Filimoni 1 - Iduna

¹ Yo siule tobohiyanuwaku Filimoni, o'eni Yesu Keliso yana tofaisewa anafaiweya kadu iya'eku. Iya Folo deliya hiseku be Yesu Keliso fa'ina yogoyogoniku gamimiyami amanadi ya leta ga'etoladina be una'itana. Iya Folo kadu tobohiyada Timoti yama lusiule againiya.

² Kadu nouda Afiya be natuda Akifo bana ama nimavelu Keliso fa'ine ime buye alulugaviya amanadi, be kadu tovetumagana ami yo'o yami manuweya hivagavaga'auta-ma yama lusiule badi agaidiya.

³ Yaubada Tamada kadu Kaiwabu Yesu Keliso hinanuwadogemi kadu ase'asemi hinakiveniwalovina.

Folo bana Filimoni fa'ina Yaubada againe givesiule.

⁴ Siule Filimoni, yaku ve'ove'o'ola againe o fa'iniya yaku Yaubada againe gavesivesiule.

⁵ Valeya ganogalina fa'ina Yaubada againe gavesivesiule, higa Yaubada yana kaliva yana vevine mahamahalidiyao moya'aidi fa'idiya uhawahawahege-mo'e kadu Kaiwabu Yesu againe uvetuvetumagana-mo'a.

⁶ Iya gave'o'ola be Keliso ana vetumagana againe o'eni ime buye kavetobohiyana-yo gaitoma moya'aidi yamumudi Keliso againe hiyemuyemu-ma unahalamane-hagihagiyedi.

⁷ Tobohiyaku, ya hawahega againe Yaubada yana yo'ogaga adi ayauna ukivehavehagina fa'ina, mena ya hawahega againe kadu iya aku ayauna ukivehavehagina be gavemwamwala lakahina.

Folo nuwanuwana Filimoni bana Onesimo ginavega'aulena.

^8-9 Keke gavana fa'ina tu o kaliva hawahawahegani fa'ina, hawahega amine ganave'o'ole. Keliso aku vehimeya giveleku fa'ina, iya akufaiweya vehimeya amine ganavehimeye be gaitoma sa'eyana unagana. Atu keke vehimeya au hawahega amine ganave'o'ole, iya Folo gavesilakahi ada adamoya deliya hiseku-yo iya Yesu Keliso fa'ine yogoyogoniku gamimiyami amanadi.

¹⁰ Natuku Onesimo fa'ine gave'o'ole. Deliya gamiyami tu Keliso ana vetumagana againe gahawavenatunena.

¹¹ Tuwaina bana'e a agetoga ma keke-mo'a againiya gida'igibagiba hagihagina, tu tova adamoya nuwana gi'avilani-yo anafaiweya o ginaveluga kadu iya ginavelugaku.

¹² Au againiya gaveyewana bana natu'ase'aseku amanadi.

¹³ Nuwanuwaku ma higa vaita gadahawatana be gidabwa'uliku, ada Venuwa'ata Yamumuna fa'ine be deliya gamimiyami againe gidavelugaku vaita o loseyani amine.

¹⁴ Atu auwe keke ganahawatani fa'ina nuwanuwaku nagona ya nuwanuwa bana fa'ine ganahalamanena, ada ka'i o unanuwakabubuyeku digo, nuwanuwaku tauni ya nuwanuwa amine unahawahegena, keke luya'aya'ala fa'ina.

¹⁵ Ka'iwa, ka'i bana Onesimo ginuyabuyabu-yo tova kabisona gimiyavehaile be higa ginayewana againiya ginamiya-vagata.

¹⁶ Againiya ginayewana keke vaita agetogagaga amine. Au yana miya agetoga yadi miya ginatubuhegena, higa adamoya bana tobohiyanuwada. Iya nuwanuwaku lakahina bana'e, tu o'eni ma ya nuwanuwa bana againe gavatubuga! Bana a agetoga kadu'e o taini Kaiwabu yana yo'o agaidiya.

¹⁷ Medema fa'ina ka'i velemo'ena o mataniya kavetobohiyana, au ya wavemwamwala unavega'aulena vaita iya udavega'auleku amine.

¹⁸ Gavadi gavadi yana koyona o ka'i ana buki againiya medema unavenuwa'ataku be iya ganalaufata.

¹⁹ Iya Folo tauku nimakuya hidede amine ga'etoladina higa iya tauku matatabuna ganafatana. Atu ka'i nuwa ginunauyena higa yaku kivetuvetunu againe yawai ivaguna unuhagana fa'ina vaita iya agaikuya o udabuki be unalaufata.

²⁰ Siule tobohiyaku, Kaiwabu Yesu fa'ina yaku ve'o'ola amine udanuwakabubuyeku. Ide Keliso yana kaliva fa'ina, udanuwakabubuyeku-yo aku ayauna udakivehavehagina.

²¹ Yaku nuwanuwa hidemi ya leta againe ga'etoladina ada gavetumagane higa wona velemona bonaku wana'abina, e gavaimi unaga ma yaku ve'o'ola ginatubuhegena.

²² Kadu'e yaku nuwanuwa sa'eya-mo'ena fa'ina ganagahe. Yaku abadauda ya manuweya una'ihagihagiyena, fa'ina ganuwave'avina Yaubada moya'aimi yami ve'o'ola ginavenogalena be higa deliya ginayauku-yo agaimiya ganayewa'ela.

Folo yana lukafoi.

²³ Bana Efafilasi Yesu Keliso ana vetumagana fa'ina deliya buye amimiyami-ma gilukafoiyemi.

²⁴ Kadu badi Keliso yana tofaisewa anafaiweya iya'eku ma yadi lukafoi, Maki Alisitako Dimasi Luke.

²⁵ Ada iya gave'o'olemi be Kaiwabu Yesu Keliso yana nuwadoga alu'aluwamiya wana'ayaunena. (Iya Folo bonaku.)