiyena, fa'ina vaita gidalubodaku be kadu iya kahihi-nadi o fa'iniya gana'etoladina.

Yoni yana tubuga fa'ina Gabeliyela Sakalaiya givenuwa'atana.

⁵ Kahihi-nadi hidede amine. Helodi Yudiya ana fafali givehimeyena ana toveya abaveyao ana tofaisewa sa'eyana gimiyami ana egana Sakalaiya. Tofaisewai-dina yadi yo'o tulina tulina ada bana Sakalaiya Abaiya yana yo'o kalivana. Meda vavinena Elisabeti abaveyao ana tofaisewa adi yo'o kwamayokuna higa bana Eloni bwanenena.

⁶ Ada adi'iseluga yadi dewa yegayegana Yaubada matane. Kaiwabu yana vehimeya yana hawata moya'aina hi'ita'itave'avina, keke tamo adi wavita.

⁷ Tu Elisabeti kakalina fa'ina natudi keke, ada adi'iseluga hivesilakai-mo'a.

^8-9 Himiyami tu Sakalaiya yana yo'o yadi faisewa manuwa-tafalolo hinagene ana tova gilakayemu. Abaveyao ana tofaisewa yadi dewa amine kaliva sa'eyana sa'eyana adi egana kabala againe hi'etoladina digo gowa againe hidodo-yo tofaisewa sa'eyana matana lowolowogina tu kabala givaina. Medema tovai-nadi Sakalaiya ana egana hivaina higa Kaiwabu yana manuwa-tafalolo againe gidaluku be vanedimodimo ana egana inisenisi gidakabuna.

¹⁰ Giluku be inisenisi gikabukabuni tu kaliva moya'aidi melaleya hivaga'auta amanadi Yaubada hihawahawadavadavana.

¹¹ Au Yaubada yana tovenuwa'ata Sakalaiya againe auhe'ama gilakayemu, inisenisi ana aba'akabu i'atagine gimidi.

¹² Ada Sakalaiya gi'ita-yo ase'asena gi'akolukoluna kadu gimatautave'ine.

¹³ Tu tovenuwa'ata gigahena gigayo, “Sakalaiya, keke unamatauta. Ya ve'o'ola Yaubada ahe ginogalina. Tu vavine Elisabeti natu kaliva ginavenatunena ada unavewagana Yoni.

¹⁴ Bana kwamana aimo ya abavemwamwala be ya abagakahikahi, kadu kaliva moya'aidi yana tubuga fa'ina hinavemwamwala.

¹⁵ Fa'ina bana'e aimo ginakaiwabu Yaubada matane. Ana hawata ma oine kadu mali gufa laulaugina keke ginayuni. Hinana hinavenatunena ana toveya Alu'aluwa Mahalina ginaluvaiye-vagahina.

¹⁶ Bana natu-nadi miIsileli tufoidi moya'aidi Yaubada yadi Kaiwabu againe ase'asedi ginakiviviyena.

¹⁷ Bana wai ginanagoni tu Kaiwabu wai ginamulina. Yana wafaiwala kadu yana wanuwanuwa tuwai-mo'ena Elaiya Yaubada bonana gi'awatalatalainena amine, meda bana ginafifaisewa. Yana laumamala againe kaliva ase'asedi natudiyao agaidiya ginakiviviyena be hinaveyao. Kadu todibutoyoga nuwadi ginakiviviyena be yadi dewa koyona hinahegeni-yo hinanuwanuwa-hagihagi. Au hidedemi Kaiwabu yana ela fa'ina kaliva ase'asedi ginakidewedewena.” Tovenuwa'ata yana gahe au hidede amine.

¹⁸ Tu bana Sakalaiya tovenuwa'ata gitoliyena gigayo, “Gavaiya'amine ganahalamaneni ya gahe velemo'ena o ka'i keke? Fa'ina hima gavekaliva kadu vavineku givekwamayoku.”

¹⁹ Au tovenuwa'ata gigayo, “Iya Gabeliyela. Yaubada matane gamidimidi ma Bana loseyanina gi'iveniniseku be againiya ga'ela higa hida valeya hagihagina gadalukahihiyena.

²⁰ Tu unogali! Yaku gahe keke udavetumaganeni fa'ina, ago ginasebodana. Lukahihi unafaniyena unanunauwena tu gaitomai-nadi gagaheyena-ma tova gilubodana againe ginalakayemu-yo agoseboda ginahavaina.” Au hidedemi tovenuwa'ata gigahe.

²¹ Tu gava melaleya kaliva Sakalaiya hibodabodana, ada yana miyafa'ila manuwa-tafalolo hinagene fa'ina aimo nuwadi ginauna.

²² Hibodaboda tu gilakayemu againe gahe keke anafaiweya. Au kaliva buye hive'agahegahe higayo, “Ka'i hima manuwa-tafalolo againe gi'eno'ita fa'ina agona gisebodana.” Gahe keke anafaiweya fa'ina u'une gilukahihi.

²³ Ada ahe yana faisewa ana aituha giluyabuna, au giyewana yana manuweya.

²⁴ Himiyami tu vavinena Elisabeti givehifuga ada vaikohi faifi agaidiya keke yo'oya gidanunaudadana au gimiyami yana manuweya.

²⁵ Gigahe gigayo, “Ho Kaiwabu! Wona velemona Bana Tonuwakabubu! Boi kakaliku fa'ina yaku wawowomumu tu tova hidevama Kaiwabu gifaiwalaveleku-yo natuku ganuhagana, fa'ina yaku wowomumu yo'o matadiya givaihegena.” Au hidedemi Elisabeti gigahe.

Yesu yana tubuga fa'ina Gabeliyela Meli givenuwa'atana.

²⁶ Tu Elisabeti ahe vaikohi sikisi gihegedi againe, Yaubada yana tovenuwa'ata ana egana Gabeliyela Galili ana melala sa'eyana againe gi'iveninisena, melala ana egana Nasaledi.

²⁷ Ulaulatanina sa'eyana againe gi'iveninisena, kwamayoku-nadi kaliva ana egana Yosefa gisetagona. Bana Yosefa Devida bwanenena ada ulaulatanina ana egana Meli.

²⁸ Tovenuwa'ata kwamayoku againe gi'ela gigayo. “Siule Meli, O Yaubada ginuwadoge-mo'e! Bana Kaiwabu a Toveluga.”

²⁹ Tu bana Meli tovenuwa'ata yana gahe fa'ina ase'asena gi'akolukoluna lakahina ada nuwana givegafo'uya'uya gigayo, “Gavadi-yo hidedemi givesiuleyeku?”

³⁰ Au tovenuwa'ata gigahena gigayo, “Meli, keke unamatauta, fa'ina Yaubada yana nuwadoga againiya givetalaiyena.

³¹ Aimo unavehifuga be natu kaliva unavenatunena ada unavewagana Yesu.

^32-33 Bana kikaiwabuna ada hinavewagana Tomiyagetane-mo'ane Natuna. Ada Yaubada Kaiwabu ginakivekaiwabuna be bwanenena Devida yana didiga'u'u ginavelena au Yakobu yana yo'o agaidiya ginavehimeya-vagata. E, yana abavehimeya ginaduva-vagata tova inaga inaga keke ana abalauyabu.” Au hidedemi tovenuwa'ata gigahe.

³⁴ Tu Meli gigayo, “Iya hima vineulatana keke moganeku tu gavaimi-yo ganavehifuga?”

³⁵ Au tovenuwa'ata gigayo, “Alu'aluwa Mahalina ginaluvaiye be Tomiyagetane-mo'ane yana faiwaleya o ginayava. Hidema fa'ina kwamana unavenatunena ma Mahalina ana kwamana ada hinavewagana Yaubada Natuna.

³⁶ Wa'ita, o hina Elisabeti givekauve'a-mo'a tu givehifuga. E, bana kwamayoku hihawavekakalena-ma ahe yana vaikohi sikisi gihegedi.

³⁷ Au mema gaitoma moya'aidi vitadi au Yaubada ana tagalowalowa.”

³⁸ Hidedemi gigahe-yo Meli gigayo, “Yamumuna. Iya Kaiwabu ana agetoga. Gavaimi ugaheyena medemi agaikuya gidalakayemu.”

Meli Elisabeti againe giwakawaka.

^39-40 Gimiyami tu Meli gikidewadewa be gilowoga, Yudiya ana avala'oya againe gimaduna ana melala sa'eyana againe gihobudamana be higa Elisabeti gina'itana. Sakalaiya yana manuweya giluku-yo Elisabeti gilusiuleyena.

^41-42 Ada Elisabeti Meli yana lusiule ginogalina againe kwamana kamone gikolekole lakahina au Alu'aluwa Mahalina Elisabeti giluvaiye-mo'ena be gikova'awafatafata gigayo, “O'eni ma Yaubada ahe ginuwakabubuye-mo'e. Ya vemwamwala mali vevine moya'aidi yadi vemwamwala gitubuhegena kadu kwamana unavenatunena-ma Yaubada yana nuwakabubu lakahina ginanuhagana.

⁴³ Gavadi-yo hida nuwakabubu lakahina iya ganuhagani, higa o yaku Kaiwabu hinana u'ela agaikuya uwakawaka?

⁴⁴ U'ita, ya lusiule ago ganogalina againe kwamana kamokuya vemwamwala gi'ayauneni-yo gikolekole lakahina.

⁴⁵ Gavadi unanuhagana Kaiwabu gigaheyena-ma uvetumaganena fa'ina, ya vemwamwala gavatubuga!”

Meli yana kwelidavadava.

⁴⁶ Tu Meli givebutu gikwelidavadava gigayo, Ase'asekuya Kaiwabu gadavadavana,

⁴⁷ kadu Yaubada aku Tokibababala againe alu'aluwaku givemwamwala lakahina

⁴⁸ Iya ana agetoga nonogana gi'itanuwakabubuyeku. Adamoya be aimo hinanunauwena kaliva adi hewahewa moya'aidi yaku vemwamwala gavatubuga medema hinayakayakahina.

⁴⁹ Fa'ina Bana Tofaiwala-mo'a abayaulowoga iya fa'ikuya gifaisewana, Bana ana egana mahamahalina.

⁵⁰ Gaveyao Bana hive'amohimohinena medema agaidiya yana hinekalikali, adi hewahewa adi hewahewa.

⁵¹ Nimana yana faiwala ahe ginaseyemaunena. Gaveyao nuwahinagediya hiseselakalaka medema ahe ginaluyauyauledi.

⁵² Tokikaiwabu ahe ginakihobuyedi be yadi didiga'u'u hinahegena, tu tonuwahobu ginakilakahidi.

⁵³ Nuwakabubu tulina agaidiya tomafulauga ahe ginave'ahiyauwadi, tu wakalivadiyao makagekagediyao ginawavidi be hinana.

^54-55 Tuwai-mo'ena bwanenedeyao agaidiya yana veluga fa'ina giwonadabadaba, Abelahamo ana unumamomo buye'i. Mena yana gahe keke havahavaina au yana hinekalikali againe nuwana ahe ginanunauyena, kadu yana wonadabadaba amine ide miIsileli ana agetogamomo ahe ginakive'avida ada veluga fa'ina. Au hidedemi Meli yana kwelidavadava.

⁵⁶ Ada auwe vaikohi tohiye amine Meli Elisabeti buye himiyami tu muliya giyewana yana melaleya.

Yoni Tobafitaiso yana tubuga fa'ina.

⁵⁷ Meli gina tu Elisabeti yana venatuna ana tova giyemu be kaliva givenatunena.

⁵⁸ Tobohiyadiyao kadu yadi yo'o kalivadi valeyadi hinogalina higa Kaiwabu gihinekalikaliyedi lakahina, ada badi'e buye hivemwamwala.

^59-60 Tu kwamana ana aiyeta eita givaidi againe hivaga'auta be Yaubada yana iya'iyaya wowone hinatomogolohina. Hinuwanuwa vaita tamana ana egana amine hidaluwatuyena Sakalaiya ma hinana himadugahe higayo, “Keke-mo'a! Egana kanavelena Yoni.”

⁶¹ Badi higayo, “Hima gavana-yo hida egana keke tamo ami yo'o agaidiya gidawahini tu hida kwamana ginawahini?”

⁶² Au tamana againe u'udi hilewalewana be higa hinahalamanena gava egana ginaluwatuyeni.

⁶³ Au aba'etoladi give'o'ola be gi'etoladina, “Ana egana Yoni.” Ada moya'aidi hiyaulowoga.

⁶⁴ Ada auhe'ama awana gita'ala be agona gi'afolena ada givebutu gigahegahe Yaubada gidavadavana.

⁶⁵ Au yadi yo'o buye himiyami-ma himatautave'ine. Ada Yudiya ana avala'oya melalidi tulina tulina agaidiya gaitomai-dina moya'aidi hilakayemu-ma fa'idiya hilulukahihi.

⁶⁶ Ada moya'aidi valeyai-nadi againe nuwadi givegafo'uya'uya higayo, “Hida kwamana aimo gavadi ginagani?” Au hidedemi higahe fa'ina Kaiwabu gifaiwalavelena ma hi'itana.

Sakalaiya yana kwelidavadava.

⁶⁷ Tu Alu'aluwa Mahalina Yoni tamana Sakalaiya giluvaiyena be Yaubada yana venuwa'ata gigaheye-vagahina gigayo,

⁶⁸ Kaiwabu miIsileli yada Yaubada kanadavadavana fa'ina yana yo'o ahe gina'itanuwakabubuyeda, ada vita agaidiya ginatutuvehobuda.

⁶⁹ Ada Tokibababala fifiwalana yana tofaisewa Devida bwanenena ma ide fa'ideya gina'iveyemaunina.

⁷⁰ Tuwai-mo'ena falofita mahamahalidiyao Yaubada bonana hi'awatalatalainena ada yana wonadabadaba hidede amine.

⁷¹ Nibaideyao agaidiya ginakibababaleda, kadu gaveyao moya'aidi hivenikohiyeda medema agaidiya ginalugolegoleda.

^72-73 Kadu bwanenedeyao ginahinekalikaliyedi ada yana veyao mahamahalina kadu yana wonadabadaba buye bwaneneda Abelahamo againe gisena, medema againe nuwana ginanunauyena.

⁷⁴ Gigahe vaita ide miIsileli nibaideyao nimadiya ginalugolegoleda be Bana againe adafaiweya kanafaisewa kanadavadavana keke yada wamatauta.

⁷⁵ Kadu yada dewa mahamahalina be yada nuwanuwa yegayegana Bana matane adafaiweya kanamiyami yawaida ana aituheya. Au hidedemi Yaubada yana kibababala fa'ina Sakalaiya gigahe.

⁷⁶ Kadu Sakalaiya natuna fa'ine gigaheye-vagahina yana gahe gi'alavekwelina gigayo, O natuku, Tomiyagetane-mo'ane bonana ana to'awatalatalaina amine kaliva o hinavewaga. O wai unanagona be Kaiwabu yana eda unakidewedewena.

⁷⁷ Kaiwabu yana yo'o unavenuwa'atadi yadi dewa koyodi hinahegedi-yo Kaiwabu yadi koyona ginayawelina be hidedemi adi kibababala hinavaina.

⁷⁸ Au nuwakabubu hidedemi hinanuhagana fa'ina yada Yaubada Tohinekalikali-mo'a. Kauwana gilaka be gituvemahalida amine, ada Tokibababala nuwada ginakivemahalina.

⁷⁹ Kadu badi uyuyuya be alika liline himimiyami-ma ginakivemahalidi, ada aseniwalova ana eda againe moya'aida ginasiviviyeda. Au hidedemi Sakalaiya natuna yana faisewa fa'ina gigaheye-vagahina.

⁸⁰ Ada bana kwamana gilakalakata tu yana nuwanuwa againe gi'ase'asevatu, ada babigaga againe gimiyami ginunauwena tu yana iveyemu ana tova miIsileli yadi yo'o matadiya.